Det blir i dokumentet fremja følgjande forslag:
«1. Stortinget ber regjeringa
sørgje for at vesentlege endringar i sjukehusstruktur og sjukehusoppgåver–
spesielt endringar i eksisterande føde- og akuttberedskap – blir
avgjort av Stortinget i nasjonal helse- og sjukehusplan.
2. Stortinget ber regjeringa sørgje for
at store sjukehusinvesteringar blir avgjort av Stortinget i nasjonal
helse- og sjukehusplan.»
Forslagsstillarane understrekar at det er eit
offentleg ansvar å gje alle eit likeverdig tilbod av helsetenester
uavhengig av diagnose, bustad eller personleg økonomi. Dei meiner
at forankring av sjukehuspolitikken i Stortinget, tydeleggjering
av regjeringa sitt ansvar og styrking av den lokale, politiske innflytelsen
er vesentleg for å skape openheit, debatt, aksept og demokratisk forankring
av dei avgjersler som blir gjort, og dei helsetenestene som blir
tilbydd. Det blir uttala at det er viktig at sjukehusutbygging og
funksjonsfordeling mellom sjukehus skjer etter ein overordna plan,
der nasjonale myndigheiter gjev klare retningsliner for kva oppgåver
dei ulike sjukehusa skal ha.
Forslagsstillarane ser fram til framlegging
av nasjonal helse- og sjukehusplan og meiner at denne planen må
rullerast kvart fjerde år. Dei meiner sjukehusplanen må avklare
sjukehusstruktur, geografisk plassering, gjere greie for nasjonale,
regionale og lokale funksjonar ved dei einskilde sjukehusa og tydeleggjere
oppgåvefordelinga mellom dei ulike nivåa i helsetenesta. Dei meiner
vidare at planen må gje ei oversikt over økonomiske verkemiddel,
organisering og investeringsbehov i sjukehussektoren og i tillegg omhandle
krav til beredskap, kva basisfunksjonar alle sjukehus skal ha, og
ein overordna fagleg-politisk analyse av stordriftsfordeler/ulemper
ved investering i nye sjukehus og ved sjukehusfusjonar.
Forslagsstillarane meiner at viktige saker som
til dømes endringar i fødetilbod og akuttberedskap ikkje skal kunne
vedtakast av helseføretaka, men av Stortinget i den komande nasjonale
helse- og sjukehusplanen.
Forslagsstillarane viser til at mange føretak
har på høyring strategiplanar med sikte på endeleg vedtak innan
relativt kort tid, og dei meiner det er svært uheldig om store struktur-
og oppgåveendringar skjer samstundes som Helse- og omsorgsdepartementet
utarbeider ein styrande nasjonal helse- og sjukehusplan. Forslagsstillarane
meiner at pågåande og planlagde omstillingar av vesentleg karakter
skal bli behandla av Stortinget i den varsla helse- og sjukehusplanen.