Ingvald Godal (H):
Eg vil gjerne få
stille fylgjande spørsmål til olje- og energiministeren:
Det har lenge vore eit sterkt ynske om
å få gass i rørleidning til Austlandet, mellom anna til den store
industrikonsentrasjonen i Grenland, for å trygge verksemda der og for å
legge grunnlaget for nye impulsar for vekst. Spørsmålet om norske
gassleveransar til Sverige er på nytt aktuelt.
Vil statsråden prøve å løyse dette på
ein slik måte at det òg kan tene norsk industris langsiktige interesser,
ikkje minst i nemnde område, eller finne andre løysingar for ilandføring av
gass her?
Statsråd Ranveig Frøiland:
Moglegheitene for å transportera gass til Austlandet og nabolanda våre har
vore vurderte i over 25 år. Mellom anna i samband med det store
norsk-svenske gassprosjektet på slutten av 1980-talet vart det vurdert ei
rekkje alternative rørleidningar frå Nordsjøen og Midt-Noreg via Austlandet
til Sverige og eventuelt vidare til Finland.
Både styresmakter og kommersielle
aktørar har no eit omfattande bakgrunnsmateriale om desse spørsmåla, og
problemstillingane er velkjende.
Kostnadene ved å transportera gass
over så lange strekningar er store, og det må avsetjast store mengder gass
for å få så låge einingskostnader at slik transport kan forsvarast. Vi har
tilstrekkelege gassreservar, og GFU er klar til å inngå forhandlingar om sal
av gass. Men korkje i Grenland, på Austlandet eller i nabolanda våre finst
det kjøparar som er villige til å inngå forpliktande avtalar om å kjøpa så
store mengder gass at det gjev grunnlag for å byggje slike rørleidningar.
Situasjonen kan endra seg ved at
Danmark etter kvart får behov for å supplera sin eigen produksjon med import
av gass, og ved at dei politiske rammevilkåra i Sverige kan verta meir
gunstige for overgang til gass.
Med dagens kostnadsbilete er ein
rørleidning over Austlandet berre mogleg som ledd i ein større skandinavisk
plan. Avsetnadsmoglegheitene på Austlandet er ikkje store nok til å bera
kostnadene ved ein eigen rørleidning. Ein eventuell rørleidning må som sagt
byggja på salskontraktar for så store volum at investeringane kan
forsvarast. Det er GFU som har ansvaret for å forhandla om sal av gass frå
norsk sokkel. GFU er interessert i å selja gass både til Austlandet og til
nabolanda våre. Styresmaktene følgjer situasjonen og vil sjølvsagt vurdera
alle løysingar ut frå norske interesser.
Ingvald Godal (H):
Når me no er ein av
Europas største gassleverandørar, er det veldig synd at me skal halde fram
med å vera ein råvareprodusent, at me ikkje skal greie å få utnytta meir av
denne gassen til landbasert industri her i landet. Me er òg i den
situasjonen at me f.eks. i Grenland har industri som fort kan tørke inn
dersom det ikkje kjem nye impulsar. Det er tilfellet òg andre stader i
austlandsområdet, og eg synest det er rart at det ikkje skal gå an saman med
svenskane og danskane å få til ei løysing der me kan få eit nordisk gassnett
anten direkte frå Nordsjøen eller via Danmark og oppover svenskekysten.
Eg kunne ha lyst til å spørja
statsråden om kva ho legg i det ho seier om utviklinga i Danmark og i
Sverige, kva slags perspektiv og mogelegheiter ho ser her for at me kan få
realisert dette.
Statsråd Ranveig Frøiland:
Eg trur vi
må vera klare over at det aller meste av den gassen vi produserer, skal gå
til eksport. No er det omtrent 100 % som gjer det. Eg har sjølvsagt, som
mange andre, eit ønske om at vi kunne bruka litt meir på å gjera meir for
både industrien og transportsektoren i Noreg, men det er veldig store volum
som skal til for at det er forsvarleg å investera i ein rørleidning. Men eg
vil igjen seia at det er forhandlingar på gang med Danmark frå GFU si side
om kjøp av gass. Det å ha ein leidning inn til Danmark og la den gå vidare
oppover til Sverige vil jo då vera naturleg. Det er klart at den
situasjonen følgjer vi nøye, og vi er som Godal opptekne av å få til eit
nordisk gassnett. Det ville jo vera i alle si interesse.
Ingvald Godal (H):
I samband med
avviklinga av kjernekraft i Sverige ser me jo at dette med gass har vorte
meir aktuelt. Me kan òg sjå i media at svenskane, så vidt eg forstår,
vurderer om dei skal ta gassen frå oss eller frå Russland. Kan statsråden
seia noko nærare om denne situasjon. Det er jo tydeleg at svenskane er
interesserte? Dersom dette er eit spørsmål om forretningar, vil eg så sterkt
eg kan, oppmode den norske regjeringa om å vera veldig aktiv og syrgje for
at den løysinga som Sverige landar på, kan bli eit ledd i ei nordisk løysing
basert på norsk gass.
Statsråd Ranveig Frøiland:
Nordisk Råd
har jo for eit år sidan sagt at det er viktig at ein får eit nordisk
gassnett som òg kan forsyna Baltikum. Og eg er samd med Godal i at den
situasjonen ein no har i Sverige, der det snakk om å bruka meir gass, har
påkalla all vår interesse. Men vi må òg ha klart for auga at når ein er i
ein slik situasjon som Sverige og har moglegheiter til å få gassforsyning
frå to land, er det òg eit ledd i den økonomiske vurderinga - her er det
snakk om Russland, og det er snakk om Noreg. Men som sagt følgjer vi
situasjonen nøye, for vi ser òg moglegheita for å få til meir i nordisk
samanheng.