Proposisjonen inneheld ulike framlegg til justeringar av løyvingane under Kultur- og kyrkjedepartementets budsjett, mellom anna kapittel som gjeld Den norske kyrkja.

Kap. 340 og 3340 Kyrkjeleg administrasjon

Demokratireforma

Departementet viser til at Opplysningsvesenets fond skal dekkje utgifter knytte til innføringa av demokratireforma i Den norske kyrkja. Inntektene til Kyrkjerådet blir m.a. som følgje av dette høgare enn venta. Dei samla inntektene i 2008 er venta å bli om lag 17,8 mill. kroner. Dette er 7,5 mill. kroner høgare enn budsjettert. Meirinntektene skal dekkje tilsvarande meirutgifter.

Departementet foreslår derfor at løyvinga i 2008 under kap. 3340 post 1 Ymse inntekter blir auka med 7,5 mill. kroner og at driftsutgiftene under kap. 340 post 1 blir auka tilsvarande.

Nytt medlemsregister

Departementet viser til at Opplysningsvesenets fond skal dekkje utgifter i samband med nytt medlemsregister i Den norske kyrkja. Oppdragsinntektene blir m.a. som følgje av dette høgare enn venta. Dei samla inntektene i 2008 er venta å bli om lag 34,2 mill. kroner. Dette er 18 mill. kroner høgare enn budsjettert.

Departementet foreslår å auke løyvinga i 2008 under kap. 3340 post 2 Inntekter ved oppdrag med 18 mill. kroner og ei tilsvarande auke av dei særskilde driftsutgiftene under kap. 340 post 21.

Kap. 341 og 3341 Presteskapet

Inntektene frå refusjonar og eigendelar ved ulike samlingar, etterutdanningskurs m.m. blir høgare enn venta. Dei samla inntektene i 2008 er venta å bli om lag 16,6 mill. kroner. Dette er 4 mill. kroner høgare enn budsjettert og gjeld i hovudsak refusjon av utgifter frå Fornyings- og administrasjonsdepartementet i samband med gjennomføring av forsøk med redusert arbeidstid for prestar. Meirinntektene skal dekkje tilsvarande meirutgifter.

Departementet foreslår å auke driftsutgiftene under kap. 340 post 1 med 4 mill. kroner for 2008 og ei tilsvarande auke av kap. 3341 post 1 Ymse inntekter.