Åge Starheim (FrP): Eg viser til Inns. 422S (2010-2011) der fleirtallsinnstillinga gjer det klart at det skal vere anestesi-beredskap ved sjukehuset på Nordfjordeid. Styreformann i Helse Vest har uttalt til NRK Sogn og Fjordane at vedtak om nedlegging av ortopedi ved sjukehuset på Nordfjordeid skal gjennomførast.
Meinar ikkje statsråden ut i frå fleirtallsinnstillinga i Nasjonal helse- og omsorgsplan, som vart vedteken på Stortinget i går, at dei aktivitetane som er på sjukehuset på Nordfjordeid i dag skal vidareførast også i framtida?
Grunngiving
Eg meinar at det frå føretaksmøte, Helse Vest RHF og Helse Førde HF no er spreidd nok usikkerheit om framtidige aktivitetar ved sjukehuset på Nordfjordeid.
Kommunalminister Liv Signe Navarsete uttalar til NRK Sogn og Fjordane at no har regjeringa bestemt at anestesi skal vidareførast som i dag ved Nordfjord sjukehus.
Vidare har nestleiar i helse- og omsorgskomiteen, Kjersti Toppe, uttalt til same kanal at når anestesi skal vidareførast ved sjukehuset på Nordfjordeid, er det også naturleg å vidareføre funksjonar som gjer at anestesilegar har noko å arbeide med.
Frå Helseministeren og helsedepartementet har det ikkje kome noko uttale om dette etter at fleirtallsinnstillinga i saka om Nasjonal helse- og omsorgsplan er kjend.
På vegne av dei tilsette ved sjukehuset på Nordfjordeid og folk i Nordfjordområdet, som vil ha sjukehuset på Nordfjordeid som det er i dag, forlangar eg eit klart svar frå statsråden om framtidsutsiktene for sjukehuset på Nordfjordeid.
Statsråden har sjølv invitert til at det på sjukehuset på Nordfjordeid skal vere eit pilotprosjekt for framtidige lokalsjukehus. Eg oppfattar det slik at Helse Vest, som har fått mandat til å utvikle piloten, saman med Nordfjordkommunane, legg opp til i sitt forslag til mandat at prosjektet skal utviklast i samsvar med dei strukturar som Helse Førde og Helse Vest har lagt opp til, nemleg at sjukehuset på Nordfjordeid skal i framtida ha rus, psykiatri og indremedisinsk beredskap utan anestesi.
Dette er i sterk kontrast til fleirtallsinnstillinga som vart vedteken i Stortinget den 14. juni 2011.
Eg ber statsråden straks gripe inn og instruere styret og byråkratane i Helse Vest og Helse Førde før styremøte i Helse Vest den 22. juni, slik at dei får eit pålegg frå statsråden om å halde seg til fleirtallsinntillinga som vart vedteken på Stortinget i går, nemleg at pilotprosjektet skal innehalde eit framtidig lokalsjukehus for Nordfjordregionen med indremedisinsk akuttberedskap, ortopedisk avdeling som i dag, psykiatri, framtidig ruspost, anestesi og øvrige støttefunksjonar.
Dette fordi det då kan verte eit robust lokalsjukehus som gjer det mulig å behalde noverande kompetanse og rekruttere nødvendig fagkompetansen i framtida.
Når det gjeld fødeavdelinga må det i pilotprosjektet og sjåast på om det kan vere hensiktsmessig, både frå eit nærleiksprinsipp og ut i frå økonomiske vurderingar, og oppretthalde avdelinga som i dag også i framtida.