Dokument nr. 15:1812 (2018-2019) Innlevert: 07.06.2019 Sendt: 11.06.2019 Svart på: 17.06.2019 av samferdselsminister Jon Georg Dale
Arne Nævra (SV): I Hordaland fylkeskommunes statusrapport om Prosjekt innfartsparkering står det: «Det har vore fleire møter mellom Bergen kommune / BaneNOR / Hordaland fylkeskommune for mellom anna å få eit framtidig parkeringshus inn i reguleringsplanane for Indre Arna sentrum. Oppgåva er prioritert». Kan statsråden opplyse om status for dette prosjektet og når et sterkt, lokalt behov for innfartsparkering er løst?
Jon Georg Dale: Bane NOR opplyser at det er regulert inn eit parkeringshus i områdeplanen som blei vedtatt i 2014, og at Bane NOR sitt prosjekt for utbygging av dobbeltsporet Arna-Fløen disponerer dette arealet, som kan frigjerast tidlegast i 2022. Bane NOR skal drive verksemda etter forretningsmessige prinsipp, og har difor laga ein parkeringsstrategi som gir føretaket inntekter som kan nyttast til å drifte parkeringane og forbetre tilbodet ved stasjonane. Bane NOR estimerer at frekvensaukinga muliggjort av dobbeltsporet mellom Arna og Fløen, vil gje auka etterspørsel etter parkeringsplassar i Arna. Betalingsnivået for innfartsparkering i området er i dag ikkje tilstrekkeleg til å finansiere eit parkeringshus, men Bane NOR vil ved auka etterspørsel etter parkeringskapasitet vurdere å byggje andre og meir kostbare løysingar enn flateparkering dersom betalingsvilja til brukarane er til stade.