Jenny Klinge (Sp): Statsråden har tidlegare uttalt at Stad skipstunnel må bli billigare før det er aktuelt å starte bygginga. Kan statsråden gjera greie for om løyvinga i det nylege budsjettforliket er å rekne som ein start for prosjektet, eller om han enno meiner at storleiken på tunnelen og kostnadene ved prosjektet må ned før det kan realiserast?
Grunngiving
Samferdselsminister Dale vart intervjua av NRK Møre og Romsdal 20. oktober 2018, og der står det:
«At det ikkje kom midlar i budsjettet for 2019, kommenterer Dale slik: – Vi ville ikkje begynne på eit prosjekt der kostnadene er langt høgare enn ramma. Difor må vi få ned kostnadene før løyvingane kan kome. Det tilseier at ein også lokalt kan begynne å jobbe med det. Til raskare ein gjer det, til raskare kan ein realisere prosjektet.
Statsråden seier arbeidet med Stad skipstunnel skal ha oppstart seinast innan 2022. Byggjetida er estimert til tre-fire år. – Det er lagt opp til at ein skal få løyving denne perioden, dersom ein greier å få kostnadskontroll på prosjektet, seier Dale.»
Mange er bekymra for at tunnelen skal nedskalerast til å ta mindre skip enn det som no er planlagt. No som budsjettforliket mellom regjeringspartia og KrF har gitt som resultat at Stad skipstunnel får ei løyving på 20 millionar kroner, er det viktig å få klarlagt om dette har endra noko i måten statsråden tenkjer på om skipstunnelen.