Skriftlig spørsmål fra Andreas Sjalg Unneland (SV) til justis- og beredskapsministeren

Spørsmål

Andreas Sjalg Unneland (SV): Kva gjer justisministeren for å trygga norskiranarar og sikra ytringsfridommen deira?

Begrunnelse

Gjentekne gonger rapporterer norskiranarar om kjensla av å bli overvaka av representantar for iranske styresmakter i Noreg. Frykta for represaliar mot seg sjølv eller familiemedlemmer som bur i Iran gjer at mange kvir seg for å delta i møte og demonstrasjonar eller ytra seg på sosiale og redaksjonelle medium. Slik vert iransk etterretning ein trussel mot ytringsfridomen til norske statsborgarar med iransk opphav.

Svar

Emilie Mehl: Alle som bur i Noreg skal vere trygge. Det er ei hovudprioritering for regjeringa at folk i Noreg skal kunne kjenne seg trygge i kvardagen sin, uavhengig av kven dei er eller kvar dei bur. Trugsmål mot norske innbyggjarar frå representantar for framande statar er noko eg ser svært alvorleg på. Fleire departement jobbar saman for å førebyggje og motverke ulike former for ulovleg press og forsøk på kontroll frå framande statar mot norske innbyggjarar. Både Politiets tryggingsteneste og politiet elles søkjer å førebyggje og etterforske lovbrot som folk i Noreg vert utsette for.
Ytringsfridom er ein heilt grunnleggjande rett og verdi i Noreg. Det er svært viktig at det er mogleg for dei som ynskjer det, å delta i det offentlege rommet og det offentlege ordskiftet utan frykt for vald eller trugsmål. Dette gjeld sjølvsagt alle som bur i Noreg. Ved samankomstar og demonstrasjonar syt politiet for å sikre ro, orden og tryggleik.
For at Politiets tryggingsteneste og politiet elles skal kunne gjere jobben sin er det viktig at dei som opplever at dei vert overvaka eller pressa av framande statar i Noreg, melder frå til politiet. Eg oppmodar difor dei som kjenner seg utsett for slik aktivitet, til å melde frå.

Stortinget.no

Skriftlig spørsmål fra Andreas Sjalg Unneland (SV) til justis- og beredskapsministeren

Spørsmål

Begrunnelse

Svar