May-Helen Molvær Grimstad (KrF):
Eg
vil stille følgjande spørsmål til samferdselsministeren:
Av trafikktryggleikgrunnar er det
påbode å sikre både born og vaksne i bil. Det er ikkje tilgang til sikring
i buss.
Når kan vi forvente at det blir påbode
med bilbelte i buss, og vil statsråden sørgje for at det blir tilgang til
sikringsutstyr som kan sikre små born i buss?
Statsråd Kjell Opseth:
Krav om
bilbelte på utsette plassar i turbuss vart gjort gjeldande i Noreg frå 1.
april 1994.
Eg ser det likevel som ønskjeleg å
sikre passasjerar i buss betre. Vegdirektoratet la av den grunn i 1993 fram
eit forslag om eit generelt påbod om bilbelte i turbussar. Framlegget kunne
likevel ikkje gjennomførast på grunn av EØS-avtalen.
Men EU-kommisjonen starta alt i mars
1994 eit arbeid med revisjon av bilbeltedirektivet til også å gjelde
topunkts bilbelte på alle sitjeplassar i bussar med ikkje ståande
passasjerar. Ein reknar no med at endeleg vedtak om dette vil liggje føre
ein gong i 1996-97. Endringa er EØS-relevant og vil bli gjennomført i norsk
rett.
May-Helen Molvær Grimstad (KrF):
Eg
vil takke statsråden for svaret.
Dagens krav om bilbelte på utsette
plassar i turbuss gjeld dessverre berre dei to fremste seta. Bruk av
bilbelte er eit effektivt sikringstiltak. Statsråden ønskjer å sikre
passasjerar i buss betre - og det er positivt - men viser til at EØS-avtalen
vil hindre oss i dette, og då med bakgrunn i tekniske kjøretøyføresegner.
Men EØS-avtalen gir oss generelt moglegheit til å ha strengare krav til
tryggleik enn det EU har. Ut frå ei politisk vurdering og ei vurdering av
tryggleiksomsyna meiner eg at vi burde ha nytta oss av denne retten og
påbode bruk av bilbelte i buss. På den måten kunne Noreg også ha vore eit
føregangsland. Mitt første spørsmål er: Vil statsråden gjere noko for å få
fortgang i saka? Og mitt andre spørsmål er: Når det blir innført krav om
bruk av belte i turbussar, kan ein då forvente at det blir tilgang til
godkjent barnesikringsutstyr. Etter forskrift om bruk av bilbelte er det
påbode at born under fire år skal bruke godkjent sikringsutstyr der det er
montert bilbelte.
Statsråd Kjell Opseth:
Eg vil berre
syne til at eg tidlegare har svart på dette spørsmålet. Grunngjevinga for å
følgje EU på dette området er at turbussnæringa er i konkurranse med landa
elles i Europa, og sånn sett er det mest formålstenleg at alle land i Europa
har same regelverk på dette området.
Når kravet om bilbelte på alle sete er
gjennomført, vil det også bli eit krav at barnesikringsutstyr er
tilgjengeleg for dei barna som skal ha slikt utstyr.
May-Helen Molvær Grimstad (KrF):
Eg
vil seie at tryggleik er viktigare enn omsynet til konkurranse. Nettopp
derfor har eg vore så opptatt av at dette hastar det å få gjennomført, og eg
kunne ønskt at statsråden ville gi eit signal om at han vil arbeide
offensivt for at dette raskast mogleg blir gjennomført.
Eg er glad for at statsråden seier at
når vi først får montert bilbelte, vil det også bli tilgang til
barnesikringsutstyr. I dag er det for mange som reiser, enklare og tryggare
å reise med bil der ein har barnesete, i staden for å reise med buss, der
det ikkje er tilgang til å feste borna i barnesete. Borna er disiplinerte
til å sitje fastspende i bil, men når dei køyrer med buss, vil dei ofte
helst stå eller gå rundt i bussen.
Eg vil vise til at i Storbritannia har
styresmaktene gjort framlegg om påbod om setebelte i skulebussar, og det
synest eg er veldig positivt. Korleis ser statsråden på det? Er det noko
som han synest vil vere interessant å oppmode om å få gjennomført?
Statsråd Kjell Opseth:
Eg vil igjen
peike på at om eit år eller kanskje godt det vil dette etter alle solemerke
vere ein regel i EU-samanheng, og eg ser ikkje nokon grunn til at vi skal
setje i gang med særeigne reglar på dette området før EU sine reglar er
kjende. Difor skal vi sørgje for å « pushe » på EU for å få dette direktivet
igjennom så fort råd er. Og så snart innhaldet i det er kjent, skal vi
leggje til rette for at dette blir innført i Noreg.