Petter Løvik (H): KUF har i rundskriv F-60-98 varsla ei omlegging i strukturen i studieretning for allmenne, økonomiske og administrative fag slik at økonomisk/administrativ retning vert fjerna f.o.m skuleåret 1999/2000.
Vil statsråden sørge for at heile sakskomplekset omkring dei økonomiske og administrative faga sin plass i den videregående skulen blir underkasta ei grundigare vurdering i samband med evalueringa av Reform 94, før det vert gjennomført endringar i dagens struktur?
Grunngiving
Rundskriv nr. F-60-98 med forslag til endring av strukturen i studieretninga for allmenne, økonomiske og administrative fag har skapt sterke reaksjonar. Desse reaksjonene kjem ikkje fordi ein avviser at det kan være behov for endringar, men fordi forslaget kjem overraskande og utan ei grundig vurdering av mulege konsekvensar. Det vert også vist til at vi står framfor ei generell evaluering av Reform 94, og at det difor ville vere naturleg å utsette strukturendringar til denne evalueringa er gjennomført.
Det er eit faktum at Reform 94 har medført negative konsekvensar for dei økonomiske og administrative faga sin plass i vidaregåande opplæring - noko også næringslivets organisasjonar og fagrørsla har peika på. Difor er det også viktig at det no ikkje vert gjort endringar som kan bidra til å svekke desse faga endå meir, før heile grunnkursstrukturen i Reform 94 er evaluert, jfr. også Innst. S. 163 for 1995-96 (om Høgres forslag om å opprette eit nytt grunnkurs i økonomiske og administrative fag).