Majestehtat,

Gonagaslaš Allavuođat,

Dronnet Sonja,

Ekselleanssat,

Gudnejahtton guossit,

 

Mii leat čoagganan dás odne dahkat maŋimuš earu Gonagas Harald viđádiin.

 

Mii leat čoagganan muittašit.

 

Muhtumiidda leat báhcán čiekŋalis, lagas muittut: isidia, áhči, ádjá, vielja dahje edno. 

 

Earáide leat muittut čadnon deaivvademiide gonagasain. Unna ja stuorra báikkiin miehtá riikka. 

 

Ilus ja morrašis. 

 

Morašdilis mii dadjat ahte sánit eai leat doarvái.

 

Muhto muhtumin sánit sáhttet mearkkašit olu. 

 

Mii leat máŋggas geat eat vajálduhte go Gonagas Harald deaivvadii ovddeš mánáidruoktománáin Christer Modiniin. 

 

Christeris lei váttes bajásšaddan, ja ollesolmmožin son gárttai garra eallindillái, gárrenmirkkuiguin.

 

Gonagas Harald deaivvai su vuollegašvuođain ja liekkusvuođain. 

 

Christer dajai ieš ahte dát deaivvadeapmi rievdadii su eallima: «Dadjen gonagassii ahte háliidan álggahit ođđa ja buoret eallima.

 

In mun han sáhttán gonagassii gielistit.»

 

Son bargagođii heaitit gárrenmirkkuiguin.

 

Gonagas Harald oinnii olbmuid. 

 

Ii dušše sin geain leat dehálaš ámmáhat, muhto olbmuid su ovddabealde.

 

Ja erenoamážit sin, geat dárbbašedje dan eanemusat. 

 

Ođđajagisártnistis 2008:s son dajai:

 

«Sávašin ahte mii heaitit geavaheames sániid ‘servodaga hearkkimusat’. Duohtavuođas leat muhtumat sis dat nannosepmosat min gaskkas.»

 

Gonagas Harald lei lahka olbmuid. Ja son lei son ieš. 

 

Ii son ballan deaivvadeames olbmuiguin, gummestevvelat juolggis.

 

Stuorradikki bealis ja Norgga álbmoga bealis háliidan giitit Gonagas Haralda das, movt son doaimmahii iežas doaimma. 

 

Son ollašuhtii dovdocealkagis: Son attii buot Norgga ovdii. 

 

Massin lea stuorimus lagamuččaide. 

 

Nu go gonagasbearaš lea álo leamaš dás min dihte, de mii háliidit dál leahkit dás din dihte.

 

Sávan ahte gávnnašeiddet jeđđehusa vissisvuođas, ahte dán háve mii oaidnit din.

 

Ráfi lehkos Gonagas Haralda muittuin.