Bjørn Lødemel (H): I ei nettsak på NRK Sogn og Fjordane 11.03.2013 blir det vist til at ein rapport Nordfjordkryssing AS har bestilt frå Samfunns- og næringsforsking med Victor Normann konkluderer med at den årlege gevinsten av E39 over Lote-Anda blir 350 millionar kroner. Det blir også vist til at indre løysing over Stryn gjev ein verdi på 234 millionar kroner pr. år. Dersom denne rapporten blir brukt som grunnlagsmateriale for val av trasé i Nordfjord er det viktig at heile rapporten blir offentliggjort.
Vil statsråden sørgje for at det skjer?
Grunngiving
Saka om traséval for E39 i Nordfjord har skapt mykje strid blant naboar og kommunar i Nordfjord. Det skulle kome avgjerd i denne saka i månadsskiftet januar/februar, og det skulle kome avgjerd i samband med framlegginga av NTP. Framleis ventar ein på svar frå regjeringa.
Dei aller fleste høyringsuttalane peikar på indre trasé med bru-kryssing i Stryn som den beste løysinga. Fagetaten, Statens vegvesen, går også inn for indre trasé. Ein ny rapport som SINTEFF har laga for Vegdirektoratet konkluderer også med at indre tras\e har størst samfunnsnytte. Denne rapporten nyttar dei nyaste parameter for utrekning av samfunnsnytte med analyseperiode på 40 år og 4 % rente.
Det er viktig at det grunnlagsmateriale som departementet skal nytte til å ta avgjerd i trasevalet er tilgjengelege for alle. Derfor er det viktig at rapporten som Victor Normann har laga for Nordfjordkryssing AS også blir offentliggjort dersom departementet nyttar den i sine vurderingar.
Opplysningar som er av interesse er til dømes kva slag trafikk- og pendlingsmønster rapporten legg til grunn for sine konklusjonar ved dei ulike bruløysingane, kva ferjefrekvens over Lote-Anda rapporten legg til grunn dersom det blir bru i indre, og kva rapporten seier om byggestart for bruene ved val av midtre eller indre løysing.
Dette er nokre døme på spørsmål som er viktige å få svar på dersom departementet nyttar denne rapporten som ein del av sitt avgjerdsgrunnlag.