Som omtalt i St.prp. nr. 1 (2008–2009) for Samferdselsdepartementet
hadde Statens vegvesen tilbodsopning på hovudentreprisen for rv 283 Øvre
Sund bru i Drammen i januar 2008. Det kom inn eitt tilbod som ville
ha ført til ytterlegare kostnadsauke på prosjektet. Konkurransen blei
derfor avslutta, og det blei vedteke å dele opp hovudentreprisen
i fire mindre delar med sikte på fleire tilbod og reduserte kostnader.
Etter nye konkurransar er prognosen for sluttkostnaden
på 504 mill. 2009-kroner. Dette inneber ein kostnadsauke på 65 mill.
kroner eller 15 pst. i forhold til St.prp. nr. 1 (2007–2008). Nytt
kostnadsoverslag må derfor leggjast fram for Stortinget.
Framdrifta er kritisk ved at omlegging av høgspentkabel
og nødvendige mudringsarbeid må gjennomførast før vårflaumen set
inn.
Vegdirektoratet vurderer det ikkje som sannsynleg
at ein vil oppnå auka konkurranse og redusert kostnad gjennom ein
ny tilbodsrunde.
Samferdselsdepartementet legg til grunn at ei eventuell
avbryting av tilbodskonkurransen vil medføre at prosjektet blir
eitt år forseinka.
Samferdselsdepartementet tilrår at prosjektet blir
gjennomført basert på revidert kostnadsoverslag. Det er venta at
bruarbeida kjem i gong i månadsskiftet mars/april 2009 og at prosjektet kan
opnast for trafikk hausten 2011.
Eventuelle auka utgifter i 2009 av kostnadsauken
for prosjektet blir dekt innanfor gjeldande budsjettrammer for kap.
1320 Statens vegvesen, post 30 Investeringar.
Komiteen, medlemene frå Arbeidarpartiet,
Karita Bekkemellem, Eirin Faldet, Irene Johansen, Torstein Rudihagen, Tor-Arne
Strøm og Truls Wickholm, frå Framstegspartiet, Bård Hoksrud, leiaren
Per Sandberg og Arne Sortevik, frå Høgre, Øyvind Halleraker og Trond Helleland,
frå Sosialistisk Venstreparti, Hallgeir H. Langeland, frå Kristeleg Folkeparti,
Jan Sahl, frå Senterpartiet, Jenny Klinge, og frå Venstre, Borghild Tenden, viser
til at rv 283 Øvre Sund bru er siste del av sentrumsringen i Drammen,
og ein viktig del av vegpakke Drammen. Komiteen registrerer
at prosjektet blir noko dyrare enn først antatt, men er samd i vurderinga
av at ein no må godta tilbodet og kome i gang. Ei ytterlegare utsetting
vil også ha store samfunnsøkonomiske kostnader.
Komiteen sluttar seg til Regjeringas
forslag, og meiner at det er svært viktig at utbygginga startar opp
så raskt som mogleg.
Komiteen har merka seg at kostnadsauken
i sin heilskap blir dekt over kap. 1320 Statens vegvesen, post
30 Investeringar.
Komiteen har elles
ingen merknader, viser til proposisjonen og rår Stortinget til å
gjere slikt
vedtak:
Stortinget samtykkjer i at prosjektet rv 283
Øvre Sund bru i Drammen i Buskerud – vidare utbygging – blir gjennomført
basert på revidert kostnadsoverslag.
Oslo, i transport- og kommunikasjonskomiteen, den 17. mars 2009
Per Sandberg |
Trond Helleland |
leiar |
ordførar |