Kredittmeldinga 2008 omhandlar følgjande tema:
Kapittel 2 handlar om føresetnadene for, og
utsiktene til, finansiell stabilitet i Noreg. Under dette er risikoane
på dei norske finansmarknadene omtala, og likeins utviklinga innanfor
dei norske finansinstitusjonane. Kapittel 3 handlar om hovudtrekka
i regelverksutviklinga, og dei viktigaste løyvesakene som Finansdepartementet
og Kredittilsynet behandla på finansmarknadsområdet i 2008.
Kapittel 4 omtalar verksemda til Noregs Bank
i 2008, og inneheld mellom anna ei vurdering av utøvinga av pengepolitikken.
Omtala av verksemda til Noregs Bank er lovpålagd, jf. sentralbanklova
§ 30. Kapittel 5 inneheld ei omtale av verksemda til Kredittilsynet
i 2008. Omtala i kapittel 4 og 5 byggjer i stor mon på årsmeldingane frå
institusjonane. Kapittel 6 omtalar verksemda til Det internasjonale
valutafondet. Årsmeldingane frå Noregs Bank og Kredittilsynet for
2008 følgjer som utrykte vedlegg til meldinga.
Komiteen, medlemene frå Arbeidarpartiet,
Alf E. Jakobsen, Rolf Terje Klungland, Torgeir Micaelsen, leiaren Reidar
Sandal, Eirin Kristin Sund og Marianne Aasen, frå Framstegspartiet, Gjermund
Hagesæter, Ulf Leirstein, Peter N. Myhre og Jørund Rytman, frå Høgre,
Svein Flåtten, Linda C. Hofstad Helleland og Jan Tore Sanner, frå
Sosialistisk Venstreparti, Magnar Lund Bergo og Heikki Holmås, frå
Kristeleg Folkeparti, Hans Olav Syversen, frå Senterpartiet, Per
Olaf Lundteigen, og frå Venstre, Lars Sponheim, viser til
at høyring med sentralbanksjef Svein Gjedrem blei halden torsdag
14. mai. Referat frå høyringa følgjer som vedlegg til denne innstillinga.