Bakgrunn
Forslagsstillarane viser
til at Høgsterett i desember 2016 slo fast at norske tariffavtalar
med fortrinnsrett til losse- og lastearbeid ikkje kunne vidareførast.
Denne fortrinnsretten er heimla i ILO-konvensjon 137. Tariffavtalane
var inngått mellom Norsk Transportarbeiderforbund (NTF) og NHO Logistikk
og Transport (NHO LT).
Høgsterett sa seg
slik samd med EFTA-domstolen i denne konfliktfylte saka om hamnearbeidarane
sin fortrinnsrett til losse- og lastearbeid ved offentlege hamner i
Noreg. LO framheva i sitt sluttinnlegg i Høgsterett at eit slikt
utfall ville bryta med Grunnlova:
«En tilsidesettelse
av Rammeavtalen er et inngrep som strider mot Grunnloven §101 sammenholdt
med EMK artikkel 11 og andre menneskerettskonvensjoner Norge er
bundet av.»
Forslagsstillarane
viser til at den konkrete saka omhandla det danske spedisjonsfirmaet
Holship i Drammen, som tilsidesette dei organiserte hamnearbeidarane
– i strid med tariffavtalar NHO så seint som 14. oktober 2016 forlenga
med Norsk Transportarbeiderforbund. Ved ei rekkje andre norske hamner
hadde arbeidsgjevarsida allereie utelukka mange av hamnearbeidarane
som er tilsette ved losse- og lastekontorene.
Hausten 2017 vart
NTF og NHO LT samde om ein ny tariffavtale for hamneverksemder i
offentlege og private hamner. Avtalen, med namnet «Havne- og terminaloverenskomsten»,
erstatta dei tre tariffavtalane for hamnene: Rammeavtalen, Sør-
og Nord-Norgeavtalen og Havneoverenskomsten. Den nye avtalen vart
fortlaupande teken i bruk av avtalebedriftene og skulle seinast
31. mars 2018 erstatta ovannemnde tariffavtalar.
Forslagsstillarane
viser til at den nye avtalen ikkje nemner ILO-konvensjon 137 (Konvensjon
nr. 137 om sosiale følger av nye metoder for godsbehandling i havner
(1975)), som gjev registrerte hamnearbeidarar fortrinnsrett til
losse- og lastearbeid på hamnene.
ILO-konvensjonen er ratifisert
av Noreg. Implementeringa av konvensjonen kan skje gjennom tariffavtale
eller gjennom lov eller forskrift. Forslagsstillarane meiner regjeringa
må ta initiativ til endringar i lov eller forskrift for å realisera
fortrinnsretten hamnearbeidarar har gjennom ILO-konvensjon 137.
Neste ILO-kongress finn stad i mai–juni 2018. Forslagsstillarane
viser til at Senterpartiet meiner Noreg framleis skal vere tilslutta ILO-konvensjon
137. Men sjølv om fleirtalet på Stortinget eventuelt skulle velja
å seia opp denne konvensjonen i år, så er Noreg etter ILO sitt regelverk
uansett forplikta til å halde fast ved konvensjonen og dei forpliktingane
som ligg i konvensjonen fram til 2026.