Komitéfleirtalet, medlemene frå Arbeidarpartiet, Sigrun Eng, William Engseth, Ulf Guttormsen, Gunnar Halvorsen, Inger Lise Husøy, Astrid Marie Nistad og Einar Olav Skogholt, frå Senterpartiet, Peter Angelsen, Syver Berge og Unn Aarrestad, frå Høgre, leiaren, Kristin Krohn Devold og Dag C Weberg, frå Kristeleg Folkeparti, Lars Gunnar Lie, og frå Framstegspartiet, Øystein Hedstrøm, har merka seg at proposisjonen fremmer endringar i lovverket som tidlegare varsla i St.meld. nr. 45 (1990-1991) Om skipsfarten og tryggleik til sjøs. Dagens lovverk forpliktar norskeigde skip å bli innført i eit norsk register, ei ordning utan praktisk verknad etter omlegginga av skipsfartspolitikken på 80-talet.
Fleirtalet seier seg samd i endringa i lova ut i frå ynsket om eit lovverk for skipsfarten som er i tråd med den politikk Noreg fører.
Komitémedlemen frå Sosialistisk Venstreparti, Reidar Johansen, viser til tidlegare innstillingar til Stortinget om norsk skipsfartspolitikk, m.a. Innst.S.nr.193 (1990-1991), jf. St.meld. nr. 45 (1990-1991). Denne medlemen viser til Sosialistisk Venstreparti si haldning til den liberalisering norsk skipsfart har gått gjennom dei siste to tiåra. Dei forslag som Regjeringa legg fram i Ot.prp. nr. 62 (1994-1995) er ei vidareføring av denne liberaliseringa.
Denne medlemen vil vise til følgjande uttale i proposisjonen:
|
« Den allmenne plikta til å føra eit norsk eigd skip inn i eit norsk register har ikkje lenger nokon praktisk verknad. Dette fordi ein gjev fritak frå plikta til alle som søkjer om dispensasjon, noko som er ei følgje av at ein ikkje lenger krev at særskilde vilkår må vere oppfylde for å gje dispensasjon. » |
Denne medlemen er av den oppfatning at dette dokumenterer at ulike regjeringar over tid har stått for ein praksis som har undergrave det gjeldande lov- og regelverk. No har det ikkje lenger « nokon praktisk verknad » og ein kan like godt fjerne dette lovverket. Denne medlemen viser i denne samanhengen til utsegnene frå Norsk Sjømannsforbund og LO og sluttar seg i hovudsak til desse. Denne medlemen vil gå mot Regjeringa sine framlegg til lovendringar og stemme mot forslaget.