Spørsmål

Fredric Holen Bjørdal (A): Eg viser til mitt førre spørsmål til statsråden om temaet, og spør på nytt:
I lys av nye rutekutt på strekninga Ørsta/Volda-Oslo, vil regjeringa no gjeninnføre statleg kjøp eller ta andre grep for å betre situasjonen, eller vil ein akseptere at rutetilbodet for privatpersonar og næringsliv i ein viktig region blir stadig dårlegare?

Begrunnelse

Eg viser til Dokument nr. 15:996 (2019-2020). Widerøe har varsla nye rutekutt i pressemelding 19.august, desse kutta skal gjelde frå 1.oktober.

Svar

Knut Arild Hareide: Luftfarten er no inne i ei svært krevjande periode som følge av covid-19-situasjonen. Etterspørselen etter personreiser med fly har falle betydeleg, i tråd med blant anna helsefaglege råd om redusert reiseaktivitet. I denne perioden har regjeringa sørgt for å oppretthalde eit minstetilbod av flyruter, på strekningar kor det midlertidig ikkje har vore grunnlag for kommersiell drift. Flyruta Ørsta/Volda–Oslo har vore inkludert i det statleg støtta minstetilbodet.
Samferdselsdepartementet sine inneverande avtaler med flyselskapa endar 30. september. Samstundes ser vi ei usikker marknadssituasjon også i tida som kjem. Eg har registrert at Widerøe denne uka har varsla kutt i sitt tilbod frå 1.oktober. Tilbudet på kortbanenettet er svært viktig for folk i distriktane og er mange plasser som kollektivtilbod å rekne. Eit for dårleg tilbod på desse strekningane bekymrer meg. Regjeringa vurderer derfor fortløpande kva for tiltak og verkemiddel som er best eigna for å sikre eit godt regionalt og nasjonalt flytilbod, både i næraste framtid og på lengre sikt.