Åge Starheim (FrP) [12:47:11]: Eg ønskjer å stille følgjande
spørsmål til samferdselsministeren:
«På grunn av manglande planer/regulering
vert det ståande igjen ein vegparsell på ca. 1
km på rv. 61 Bryggja–Møre grense
med smal og svingete veg som ikkje vert rusta opp når
pågåande arbeid vert avslutta i løpet
av året. Dette vert ein flaskehals til stor byrde for brukarane.
Kva vil statsråden gjere for at igjenståande
vegparsell på rv. 61 Bryggja–Møre
grense snarast vert opprusta, utan at det går
ut over framdrifta for andre planlagde/påstarta veganlegg
i Sogn og Fjordane?»
Statsråd Liv Signe
Navarsete [12:47:57]: Utbetring av rv. 61 frå Møre
og Romsdal grense til Naveosen starta opp våren 2005 og
er venta avslutta til sommaren. Dette vil fullføre ein
del utbetringar som vart gjennomførte på 1990-talet.
Problemet på strekninga har i hovudsak vore svake
kantar og låg bereevne og i mindre grad den geometriske
utforminga. Kostnadsoverslaget er på 20 mill. kr. Det er
varsla kostnadsreduksjonar på strekninga.
For strekninga frå Naveosen til Bryggja
vart det utarbeidd ein detaljplan etter veglova i 1980.
Vågsøy kommune har nyleg bede Statens vegvesen
vurdere om denne planen er tilstrekkeleg plangrunnlag for å utbetre
strekninga. Hovudutval for samferdsle i Sogn og Fjordane har bede Statens
vegvesen om eit notat om utbetring av rv. 61. Det vart sendt til
dei i førre veke.
Strekninga frå Naveosen til Bryggja
er ikkje prioritert i handlingsprogrammet for øvrige
riksvegar i Sogn og Fjordane i perioden 2006–2009. Kostnadsreduksjonane på strekninga Møre
og Romsdal grense–Naveosen vil berre kunne finansiere
ein liten del av utbetringa frå Naveosen til
Bryggja. Eg vil i arbeidet mitt, her som elles, leggje avgjerande
vekt på prioriteringane til Vestlandsrådet og
Sogn og Fjordane fylkeskommune.
Åge Starheim (FrP) [12:49:18]: Eg takkar statsråden for svaret.
No er det vel slik at det var Stortinget sjølv
som tok initiativ til å få i
gang opprusting av det anlegget som ein held på med. Det
er litt trist om ein skal kome i den situasjonen
at ein opplever det same på dette anlegget som
ein gjorde på rv. 620 frå Kjøde til Årsheim,
der ein transporterte vekk over 100 000 kubikk masse som ein kunne brukt
på anlegget dersom ein hadde valt å køyre
bilane den andre vegen i staden for det ein valde. Etter
det som eg har registret, legg ein også ut overskotsmasse
på veganlegget på rv. 61 Bryggja–Møre
grense. Det ville vore interessant å høyre
om statsråden kunne tenkje seg at ein greidde å få ordna
det slik at ein kunne bruke denne overskotsmassen til å fylle
langsmed denne vegen. Det står ikkje
på spørsmålet om veggrunnen, for han
vart innløyst allereie i 1984.
Statsråd Liv Signe Navarsete [12:50:23]: Eg ber om forståing for at eg ikkje
kan gå inn i detaljspørsmål omkring dette
prosjektet, men det eg har fått opplyst, er at det ikkje
er reguleringsplan for strekninga mellom Naveosen og busetjinga
på Maurstad, altså Sollibakkane og Nore. Grunnen
til det er sjølvsagt at utarbeiding av reguleringsplan
har vore uaktuelt frå Vegvesenet si side, ettersom
utbetring av strekninga ikkje har lege inne
i handlingsprogrammet. Ein slik reguleringsplan vil det ta om lag
eitt år å utarbeide.
Så er det sjølvsagt ingen
ting i vegen for at ein i samarbeid med vegkontoret
lokalt vurderer den typen løysingar som Starheim etterlyser.
Det er eit spørsmål som det ikkje er
mogleg for meg å gå inn og svare konkret
på frå min stad her. Eg kjenner ikkje
prosjektet slik i detalj.
Åge Starheim (FrP) [12:51:21]: Eg takkar på nytt for svaret frå statsråden.
Det som eg håpar og ber om, er at
ein kan vere villig til å ta eit initiativ
slik at ein kan leggje overskotsmasse langs vegstrekninga som no
vert ståande igjen. I og med at ein er eigar av grunnen,
burde det kunne la seg gjere, i staden for at ein gjer som på anlegget
Kjøde–Årsheim, transporterer vekk brukbar
fyllmasse som ein ikkje kan ta igjen. Eg ber derfor om
at statsråden bruker sine posisjonar og sine
kanalar til å påverke at ein får gjort
dette, for det vil i neste omgang kunne bety at ein får
eit mykje billegare anlegg enn det som ein vil få om ein
skal starte utan noko som helst.
Statsråd Liv Signe Navarsete [12:52:21]: Det er alltid hyggjeleg med tillit, og det
er hyggjeleg å få lyfta inn at eg som statsråd
kan bruke den makta eg har på ulike område,
ikkje minst i heimfylket og på prosjekt som eg sjølvsagt
vil vere med på å lyfte. Eg må likevel, same
kva fylke og strekning det dreier seg om, halde meg til
dei planane som ligg føre, og dei prosedyrane som vi har å halde oss
til.
Strekninga frå brua ved Naveosen til
Maurstad er tung og krevjande, etter det eg har fått
opplyst, og vil krevje store inngrep. Eg kjenner ikkje
til om ei slik mellomlagring rett og slett er mogleg, og kor lang
tid det då vil ta å få gjort denne vegstrekninga
ferdig. Det vil vere heilt avhengig av korleis Sogn og
Fjordane fylkesting prioriterer denne strekninga når dei
no på nytt skal inn og vurdere dei resterande riksvegmidlane.
Så dette er ein prosess der ikkje minst fylkeskommunen
er ein viktig part, som må vere i dialog
med kommunen og vegkontoret om ein vil finne ei løysing
på dette.