Minnetale over tidligere stortingsrepresentant Sverre Helland
Presidenten: Vørde medrepresentantar!
Tidlegare stortingsrepresentant
Sverre Helland døydde 31. desember 2007, 83 år gammal.
Helland vart fødd 18. september 1924 i Hamre i Hordaland. Han
vart utdanna som elektromontør frå Bergen tekniske skole og
arbeidde i mange år som elektroinstallatør i eige firma ved
sida av gardsbruket i heimkommunen Lindås. Helland Elektro AS, som
han var med på å starte, vart etter kvart det største
og leiande installasjonsselskapet i Nordhordland.
I 1969 vart Sverre
Helland vald inn på Stortinget, der han sat i fire periodar. I si
tid på Stortinget sat han i åtte år i industrikomiteen,
seks år i finanskomiteen og dei to siste åra i justiskomiteen.
Sverre Helland hadde ein sterk identitet knytt til heimfylket og
heimstaden gjennom heile sitt politiske liv.
«For meg er Oslo
berre ein stad der eg arbeider, et og søv. Det er Eikangervåg
som har vore heimstaden min i alle desse åra,» sa Helland til
avisa Strilen då han i 1985 gjekk av som stortingsrepresentant etter
16 år på Stortinget. Men det var ikkje berre heimstaden Sverre
Helland hadde omsut for. Det var mange kommunar og lokallag som fekk glede
av besøk av stortingsmann Helland, som ein periode òg var
nestformann i Senterpartiet. Han var ein ettertrakta føredragshaldar,
både i politiske fora og i næringslivet.
Utbygging av
Mongstad, stamvegen mellom Bergen og Sogn og Nordhordlandsbrua var nokre
av dei lokale sakene som han brukte mykje tid på. I si tid som ordførar
i Lindås var han ei av drivkreftene for å få fram areal
til oljeraffineriet på Mongstad. Som stortingsrepresentant følgde
han opp arbeidet for å få realisert desse planane. Helland hadde
òg stort engasjement for nasjonal og internasjonal politikk. Han
var ein fast og ihuga motstandar av EEC. Han markerte seg med skepsis til
finansieringa av Folketrygdfondet, der han meinte at fondet i framtida ville
verte altfor lite til å dekkje kostnadene. Både i denne og i
andre saker markerte han seg som ein framsynt politikar med klare meiningar
og ein sterk vilje.
Helland var godt likt og respektert i alle politiske
leirar og mellom journalistane for å gje oppriktige svar og synspunkt.
Olav Garvik si skildring i Bergens Tidende 3. januar i år gjev eit
godt bilete av politikaren Sverre Helland:
«Ein seig og viljesterk stril som aldri tok taktiske omsyn. Sverre
Helland stod alltid på det han meinte var rett, om han så vart
ståande aleine.»
Då Sverre Helland
forlét rikspolitikken og Stortinget i 1985, 61 år gamal, tok
han fatt på ny utdanning innan elektrofaget for å vidareutdanne
seg i høve krava til å leie ei elektrobedrift. Ein del år
overtok han alt ansvaret for drifta, før han etter kvart overlét
til sonen å drive familieselskapet vidare.
Vi er takksame for
den betydelege samfunnsinnsatsen som Sverre Helland har lagt ned, og lyser
fred over hans minne.
Stortingsrepresentantene påhørte
stående presidentens minnetale.
Valg av setttepresident
Presidenten: Presidenten vil foreslå
at det velges en settepresident for stortingets møte i dag og i morgen
- og anser det som vedtatt.
Presidenten vil foreslå Solveig
Horne. - Andre forslag foreligger ikke, og Solveig Horne anses enstemmig
valgt som settepresident for dagens og morgendagens møter.