Skriftlig spørsmål fra Alfred Jens Bjørlo (V) til næringsministeren

Dokument nr. 15:1884 (2021-2022)
Innlevert: 22.04.2022
Sendt: 22.04.2022
Besvart: 29.04.2022 av næringsminister Jan Christian Vestre

Alfred Jens Bjørlo (V)

Spørsmål

Alfred Jens Bjørlo (V): Kan næringsministeren gi ei nærare orientering i innhaldet i avtalene regjeringa har inngått om industrielle partnerskap med blant andre EU og Tyskland for å posisjonere norske leverandører betre inn mot dei enorme marknadsmulegheitene som ligg i det grøne skiftet i Europa?

Begrunnelse

Næringsministeren skreiv følgande på regjeringa si nettside onsdag 20. april: - Regjeringen har inngått industrielle partnerskap med blant andre EU og Tyskland for å posisjonere norske leverandører bedre inn mot de enorme markedsmulighetene som ligger i det grønne skiftet i Europa.
Næringsministeren la også tilsvarande informasjon ut på sin Instagram-konto om alle dei fantastiske resultata han og regjeringa har oppnådd i løpet av sine fyrste seks månader:

«Inngått industrielle partnerskap med EU og Tyskland som kan åpne enorme markedsmuligheter for norske bedrifter i det grønne skiftet.»

Eg håpar det er råd å få vite meir om innhaldet i desse avtalen – også om kva tidspunkt dei vil gjelde frå og om dette er avtaler Regjeringa også vil informere Stortinget om på eigna måte. Dersom avtalen omfattar havvind, er det ynskjeleg å få vite kva signal har regjeringa gitt om påkobling av norsk havvindutbygging til det europeiske kraftnettet for å nå målet om å «..posisjonere norske leverandører bedre inn mot de enorme markedsmulighetene som ligger i det grønne skiftet i Europa.»

Jan Christian Vestre (A)

Svar

Jan Christian Vestre: Regjeringa har i Hurdalsplattforma slått fast at vi vil «videreføre Norges klimasamarbeid med EU og videreutvikle samarbeidet til å inkludere et strategisk industripartnerskap som styrker norske muligheter til å skape arbeidsplasser i hele Norge». Basert på dette tok statsministeren initiativ til eit forsterka samarbeid med Europakommisjonen om fornybar energi og grøn industri under sitt besøk til Brussel 23. februar 2022. Etter møtet med president von der Leyen og visepresident Timmermans vart det gitt ut ei felles politisk erklæring der begge partar stadfesta at dei skal samarbeide tettare om klima og grøn omstilling av økonomien. Ulike sektorar som hydrogen, havvind, CCS, mineral, batteri og grøn skipsfart vart spesielt nemnd. Besøket til Brussel 23. februar stadfesta at interessa frå EU si side er stor, knytt til mellom anna energi og nye område som mineral, kritiske råmaterial og batteri – som er kritiske for grøn omstilling. Situasjonen i Ukraina synast å ha forsterka EU si interesse ytterlegare.
Den 29. mars 2022 vart det gjennomført eit møte på embetsnivå mellom Europakommisjonen og Nærings- og fiskeridepartementet, Olje- og energidepartementet, Klima- og miljødepartementet og Utenriksdepartementet. Følgjande tema vart diskutert: råmateriale og mineral, batteri, CCS, havvind og hydrogen.
I samanheng med besøket til Brussel 23. februar 2022 vart det gjennomført eit næringslivsseminar om batteri og om hydrogen. Som oppfølging blei det gjennomført eit seminar om grøn skipsfart i Brussel 17. mars 2022, og det er planer om ei rekke konferansar i Brussel framover.
Regjeringa har òg teke initiativ til eit utvida samarbeid med Tyskland, vår viktigaste handelspartnar i EU. Då statsministeren møtte forbundskanslar Scholz 19. januar 2022 blei dei samde om at ein skal inngå ein strukturert dialog om energi og industriell omstilling. Denne semja blei følgt opp i møtet statsministeren, olje- og energiministeren og meg sjølv hadde med Tyskland sin visekanslar og nærings- og klimaminister Habeck 16. mars 2022. Etter møtet blei det gitt ut ei felles erklæring, der Noreg og Tyskland slår fast at vi skal styrkje vårt samarbeid innanfor energi, klima og industriell omstilling. Spesifikke sektorar som hydrogen, havvind, batteri og grøn skipsfart er òg nemnde i dette dokumentet.
På eit politisk nivå er Noreg altså samde med EU og Tyskland om å samarbeide tettare på ei rekke område som blir svært viktige for norsk næringsliv framover. «Strategisk grønt industrielt partnarskap» er eit overordna omgrep som kan bli brukt om denne typen politiske einigheiter, og det er ikkje gitt at det vil bli underteikna nokon eigen avtale eller traktat om dette. Det sentrale for Regjeringa er å byggje vidare på semja med EU og Tyskland, slik at vi utnyttar momentet i dei to prosessane. Vi arbeider no parallelt med desse for å etablere ein regelmessig politisk dialog og for å bli einige om dei fyrste konkrete stega i samarbeidet.
Det synest å være stor vilje frå alle partar om få dette på plass.
Framover er det behov for tett kontakt med både EU og Tyskland. For å følgje opp møtet med Europakommisjonen i mars, skal eg til Brussel 11. og 12. mai for samtalar med vise-president Šefčovič og kommissær Breton. Eg skal mellom anna også møte sjefen i EIT InnoEnergy, Diego Pavia, for å diskutere eventuell norsk deltaking i batterialliansen.
Prosessen med EU har eg gjort greie for i Stortingets Europautvalg 28. april 2022. Vi har òg diskusjonar på embetsnivå med Tyskland om kva som skal være dei første konkrete områda vi skal samarbeide om. Vi vil følgje opp på politisk nivå så raskt ein har kome litt vidare i prosessen.
På energifeltet har Noreg allereie eit svært tett samarbeid med både EU og Tyskland. Det forsterka samarbeidet det er tale om her vil ikkje erstatte dette, men heller søke å byggje vidare på og utfylle dette og andre eksisterande prosessar. Det er ikkje gitt nokon signal om påkobling av norsk havvindutbygging til det europeiske kraftnettet.
Det er altså eit stort engasjement frå begge sider for denne partnarskapen og vi er inne i eit godt spor. Vi vil nytte dette engasjementet for å kontinuerleg fylle den industrielle partnarskapen vår med EU med meir innhald og fleire tiltak. Det er denne regjeringa sin prioritet å føre ein aktiv Europapolitikk som inneber at norske interesser blir varetekne. Vi ser at denne politikken fungerer: Noreg vart invitert til eit ministermøte i den europeiske batterialliansen i EU i februar i år. Det har ikkje skjedd før.
Eg meinar desse initiativa knytta til den grøne omstillinga vil bidra til å gi store moglegheiter for norske verksemder i framtida.