Departementet legg fram forslag om innføring av
elektronisk skattekort. Forslaget inneber endringar i skattebetalingslova
og likningslova. Forslaget er meint å skape forenklingar for arbeidsgivar,
skattytar og skatteetaten, og er eit ledd i regjeringa si satsing
på forenklingar for næringslivet og digitalt førsteval. Departementet foreslår
endringar i måten skattekorta blir distribuert og handsama på, ved
gjennomføring av forskotstrekk for personlege skattytarar. Forslaget
inneber ikkje endringar i sjølve forskotsskattesystemet.
Departementet foreslår at arbeidsgivar får ei plikt
til å innhente skattekort for sine tilsette direkte frå skatteetaten.
Det foreslåast at skattekontora si plikt til å skrive ut og sende
skattekort og frikort til skatt-ytarar, endrast slik at skattekontora
etter den nye ordninga utstedar skattekort og gjer desse tilgjengelege
for arbeidsgivarane elektronisk. Departementet foreslår at skattytar si
plikt til å levere skattekort til arbeidsgivar blir oppheva, og
at skattytar får innsynsrett i eigne skattekortopplysningar. I tillegg
foreslår departementet fleire omgrepsendringar for å tilpasse regelverket
til den nye ordninga.
Departementet foreslår at ordninga blir ei frivillig
prøveordning i 2013, med full iverksetjing frå 2014.
Elektronisk skattekort kan på sikt gi vesentlege innsparingar
for skatteetaten i form av reduserte kostnader til trykking og distribusjon
som ei følgje av at ein legg til rette for elektronisk distribusjon
til skattytar i staden for distribusjon på papir. Etaten sine samla
kostnader til trykking og utsending av skattekort er i dag om lag
22,5 mill. kroner årleg. Med dagens del eAktørar (20 pst.) vil ordninga
frå 2014 kunne gi ei årleg innsparing på om lag 4,5 mill. kroner,
dersom ein føreset at skattetrekksmelding blir sendt elektronisk. Dersom
den delen som er eAktørar aukar, vil innsparingane auke tilsvarande.
Ordninga medfører investeringskostnader på i underkant
av 20 mill. kroner og om lag 10 mill. kroner til informasjonstiltak
ved innføringa. I tillegg kjem driftsutgifter på i overkant av 3
mill. kroner årleg. Kostnadsramma til prosjektet er 30,4 mill. kroner
for perioden 2012–2014. I statsbudsjettet for 2012 er det løyvt
15 mill. kroner til utviklingsarbeidet.
Departementet merker seg at dei fleste av høyringsinstansane
støttar forslaget om ei frivillig prøveordning i 2013 og iverksetjing
i 2014. Departementet foreslår at reglar for prøveåret blir gitt
i eigen forskrift, og at endringane som er foreslått i skattebetalingslova
og likningslova tek til å gjelde straks, med verknad frå og med inntektsåret
2014.
Komiteen slutter seg
til regjeringens forslag.