Liv Signe Navarsete (Sp): Kvifor er ikkje alternativet frå SVV si aust-vest-utgreiing med høgast samfunnsøkonomisk nytte, Rv 7/Hordalandsdiagonalen, med i KVU-utgreiinga SVV no arbeider med for strekninga Gol-Voss, og vil statsråden sjå til at det vert utarbeidd eit alternativ for Rv 7 i kombinasjon med Hordalandsdiagonalen slik at statsråden får ei sak som er skikkeleg opplyst før ein tek avgjerd i NTP 2018-29?
Begrunnelse
Då Statens Vegvesen la fram si aust-vest-utgreiing hausten 2015 var det eitt alternativ som viste seg å ha langt høgare samfunnsøkonomisk nytte enn dei andre, nemleg kombinasjonen Rv 52 og Hordalandsdiagonalen.
Til mange si overrasking vart det ikkje lagt fram noko alternativ der Hordalandsdiagonalen er inkludert på Statens Vegvesen sitt møte om KVU-arbeidet Gol-Voss i Ullensvang 20.06 d.å. Statsråden og regjeringa har vore svært tydeleg på at samfunnsøkonomisk nytte skal styre samferdselsprioriteringane i mykje større grad enn tidlegare. Det viser att i mandatet etatane fekk i sitt arbeid, og deira tilrådingar til NTP der det er lite nye prosjekt i distrikt med spreidd busetnad.
I dette biletet vert det underleg at det alternativet som utan tvil gir ein langt høgare samfunnsøkonomisk nytte enn alle andre alternativ, nemleg Rv 52 i kombinasjon med Hordalandsdiagonalen, ikkje vert utgreidd vidare. Det er viktig å få avklara om det er statsråden som har nekta SVV å ta med dette alternativet, og i så fall kvifor. Sjølv om KVU-oppdraget femner om strekninga God-Voss strir det mot all sunn fornuft å utlukke eit alternativ som gir så høg samfunnsnytte.