Magnhild Meltveit Kleppa (Sp):
Mitt
spørsmål til samferdselsministeren lyder slik:
Under valkampen i 1995 vart det kjent
at det låg føre planar frå postverket om å leggja ned 1.000 postkontor.
Arbeidarpartiet avviste dette og uttalte at det ikkje var aktuell politikk.
Styret i postverket har no vedteke nedlegging av om lag 900 postkontor.
Kva er statsråden sin bodskap i dag
til dei som i valkampen trudde på Arbeidarpartiet sine utsegner i denne
saka?
Statsråd Kjell Opseth:
Dei som trudde
på det Arbeidarpartiet sa om postverket under valkampen i 1995, kan framleis
ha tillit til partiet. Det låg ikkje føre planar om nedlegging av 1.000
postkontor i 1995. Det som like fullt var eit viktig poeng for meg gjennom
heile denne valkampen, slik det òg er i dag, var å sikre eit postverk som
kan gje posttenester over heile landet. Skal Posten også i framtida stå for
eit slikt landsdekkjande tilbod, må verksemda møte minkande inntekter og
trafikkbortfall med reduserte kostnader.
Eg lova ikkje varig vern av
postkontornettet under valkampen. Tvert imot, eg var sterkt opptatt av å få
fram det poenget at det kan vere god distriktspolitikk å byggje ned nettet
av postkontor for å gje Posten økonomisk ryggrad som gjer det mogleg å halde
oppe posttenestene i alle delar av landet.
Vi trygger ikkje posttenestene ved å
snu ryggen til det som skjer på dette området. Det er ikkje politikk for
framtida å seie at alt skal vere som det ein gong var, slik Senterpartiet
gjer.
Bruk av skranketenester ved
postkontora vil gå ned med over 40 % dei neste fire åra.
24 %, eller om lag 550 postkontor, har
ei opningstid på frå 30 minutt til fire timar. Om lag 1.500 postkontor
betener 250 eller færre husstandar. I snitt dreier det seg om 70 husstandar
pr. kontor, og prisen for å halde dette tilbodet oppe er om lag 7.000 kr pr.
husstand.
Skal vi bruke mellom ein og halvannan
milliard kroner ekstra for å halde oppe ei teneste som for mange er
dårlegare enn alternative løysingar? Gjer vi det, vil Posten snart vere
utkonkurrert på område der vi kan vente vekst, med dårlegare og dyrare
posttenester i distrikta som resultat.
Magnhild Meltveit Kleppa (Sp):
Eg
takkar for svaret og vil aller først seia at eg føler nok frå tid til anna
at Senterpartiet blir tillagt meiningar som partiet ikkje har. Det er jo
eit faktum at Senterpartiet både i og utanom regjering har vore med på å
leggja ned postkontor der det er fornuftig. Men i dag snakkar vi altså om
nedlegging i eit heilt anna omfang.
For fire-fem månader sidan, den 26.
august 1995, stod følgjande å lesa i Aftenposten:
Stortingsrepresentant
Solveig Torsvik fra Arbeiderpartiet sier at Postverket etter vedtak i Stortinget
nå gjennomgår dagens posttjenester. Det er meningsløst å spekulere i at det nå
skal legges ned over 1.000 postkontorer, sier Torsvik, som er Aps samferdselspolitiske
talskvinne.
Statsråden sa den 18. januar 1995 i
Stortinget:
Det
er ikkje planlagt noka storstila nedlegging av postkontor. Eg skjønar ikkje kor
representanten Myrvoll og andre i denne salen har fått det ifrå. Eg har prøvd
å tilbakevise det.
Er det slik at statsråden er
mangelfullt orientert om planlegging som går føre seg innafor hans eige
ansvarsområde?
Statsråd Kjell Opseth:
Berre for å slå
det fast ein gong til: Det låg ikkje føre nokon planar om å leggje ned 1.000
postkontor i 1995.
Det er slik at Senterpartiet også kan
tenkje seg å leggje ned postkontor, men igjen er det dei som sit med den
heile og fulle fornuft - kva for kontor og kor mange kontor som skal
leggjast ned. Dei som driv denne tenesta og på vegner av Stortinget og
Regjeringa er sette til å drive denne tenesta, har altså ikkje greie på kva
dette dreier seg om. Eg må seie at det er å gå relativt langt i å ha
detaljkunnskap om kva for tenester og kva måte Posten skal drive sine
tenester på.
Magnhild Meltveit Kleppa (Sp):
Dette
handlar om kva for eit servicenivå ein politisk meiner postverket i Noreg
skal ha, kva for ein del av infrastrukturen det skal ha. Det handlar om å
lytta til korleis kommunane ønskjer at posttenestene skal vera organiserte,
og det handlar om å lytta til brukarane. Men i tillegg handlar mitt
spørsmål om å stå ved det som ein uttalar. Eg stilte ikkje spørsmål om
talet på postkontor i 1995. Eg stilte spørsmål om det er slik at
Arbeidarpartiet ikkje lenger står ved korkje det som Solveig Torsvik sa i
august, eller det statsråden sa i januar i fjor. På kva grunnlag kan ein då
lita på det Arbeidarpartiet i dag gjev av løfte som gjeld framtida, f.eks.
det statsråden sjølv har sagt i dag, at han vil føra tilsyn med at
løysingane gjev ein servicegrad på dagens nivå.
Statsråd Kjell Opseth:
Eg skjøner det
er eit stort poeng for representanten Meltveit Kleppa å prøve å få
demonstrert at vi ikkje står ved noko vi har sagt. Eg står ved alt det eg
har sagt. Det har eg no gjentatt to gonger, men eg kan gjenta det ein gong
til. Det var ikkje nokon planar om å leggje ned 1.000 postkontor i 1995.
Det handlar om servicenivået. Eg har
no i fleire rundar - også her i dag - sagt at servicenivået skal haldast
oppe. Det har også postverket og postverket sitt styre med Eivind Reiten
som leiar sagt, men det stolar altså ikkje Senterpartiet og Meltveit Kleppa
på. Det får vi ta med oss.
Og så er det slik at dersom kommunane
vil halde oppe postkontor, står dei fritt til det. Det er berre å betale
det det kostar, så er det heilt sikkert at dei får halde oppe det kontoret.
Men eg kan ikkje skjøne kvifor kommunane skal bruke ressursar på å halde
oppe eit postkontor som etter kvart ikkje blir brukt. Det er jo det det
dreier seg om, men det er det Senterpartiet ikkje vil ta innover seg, fordi
det ikkje passar i deira politiske strategi.