Inge Lønning(H):
På vegner av
representanten Petter Løvik skal eg få leggje fram dette spørsmålet for
kyrkje-, utdannings- og forskingsministeren:
Oppslag i media viser at vedtaket om å
redusere studenttalet ved universiteta nå gir seg direkte utslag i svekt
undervisningstilbod til studentar som allereie er i gang med studia.
Kva vil Regjeringa gjere for å bøte på
desse problema?
Statsråd Jon Lilletun:
Stortinget
vedtok ved handsaminga av statsbudsjettet for 1998 ein reduksjon i talet på
studieplassar i universitetssektoren på om lag 2.000 i høve til hausten
1997. I samband med denne reduksjonen er det samla trekt inn om lag 60 mill.
kr frå dei fire universiteta. Midlane som vart trekte inn frå universiteta,
var føresett m.a å finansiere tiltak i Handlingsplan for helse- og
omsorgspersonell, dvs. studieplassar i prioriterte utdanningar som
sjukepleie, vernepleie og medisin.
Eg viser til at Stortinget gjennom
handsaminga av
Innst.S.nr.260
(1996-1997), jf.
St.prp.nr.59 (1996-1997)
, gav samtykke til regulering av opptaket til studium ved universiteta i
Oslo, Bergen, Tromsø samt Noregs teknisk-naturvitskaplege universitet i
samsvar med opptaksrammer for studieåret 1997-98, gjevne i
St.prp.nr.59 (1996-1997)
. Vidare er det i
St.prp.nr.1 (1997-1998)
m.a fastsett måltal for talet på studentar og talet på uteksaminerte
kandidatar.
Innafor ovannemnde føringar har
universiteta fridom til sjølve å disponere tildelte midlar, jf.
praktiseringa av ein rammestyrt budsjettprosess i staten. Dette fører med
seg at universiteta sjølve fordeler midlar på fakultet og institutt. Eg har
forståing for at avvegingane for universiteta ikkje har vore enkle. Ut frå
statsbudsjettet for 1998 tyder oppslag i media på at den reduserte løyvinga
på samla 60 mill. kr er handsama noko forskjellig ved dei fire universiteta.
Oppslag i media har fokusert spesielt
på redusert opptakskapasitet ved einskilde studium ved Universitetet i Oslo.
I statsbudsjettet for 1998 er det lagt til grunn at talet på studieplassar
skal bli redusert med 918, frå om lag 34.000 i 1997. Dette utgjer ein
reduksjon på i underkant av 3 %. Intensjonen er at reduksjonane skal skje
gjennom avgang av studentar som fullfører studiet sitt eller fell frå før
dei har fullført, og gjennom redusert opptak til grunnivå.
Departementet har teke opp med
institusjonane at studentar som allereie er i gang med studieløpet sitt,
ikkje skal verte berørte. Eg vil syte for at dette på nytt vert presisert
overfor universiteta.
Lodve Solholm hadde her igjen teke
over presidentplassen.
Inge Lønning (H):
Eg takkar for
svaret. Det vil på dette tidspunktet vere uråd å gjere noko for å rette opp
stoda når det gjeld vårsemesteret 1998, men det vil sjølvsagt vere råd å
gjere noko konkret frå statsråden si side i samband med revidert
nasjonalbudsjett med tanke på det andre semesteret i 1998, haustsemesteret.
Det som røynslene viser, er at når institusjonane får beskjed om nedskjering
av studenttalet på eit så seint tidspunkt som dei fekk denne gongen, er det
praktisk talt uråd å løyse problemet utan å skape vanskar for studentar som
har planlagt eit studieløp. Den einaste måten det er råd å spare pengar på,
er å skjere ned på time- og hjelpelærarbudsjettet.
Statsråd Jon Lilletun:
Eg klarer
ikkje å la vere fyrst å seie at det er nesten ei høgtidsstund i salen når
representanten Lønning på ein så framifrå måte bruker nynorsk. Eg meiner at
så godt som han snakkar det, burde det verte den målforma han bruker til
vanleg.
Når det gjeld dei oppslaga som har
vore i forhold til Universitetet i Oslo, om at berre 40 studentar opphavleg
vart tekne opp ved studiet i biologi, mot normalt 80 og i fjor 120, har
departementet fått munnleg melding om at talet no er auka til 60, så dei har
klart å gjere noko på kort sikt.
Elles er eg sjølvsagt samd med
representanten Lønning i at når det er så korte fristar, er det vanskeleg
for universiteta. Men eg vil stadfeste at vi vil fylgje dette nøye, slik at
nedskjeringa fyrst og fremst går i høve til mindre opptak og ikkje rammar
studentar som er i eit studieløp.
Inge Lønning (H):
« Den største gleda
ein kan ha, det er å gjere andre glad », så eg skal vurdere å halde fram.
Eg har eit tilleggsspørsmål til som eg
gjerne vil leggje fram for statsråden. Mitt inntrykk er at Kyrkje-,
utdannings- og forskingsdepartementet er av dei departementa som er mest
restriktive når det gjeld å kommunisere med sine institusjonar undervegs i
budsjettprosessen. Kunne statsråden tenkje seg å endre på den praksisen,
slik at institusjonane på eit tidlegare tidspunkt får signal som dei kan ta
omsyn til når dei skal planleggje?
Presidenten: Presidenten vil slutte
seg til statsråden sin karakteristikk av representanten Lønnings nynorsk.
Statsråd Jon Lilletun:
Vi har nyleg
vedteke ei ny universitets- og høgskulelov. På mange vis trur eg den er ein
god arbeidsreiskap. Men det er vel heller ikkje tvil om at på enkelte
område kan detaljstyringa av desse institusjonane framleis vere vel sterk.
Oppmodinga frå representanten Lønning
om ein opnare kommunikasjon skal eg ta med meg. Det er sjølvsagt eit
problem at ein ikkje på ein måte kan gjere budsjettframlegget kjent før det
er lagt fram, men samstundes burde ein kunne ha ein kommunikasjon med
institusjonane om kva som er mogleg og ikkje mogleg. Vi skal i gang med eit
større arbeid når det gjeld høgare utdanning, og i den samanhengen vil eg ta
med oppmodinga frå representanten Lønning.