Laila Kaland (A):
Eg vil stille
følgjande spørsmål til fiskeriministeren:
Ålesund hamn er i dag det viktigaste
hamneanlegget mellom Bergen og Trondheim og fungerer som regionhamn for
Nord-Vestlandet, Møre og Romsdal og delar av Sogn og Fjordane. Hamna har
hatt ein sterk auke av eksport både av fisk/fiskeprodukt og av godstrafikk.
Då Stortinget handsama Norsk havneplan i 1990 var Ålesund hamn peika på som
aktuell for å få status som sentralhamn.
Vil statsråden medverke til at Ålesund
kan bli sentralhamn for Nord-Vestlandet?
Statsråd Jan Henry T. Olsen:
I
november 1982 skipa Fiskeridepartementet eit utval som skulle fremje forslag
om ein nasjonal hamneplan. Utvalet la samferdsleøkonomiske kriterium til
grunn for forslaget til eit hamnemønster. Utvalet kom til at hamner som 1)
greidde seg sjølv økonomisk, som 2) tok unna meir enn 200000 tonn stykkgods,
og som 3) samstundes er eit knutepunkt i det generelle samferdslemønsteret,
burde inngå i eit primærnett av viktige hamner. Av landets offentlege
hamner kom utvalet til at det var 14 hamner som oppfylte desse kriteria, og
som kunne få status som sentrale hamner.
Utvalet si utgreiing blei gjord
offentleg i NOU 1987:19 Norsk Havneplan. På bakgrunn av denne fremja
Fiskeridepartementet St.meld.nr.36 (1988-1989) Om Norsk havneplan, der
departementet i det vesentlege slutta seg til utvalet sine forslag.
Stortingets sjøfarts- og fiskerikomite handsama Norsk havneplan i
Innst.S.nr.126 (1989-1990). Komiteen var einig i utpeikinga av 14 sentrale
hamner. Av desse blei sju hamner peika ut som sentralhamner. Samstundes
meinte komiteen at dei resterande sju hamnene, blant dei også Ålesund, burde
handsamast i fylkesplansamanheng før deira status i hamneplanen blei endeleg
fastlagd.
Stortinget handsama saka i plenum den
3. april 1990, og det kom ikkje innvendingar mot komiteen sine meiningar.
Kystdirektoratet fekk i oktober 1993
eit brev frå Ålesund kommune om hamnas status som mogleg sentralhamn for
Nord-Vestlandet i Norsk hamneplan. I brevet blei det referert til at
Ålesund hamn av Møre og Romsdal fylkesting var peika ut som sentralhamn for
Nord-Vestlandet.
Eg er kjend med at det blir arbeidd
med opprusting og utbygging av hamna i Ålesund og med langtidsplanlegging
for transportsystem og infrastruktur i regionen.
Ålesund hamns status som sentralhamn i
Norsk havneplan er framleis til handsaming i Kystdirektoratet. Direktoratet
vil sjå Ålesund hamns komande status i ei meir samla vurdering. Det ligg
enno ikkje føre eit godt nok grunnlag for endeleg å kunne avklare saka i
Fiskeridepartementet.
Laila Kaland (A):
Eg vil takke
statsråden for svaret. Når den endelege avklaringa av saka no skal
handsamast av statsråden, vil eg be om ei positiv vurdering av dei
verknadene ein status som sentralhamn kan få for Ålesund hamn og for heile
Nord-Vestlandet.
Eg peikar i spørsmålet mitt på kva
Ålesund hamn kan ha å seie for eksport av fisk, fiskeprodukt og stykkgods.
I tillegg tilhøyrer vi også ein landsdel som årleg eksporterer varer til
EU-landa for 11-13 milliardar kr, så det er veldig viktig av vi har god
linefart mellom Noreg og Europa.
I tillegg til dette vil eg peike på
ein ting som sjøfart- og fiskerikomiteen var oppteken av, at måla i Norsk
havneplan er at ein skal byggje ut, planleggje og gjennomføre også ulike
typar av infrastruktur i eit område som peikar seg ut som sentralhamn.
Eg vil inderleg vone at denne saka
snart kan bli avklara også i Fiskeridepartementet. Ser ein på strekninga
mellom Bergen og Trondheim, så er det eit ganske langt område, der ikkje
noka hamn har sentralhamnfunksjon. Eg vonar difor at Ålesund hamn vil bli
vurdert i den samanhengen.
Statsråd Jan Henry T. Olsen:
Eg har
merka meg representanten Kaland si oppmoding om at eg ser med eit positivt
blikk på Ålesund hamn når vi no skal føreta ein gjennomgang. Dette arbeidet
pågår no i direktoratet hos oss, og eg vonar at vi kan få dette på bordet om
ikkje så lang tid, slik at vi får gjort ferdig vurderinga i
Fiskeridepartement på basis av det vurderingsgrunnlaget eg gjekk igjennom
her i stad.