Oddbjørg Ausdal Starrfelt (A): Studentrabattane på togreiser har vorte vesentleg reduserte etter 1. januar 2002. Rabattane var fram til nyttår på 60 pst. på grøne og 40 pst. på kvite avgangar, men er nå på 50 pst. og 10 pst. I tillegg er talet på grøne avgangar reduserte.
Vil statsråden ta initiativ til nye forhandlingar med NSB for å få til betre avtalar, eventuelt koma tilbake med framlegg om andre tiltak som kan betra situasjonen?
Grunngiving
Eit fleirtal på Stortinget sikra i samband med handsaming av statsbudsjettet i haust studentane betre økonomiske kår frå 1. november i år med å betra studiefinansieringa. For å dekka inn dette vart m.a. overføringane til NSB reduserte med 32 mill. kr. Det nye rabattilbodet til studentar tyder på at Utdannings- og forskingsdepartementet har gjort ein dårleg jobb når dei forhandla med NSB om nytt rabattsystem. Tilbodet er no klårt for dårleg. Det burde vore mogleg å få med NSB på å ha gode tilbod til studentar, både fordi dei då vel tog framføre andre transportmiddel, og fordi dei lærer seg gode reisevanar og nyttar offentleg transport. Det bør kunna vera grunnlag for nye forhandlingsrundar. Dersom dette ikkje fører fram, bør Regjeringa vurdera andre tiltak, t.d. i samband med revidert statsbudsjett.