Sveinung Rotevatn (V): Noreg støttar det iranske narkotikaprogrammet med seks millionar kroner i året, samtidig som Iran nyttar offentleg henging som straff for narkotikakriminalitet. På den måten finansierer Noreg ein politikk som tek livet av fleire hundre personar kvart år.
Vil ministeren ta til orde for at Noreg innstiller stønaden til UNODCs program mot narkotika og kriminalitet, slik som Danmark gjekk inn for å gjere i fjor?
Grunngiving
Sida 2011 har Noreg støtta det iranske narkotikaprogrammet med seks millionar kroner kvart år. Pengane som Noreg gir til Iran blir kanalisert gjennom SN- organisasjonen UNODC, The UN Office Drugs and Crime. Sida 2005 har Iran fått over 200 millionar kroner frå EU og SN for å kjempe mot narkotikakriminalitet. Programmet er delt inn i tre delprogram: (1) Ulovleg smugling og grensehandtering, (2) reduksjon av narkotikaetterspurnad og HIV-kontroll, og (3) kriminalitet, strafferett og korrupsjon.
Noreg har øyremerkt pengane til delprogram 2 og 3, og i teorien skal pengane frå Noreg verta nytta til å kjempa mot avhengnad av narkotika, og til å betra det institusjonelle rammeverket for strafferett og kampen mot korrupsjon. Men i praksis støttar Noreg ein politikk som tek livet av fleire hundre personar kvart år. Tal frå menneskerettsgruppa «Iran Human Rights» viser at i 2013 blei 328 menneske i Iran hengde for narkotikakriminalitet. I 2012 var talla minst 580 menneske, og 294 av desse var offentlege avrettingar. Iran er det landa i verda som nyttar dødsstraff hyppigast, nest etter Kina. Mellom 70 og 80 prosent av dødsstraffene i Iran er knytte til narkotika.
I 2011 og 2012 gav Danmark fem millionar kroner kvart år til narkotikaprogrammet i Iran, men i 2013 trekte utviklingsminister Christian Friis Bach det danske tilskottet og uttalte:
«Det er et signal til Iran om, at brugen af dødsstraf er uacceptabel og noget, som vi på ingen måde kan stå inde for.»