Begrunnelse

Saka handlar om at det er langt lettare å få norske fartssyndarar til å betale enn utanlandske sjåførar som bryt fartsgrensene.
Politiet viser til at dei ikkje har noko felles register over utanlandske køyretøy, og at dei ikkje får forfølgt sakene mot dei utanlandske fartssyndarane som har pådratt seg bøter. Sakene blir såleis berre ståande og hope seg opp i systemet, og det er grunn til å tru at nokon bruker dette til eigen fordel. Det må vera eit klårt politisk mål å ha eit system som unngår at utanlandske transportørar kan få ein konkurransefordel ved at dei kan gi blaffen i fartsbøter og såleis koma raskare fram i trafikken. For trafikksikkerheita sin del er det dessutan grunnleggjande viktig at ikkje éi gruppe sjåførar kan bryte fartsgrensene utan særleg økonomisk risiko. Eg meiner det må finnast ein måte å løyse dette problemet på, og håpar samferdselsministeren kan ta snarleg grep.