Presidenten: Også dette spørsmålet,
fra representanten Inge Lønning til kirke-, utdannings-
og forskningsministeren, vil bli tatt opp av representanten Petter
Løvik.
Petter Løvik (H): Eg tillèt meg å stille følgjande spørsmål
til kyrkje-, utdannings- og forskingsministeren:
«Tilgangen på fullt kvalifiserte
lærere i videregående skole er meget vanskelig.
Vil statsråden ta initiativ til at
det blir lettere for voksenopplæringsinstitusjoner, for
eksempel Folkeuniversitetet, å sette i gang desentralisert
tilbud om praktisk-pedagogisk utdannelse i samarbeide med universiteter/høgskoler?»
Statsråd Jon Lilletun: Spørsmål om tilgang på kvalifiserte
lærarar i vidaregåande opplæring vil
verte teke opp og drøfta i stortingsmeldinga om rekrutteringa
til læraryrket, som eg snart vil leggje fram for Stortinget.
Praktisk-pedagogisk utdanning er eit utdanningstilbod ved
dei fleste statlege høgskulane og ved alle universiteta.
Hausten 1998 og 1999 vart tilbodet om permanente eller mellombels
studietilbod i praktisk-pedagogisk utdanning utvida til sju statlege
eller vitskaplege høgskular som ikkje hadde tilbodet frå før.
Opptakskapasiteten på landsbasis har derfor auka. Hausten
1999 utvikla ytterlegare to av institusjonane praktisk-pedagogisk
utdanning med innslag av fjernundervisning. Fjernundervisningstilbod
lettar tilgangen til slik utdanning.
Vaksenopplæringsinstitusjonar kan
involvere seg i slik utdanning gjennom eksamensretta studieringar
på høgre nivå, i samarbeid med universitet
og høgskular. Søknader om slike tilbod vert behandla
av dei statlege utdanningskontora i fylka i samråd med
høgskular og universitet. Ved vurdering av slike søknader
skal ein m.a. sjå nærare på behova i
regionen. Det er naturleg å prioritere særskilt
opplæringsbehov som ikkje vert dekte av høgskular
og universitet.
Som nemnt vil eg gå nærmare
inn på denne typen spørsmål i den komande
stortingsmeldinga om rekrutteringa til læraryrket. Vi har
altså i løpet av den seinare tida fått
etablert praktisk-pedagogisk utdanning ved fleire institusjonar
og slik auka det samla tilbodet. I tillegg er fleire av tilboda
gjorde meir fleksible. Eg er oppteken av å gjere tilgangen
til praktisk-pedagogisk utdanning så lett som mogleg, og
ser gjerne at vaksenopplæringsorganisasjonar går
saman med universitet og høgskular om å realisere
planar om desentraliserte tilbod der dette er naturleg og ynskjeleg.
Petter Løvik (H): Eg takkar statsråden for svaret.
Eg er sjølvsagt heilt samd i det som
blei sagt om at dette høyrer heime i den stortingsmeldinga
om rekruttering som snart skal leggast fram. Eg skal ikkje utdjupe det,
for det tidspunktet har vore diskutert fleire gonger.
Det som er bakgrunnen for spørsmålet
i denne samanhengen, er at vi har stader der det er personar som
er interesserte i å få ei praktisk-pedagogisk
utdanning, og som har eit fagleg grunnlag frå tidlegare,
men som spesielt på grunn av avstanden har problem med å kome
seg til plassane der dette er mogleg å oppnå.
Vi har sett at spesielt i Nord-Noreg med lange avstandar er dette
eit problem, og vi kjenner konkret til at Folkeuniversitetet har hatt
problem med å få til det nødvendige samarbeidet.
Eg lurer på om det er konkrete tiltak
som kan gjerast for eventuelt å lette og forbetre kommunikasjonen
og samarbeidet mellom universiteta og Folkeuniversitet på desse
områda, for dette er ei sak som eg trur det er veldig viktig å kome
vidare med.
Statsråd Jon Lilletun: Det som vel var konklusjonen i mitt fyrste
svar, var at eg gjerne ser at eit slikt samarbeid kjem i gang der
det er behov for det, og der det er naturleg med eit slikt opplegg.
Det er heilt opplagt at desentralisert utdanning, både
innanfor helse og andre område, er ein svært god
måte å rekruttere på for å få ei
stabil og varig rekruttering.
Som sagt: Eg kjem attende til dette, og eg
er altså positiv til det som er intensjonen i representanten
Lønning sitt spørsmål, framført
av representanten Løvik.