I Stortinget vert publikasjonane frå regjeringa lagde fram i eit møte (referert) og derfrå sedne vidare til ein komité. Om lag 2/3 va sakene som Stortinget har føre har grunnlag i publikasjonar frå regjeringa.

Melding til Stortinget

Regjeringa brukar melding til Stortinget når ho vil presentera saker for Stortinget utan framlegg til vedtak. Meldingane er ein rapport til Stortinget om arbeid som er gjort på eit spesielt felt, eller drøfting av framtidig politikk. Meldingane, og førehavinga av dei i Stortinget, dannar ofte grunnlag for ein seinare proposisjon. Melding til Stortinget vert òg nytta når regjeringa vil trekkja attende eit lovframlegg. 

Proposisjon til Stortinget

Regjeringa brukar proposisjon til Stortinget når ho bed Stortinget om å gjera særskilde vedtak. Det finst tre ulike slag proposisjonar:

• Proposisjon til Stortinget (stortingsvedtak) som inneheld konkrete framlegg til vedtak som gjeld alminnelege saker og budsjettsaker.
• Proposisjon til Stortinget (lovvedtak) som inneheld konkrete framlegg til vedtak som gjeld lovsaker.
• Proposisjon til Stortinget (lovvedtak og stortingsvedtak) som inneheld konkrete framlegg til vedtak som gjeld lovsaker (lovvedtak), alminnelege saker og budsjettsaker (stortingsvedtak).

Noregs offentlege utgreiingar (NOU)

Noregs offentlege utgreiingar (NOU) er ein serie med rapportar som blir publiserte av utval eller arbeidsgrupper nedsett av regjeringa. Ofte vil departementet med ansvaret for NOU-en etterpå omarbeida innhaldet og forma ei melding til Stortinget. Det er meldinga, og ikkje sjølve NOU-rapporten, som dannar grunnlaget for Stortingets vidare handsaming av saka.