Eksterne kontrollorgan

Riksrevisjonens bygning. Foto: Riksrevisjonen.

Riksrevisjonen

Riksrevisjonen er det viktigaste kontrollorganet Stortinget har. Riksrevisjonen held oppsyn med pengebruken i det offentlege. Gjennom rettleiing, revisjon og kontroll passar dei på at statlege midlar og verdiar blir forvalta på ein forsvarleg måte, i tråd med det Stortinget har bestemt. 

Sivilombodsmannen

Sivilombodsmannen ser til at det offentlege behandlar borgarane rettmessig. Ein borgar kan klage til ombodsmannen dersom han eller ho føler seg urettmessig behandla av kommune, fylke eller stat. Sivilombodsmannen har som mål å medverke til at menneskerettane blir respekterte, gjere offentlege myndigheiter betre og fremme tilliten til offentleg forvaltning.
 

Ombodsmannen for Forsvaret

Ombodsmannen for Forsvaret passar på rettane til personellet i Forsvaret. Ombodsmannen skal syte for at ingen blir urettmessig behandla mens dei tenestegjer i Forsvaret. Personell som føler seg urettmessig behandla, kan klage til ombodsmannen, som vil undersøkje saka nærmare.
 

Ombodsmannen for sivile vernepliktige

Ombodsmannen for sivile vernepliktige passar på rettane til dei som utfører sivil verneplikt. Ombodsmannen skal syte for at ingen blir urettmessig behandla mens dei utfører sivil verneplikt. Personell som føler seg urettmessig behandla, kan klage til ombodsmannen, som vil undersøkje saka nærmare.
 
Det er to forskjellige oppgåver å vere ombodsmann for høvesvis Forsvaret og sivile vernepliktige, men oppgåvene blir utførte av éin og same person. 

EOS-utvalet

EOS-utvalet er Stortingets kontrollorgan for «dei hemmelege tenestene». Utvalet fører løpande kontroll med Politiets tryggingsteneste (PST), Nasjonalt tryggingsorgan (NSM) og Etterretningstenesta. Kontrollen blir utført ved inspeksjonar. Utvalet behandlar dessutan klagar frå enkeltpersonar og organisasjonar som meiner at EOS-tenestene har gjort urett mot dei.