Grunngiving

Statnett sine planar for den nye 420 kW linja gjennom Naustdal har vore svært omstridd. Det har vore sterk motstand mot å legge linja gjennom dei sentrale delane av kommunen. Kommunestyret ville i utgangspunktet at den nye 420 kW linja mellom Ørskog og Sogndal skulle leggast i sjøkabel. Kommunestyret var delt i synet på om linja skulle gå over dalen ved Grimseth eller den skulle gå lenger oppe i Naustedalen. Både NVE og OED godkjende konsesjon for traseen ved Grimseth.
Grunneigarane på Grimseth har vore svært kritiske til at den nye 420 kW linja skulle kome over deira eigedom. Heile prosessen med den nye 420 kW linja har vore ei stor belastning for mange.
132 kW linja som det her er snakk om går i same traseen som den nye 420 kW linja og grunneigaren på Grimseth har vore positiv til at denne skulle kablast. Det var eit absolutt krav at det skulle brukast styrt boring under elva for å få kabelen forbi elva. Dette kravet har vore kjent for Statnett heile tida.
Å kjernebore ei så kort strekning kan ikkje by på store problem. Det kan heller ikkje vere noko stor ekstrakostnad å gjere det. Det er derfor svært underleg at Statnett ikkje legg til rette for ei slik løysing når dei veit det er eit absolutt krav frå grunneigaren for å skåne elva.
Grunneigarane har gjennom mange år gjort ein stor innsats for å bevare ein livskraftig laksestamme i elva, og det som no skjer er etter deira syn svært øydeleggande.
Når Statnett startar arbeidet med graving over elva ei veke før klagefristen går ut er dette å sette klageretten til grunneigarane til side. Det er lett å forstå at grunneigarane på Grimseth føler dette som maktmisbruk. Når Statnett ikkje ventar til klagefristen er ute før dei startar opp gravinga, og i tillegg vel ei løysing som kan vere uheldig for elva, er det lett å sjå at det blir oppfatta som arroganse frå Statnett si side.