Det Antigua Barbuda-registrerte containerskipet «Godafoss»
grunnstøytte om lag klokka 20.00, torsdag 17. februar 2011, på Kvernskjær,
mellom Asmaløy og Kirkøy i Hvaler i Østfold. Skipet hadde truleg
rundt 800 tonn tungolje om bord ved grunnstøytinga. Det vart registrert
lekkasje i to tankar midtskips, kvar med 265 tonn olje.
Som følgje av omfanget av hendinga vart det
i løpet av kvelden same døgn sett i verk ein statleg aksjon i regi
av Kystverket.
Etter forurensningsloven er det forureinar som
er ansvarleg for kostnadene knytt til avgrensing og opprensking
etter oljesøl. Det vil derfor bli kravd refusjon for dei samla kostnadene
ved oljevernaksjonen overfor ansvarleg forureinar. Etter føresegnene
i sjøloven kan likevel ansvaret avgrensast. Kystverket sine førebelse
utrekningar viser at ansvarsavgrensingsbeløpet for «Godafoss» er
om lag 430 mill. kroner.
Statsbudsjettet kap. 1062 post 21 Spesielle
driftsutgifter skal dekkje utgifter til mindre aksjonar knytt til
akutt forureining. Løyvinga er i saldert budsjett 2011 sett til
194,35 mill. kroner.
Dei årlege budsjetta tek ikkje høgd for kostnader til
større oljevernaksjonar som den som vi har hatt i Hvaler.
I kongeleg resolusjon av 25. februar 2011 fekk Fiskeri-
og kystdepartementet fullmakt til å overskride løyvinga for 2011
under kap. 1062 post 21 med inntil 110 mill. kroner. Det vart lagt til
grunn at Kystverket dermed fekk dei nødvendige midlane til å dekkje
aksjonskostnadene fram til det var mogleg å få ei oversikt over
omfanget av aksjonen. Det vart vidare lagt til grunn at når ei slik
vurdering låg føre, skulle saka fremmast for Stortinget.
Basert på siste prognose frå midten av mars
2011 står det att rundt 33 mill. kroner av overskridingsfullmakta
på 110 mill. kroner gitt i kongeleg resolusjon av 25. februar 2011.
Basert på Kystverket si nåverande vurdering av situasjonen ser det
ut til at midlane som er igjen er tilstrekkelege for å sluttføre
operasjonen. Dersom det seinare skulle vise seg å bli behov for
ytterlegare løyvingar til aksjonen, vil regjeringa komme tilbake
til Stortinget med dette på eigna måte.
Med bakgrunn i dette vert det foreslått å auke kap.
1062 post 21 med 110 mill. kroner i 2011 knytt til dekning av utgifter
til aksjonen etter Godafoss-grunnstøytinga.