Fullmaktskomiteen

I siste samling i ein stortingsperiode vel Stortinget, etter innstilling frå valkomiteen, ein førebuande fullmaktskomité. Komiteen skal gjere ei mellombels prøving av fullmaktene for medlemmene og varamedlemmene i det nye stortinget – altså kontrollere at valet har gått rett for seg, og at alle representantane har rett til å møte på Stortinget.
 

Klagar og ankemål

Den førebuande fullmaktskomiteen går gjennom og gjer greie for alle klagar og ankemål som er sende inn i rett tid, og som har noko å seie for fullmaktsavgjerdene. Komiteen har på vegner av Stortinget fullmakt til å skaffe fram alle opplysningar som han meiner er nødvendige i denne samanhengen.
 
Før det nye stortinget trer saman, leverer den førebuande komiteen ei førebels innstilling om alle val- og fullmaktsspørsmåla som kan få innverknad på samansetjinga av det nye stortinget. Dagen før det nye stortinget trer saman, sluttar den førebuande komiteen å fungere. Den førebelse innstillinga med alle vedlegg skal leggjast fram for fullmaktskomiteen i det nye stortinget straks han trer saman.
 

Den endelege fullmaktskomiteen

Den endelege fullmaktskomiteen blir vald med det same etter at Stortinget opnar hausten etter valet. Partigruppene er forholdsmessig representerte i komiteen, og det er dei politiske partia sjølve som føreslår aktuelle representantar.
 
Når eit nyvalt storting trer saman, har den første representanten frå kvart fylke med seg ei fullmakt frå valstyret i sitt fylke. Fullmakta seier kva representantar som har mandat til å møte i Stortinget. Fullmaktskomiteen går gjennom fullmaktene og behandlar innstillinga frå den førebuande fullmaktskomiteen.
 
Dersom fullmaktskomiteen oppdagar feil eller regelbrot, kan det bli nødvendig med omval (det skjedde for eksempel i Buskerud og Troms i 1981).
 
Inntil fullmaktene er godkjende, har stortingsmedlemmene mellombels sete og stemme. Etter at innstillinga frå fullmaktskomiteen er ferdigbehandla, vel Stortinget presidentar og sekretærar.