Nils T. Bjørke (Sp) [10:02:32 ] : Presidentskapet fremjar i
innstillinga forslag til ny leiar og to andre medlemer i Stortingets
ansvarskommisjon. Ansvarskommisjonen er eit uavhengig særorgan på
fem medlemer som Stortinget kan be om å innleia gransking for å kartleggja
om det er grunnlag for å gjera konstitusjonelt ansvar gjeldande
mot nokon for riksretten. Sidan kommisjonen vart oppretta i 2007,
har han ikkje fått nokon saker til handsaming, men er like fullt
ein viktig beredskap for det tilfellet at det skulle koma ei sak
dit frå Stortinget.
Tre av ansvarskommisjonen
sine medlemer er i år på val. Desse er leiaren for utvalet, professor
dr.juris Erling J. Husabø, og medlemene advokat Svein Holden og avdelingsleiar
Gunn Karin Gjul. Dei to medlemene som ikkje er på val, er tidlegare
politietterforskar Kristen Ribe og advokat Marianne Abeler, som
begge er valde fram til 1. juni 2022.
Husabø har vore
leiar av kommisjonen heilt sidan oppstarten, i to seksårsperiodar.
Holden og Gjul har begge vore medlemer av kommisjonen i éin seksårsperiode.
Presidentskapet gjer framlegg om at Gjul og Holden vert gjenoppnemnde
for ein ny seksårsperiode. Vidare gjer presidentskapet framlegg
om at professor dr.juris Asbjørn Strandbakken vert oppnemnd som
ny leiar. Professor Strandbakken held, som noverande leiar, til
ved det juridiske fakultetet i Bergen og har sitt virke innan m.a.
strafferetten.
Med desse framlegga
vert den etterforskings- og påtalekompetansen som har vore representert
i kommisjonen til no, ført vidare. Ein held også på ei breidde i bakgrunnen
til medlemene, når det gjeld både kompetanse, kjønn og geografisk
tilhøyring.