Heidi Grande Røys (SV): Det er ikkje noko definert promillegrense for førarar og mannskap på skip pr. i dag. Ifølgje rettspraksis er promillegrensa 1,5. Den byggjer på ei skjønsmessig vurdering i høve § 422 i straffelova. Justisdepartementet tok sikte på å sende på høyring eit lovforslag der ein fastset ei promillegrense for førarar av større båtar, i løpet av hausten 2002.
Har dette skjedd, og viss ikkje, vil då justisministeren skunde på prosessen?
Grunngiving
I brev av 31. juli 2002 tok eg opp spørsmålet om promillegrenser til sjøs med justisministeren.
Medan fritidsbåtførarar må halde seg under ei promillegrense på 0,8 for å unngå straff, kan skipperen på lastebåtar ha 1,5 i promille før vedkommande vert straffa. Det er svært urimeleg med ei så høg promillegrense, der både menneskeliv, miljø og monalege økonomiske verdiar står på spel. Mange lasteskip har store kvanta olje, kjemikaliar og andre stoff som kan gjere stor skade langs kysten vår, dersom det skulle gå gale.
Justisministeren skriv i sitt svarbrev av 28. august 2002 til underteikna at departementet tok sikte på å sende på høyring eit lovforslag som fastset ei promillegrense for førarar av større båtar, i løpet av hausten 2002.