Miljøverndepartementet foreslår i proposisjonen ny
lov om eigedomsregistrering, som skal avløyse lov 23. juni
1978 nr. 70 om kartlegging, deling og registrering av grunneiendom
(delingsloven) og lov 9. juli 1923 nr. 1 om anbringelse
av signaler og merker for målearbeider. Det foreslås
i tillegg tilpassingar i ei rekkje andre lovar.
Lovforslaget følgjer i hovudsak forslag frå NOU 1999:1
Lov om eiendomsregistrering. Behovet for relevante og riktige eigedomsopplysningar
aukar innanfor fleire samfunnssektorar. Lov om eigedomsregistrering
skal, saman med anna lovverk, i første rekkje lov om tinglysing,
gi eit påliteleg og effektivt grunnlag for transaksjonar
i fast eigedom, for offentleg administrasjon og for bruk og vern
av det fysiske miljøet i det heile.
Det blir i proposisjonen drøfta om lova burde innarbeidast
i plan- og bygningslova, men departementet konkluderar med å foreslå ei
eiga lov om eigedomsregistrering.
Internasjonale trendar innan eigedomsregistrering er omtala,
og det gis i proposisjonen eit oversyn over bruken av terminologi
i lovforslaget.
Departementet foreslår at signallova i revidert form
blir ført vidare i eit eige kapittel i lov om eigedomsregistrering.
Strukturen i lova er omarbeidd i tråd med forslag frå Justisdepartementet.
Departementet meiner som Justisdepartementet at ei lov om oppmålingsarbeid
som vert foreslått, ikkje bør givast som ei eiga
lov, men takast inn i forslaget til lov om eigedomsregistrering.
Ein meiner at "lov om eigedomsregistrering" er eit dekkjande namn,
sjølv om føresegner om oppmålingsarbeid
blir teke inn. Departementet foreslår "matrikkellova" som
kortform.
Departementet foreslår i proposisjonen å etablere eit
moderne eigedomsregister for heile landet, kalla matrikkelen. Registeret
skal byggje på det gjeldande grunneigedoms-, adresse- og
bygningsregisteret (GAB-registeret), men skal også omfatte
kart som viser plassering, storleik og form på den enkelte
eigedommen. Kartdata vil bli henta frå digitale eigedomskart
(DEK) hos kommunane og Statens kartverk.
Det som i dag blir registrert som eigne einingar i GAB skal framleis
kunne opprettast som eigne einingar i matrikkelen. Einingar som
er tildelte matrikkelnummer etter tidlegare regelverk, skal bli
rekna som matrikkeleining og kan stå oppførte
i matrikkelen, sjølv om krava i lovforslaget ikkje er oppfylte.
Kjernen i matrikkelen vil vere sjølve matrikkeleininga
med offisiell identifikasjon av denne. Til kjernen skal det vere
knytt opplysningar om den enkelte matrikkeleininga som er nødvendige
for planlegging, utbygging, bruk og vern av fast eigedom. Departementet
understrekar at matrikkelen skal stå fram som ein heilskap,
der kartdata er å sjå på som eitt av
fleire tema knytte til den enkelte matrikkeleininga.
Departementet legg til grunn at nummerering og identifikasjon
skal vere einsarta for landet, lett å forstå,
og byggje på gjeldande system for nummerering med gardsnummer,
bruksnummer, festenummer og seksjonsnummer. Det skal tydeleg gå fram
av matrikkelen om eininga er grunneigedom, anleggseigedom, eigarseksjon,
jordsameige eller festegrunn. Nærare reglar om nummerering
og omnummerering vil bli fastsette i forskrift.
Departementet meiner vidare at omgrepet festegrunn også bør
omfatte allereie etablerte bruksrettar med tilsvarande karakter
som festerett, sjølv om retten ikkje er regulert i festekontrakt.
Definisjon av matrikkeleining og matrikkeleininga "festegrunn" er nærare
omtala i proposisjonen.
Departementet meiner kommunane skal registrere pålegg
som gjeld grunn og bygningar i matrikkelen. Det foreslås
imidlertid at opplysningar om offentlege pålegg berre blir
registrerte med ein referanse til saka, slik at den som saka vedkjem
kan undersøkje forholdet nærare. Nærare
reglar om utforming av slike referansar blir å fastsetje
i forskrift.
Departementet meiner at ein i første omgang må utforme
matrikkelen slik at både nye og gamle (men framleis gjeldande)
pålegg som vedkjem bruk av grunn eller bygningar vedtekne
av kommunane skal registrerast. Det må i tillegg lagast
rutinar som sikrar at gjennomførte pålegg (som
ikkje lenger er relevante), blir sletta frå matrikkelen.
Opplysningar om alle kjente freda kulturminne og kulturmiljø skal
bli oppteikna og vere tilgjengelege via matrikkelen. Dette bør
gjelde både automatisk freda kulturminne, så vel
som bygningar, anlegg o.a. som er freda ved særskilt vedtak,
m.a. freda område rundt eit freda kulturminne. GAB-registeret
inneheld allereie i dag særskilde opplysningar om eldre
bygningar frå før 1900 (før 1945 i Nord-Troms
og Finnmark). Det er føresetnaden at dette blir ført
vidare i matrikkelen.
Kommunane skal oppleve matrikkelen som eit formålstenleg
forvaltningsverktøy og ei nyttig informasjonskjelde, og
sjå seg tente med å setje av ressursar til arbeidet
med føringa. Dei opplysningane som skal førast
inn i matrikkelen etter at det er halde oppmålingsforretning,
skal gå fram av sjølve kravet om matrikkelføring,
og kunne leggjast inn utan vesentleg kontroll av kommunen.
Ordningane for rapportering til GAB skal førast vidare
i matrikkelen, og kommunane kan etter avtale oversende registreringsgrunnlaget
til Statens kartverk for innlegging i matrikkelen i staden for sjølve å oppdatere.
Føresegnene omkring ajourhald av og rapportering til matrikkelen
skal samordnast med anna regelverk, spesielt føresegnene
om saksbehandling og kontroll i byggjesaker. Samordninga inneber ikkje
nye registreringsplikter.
Departementet fremjar forslag til regel om komplettering av opplysningane
i matrikkelen, og det blir foreslått at pålegget
om å skaffe fram opplysningar kan rettast mot eigar, rettshavar
eller leigar av eigedom, bygning eller bygningsdel, eller mot offentlege organ.
Føresegna vil gjelde både for opplysningar som
manglar heilt i matrikkelen og for betring av kvaliteten på eksisterande
data. Departementet føreset at det i ordinære
saker vil vere den sentrale matrikkelstyresmakta som avgjer og organiserer
regionale eller landsomfattande arbeid. Matrikkelkartet skal kunne
førast à jour med eksisterande grenser via datafangst
frå eksisterande kjelder som kartverk og andre beskrivingar
og via ny kartlegging og nye utrekningar. Det skal óg i
slike høve gå fram av matrikkelen kvar dei nye
opplysningane kjem frå.
Den sentrale matrikkelstyresmakta kan ikkje føre opplysningar
i matrikkelen som kommunen har føringsansvaret for og der
kommunen sit på datagrunnlaget, utan etter avtale med den
enkelte kommunen. Lovforslaget opnar for at matrikkelen kan innehalde opplysningar
frå andre styresmakter enn kommunane, når det
er bestemt i lov eller etter avtale med den sentrale matrikkelstyresmakta.
I tillegg må matrikkelen regelmessig kontrollerast og oppdaterast mot
andre administrative register for å vere à jour,
til dømes for opplysningar om namn, personnummer og adresse
til heimelshavarane.
Matrikkelen skal ikkje innehalde informasjon som i seg sjølv
er gradert. Departementet meiner at Forsvaret sitt eigarskap (grunnboksheimel)
framleis skal gå fram opent av grunnbok og matrikkel.
Matrikkelen og tinglysingsregisteret (grunnboka) skal fylle ut
kvarandre. Medan grunnboka primært inneheld opplysningar
som får rettsvern gjennom tinglysing, skal matrikkelen
gi informasjon om fysiske forhold og andre viktige opplysningar
som det ikkje er nødvendig eller mogleg å tinglyse.
Matrikkel og grunnbok vil få ein felles administrativ overbygning
ved at Statens kartverk i framtida også skal føre
grunnboka, jf. vedtak i 2002 om å overføre tinglysinga
frå domstolane til Statens kartverk.
Etter gjeldande delingslov står kommunen for alle sider
ved eigedomsregistreringa som pliktig styresmaktoppgåve,
både oppmålinga i marka og registerføringa.
Departementet foreslår i proposisjonen å dele
dette i to, ein tenestedel og ein styresmaktdel. Tenestedelen (oppmålingsforretninga)
omfattar merking og oppmåling av grenser og anna arbeid
fram til krav om matrikkelføring. Tenestedelen vil ikkje innehalde
noko element av offentleg avgjerdsmakt. Alle element av avgjerdsmakt
blir lagt til den andre delen, føring av matrikkelen, som
framleis skal vere ei oppgåve for kommunen som offentleg
styresmakt.
Departementet meiner at skiljet mellom teneste og styresmakt
legg grunnlaget for eit nytt og betre opplegg for kvalitetssikring,
ved at kommunen som matrikkelførar får som separat
oppgåve å kontrollere at oppmålingsforretningane
blir utførte i samsvar med lov og forskrift. Departementet
trur at krav om kompetanse i tenesteleddet vil heve kvaliteten på kartverk
og register på sikt. Vidare kjem fordelane ved det klart
definerte grensesnittet i lovforslaget mellom styresmakt og tenesteleverandør.
Skiljet mellom styresmaktoppgåver og tenesteproduksjon
legg til rette for at kommunane kan velje organisering tilpassa
dei lokale forholda. Departementet vil tru at dei fleste kommunane ønskjer å opne for
privat tenesteyting og fritt landmålarval, og foreslår
dette som lovteknisk hovudløysing. Kommunen kan vedta å oppretthalde
oppmålingstenesta som eit kommunalt eineansvar.
Departementet viser til at sjølv om det i mange kommunar
er lang tradisjon for å utføre eigedomsoppmåling,
er det få prinsipielle omsyn som tilseier at dette skal
vere ei oppgåve pålagt alle kommunar i kraft av
lov. Det ligg godt til rette for å organisere oppmåling
som eit eigna arbeidsfelt for private føretak.
Departementet meiner at forholda varierer rundt om i landet,
og at den enkelte kommune sjølv bør kunne avgjere
korleis arbeidet skal organiserast. Departementet foreslår
derfor at kommunen skal kunne velje om den vil opne for fritt landmålarval
eller vidareføre oppmålingsarbeidet som eit kommunalt
eineansvar. I nokre kommunar kan dette sikre at kommunen kan ha
tilsett eigen landmålar som dei elles treng til andre oppgåver.
Kommunar kan etablere eige landmålarføretak, som
leverer tenester i konkurranse med private føretak. For å få like
konkurransevilkår, må kommunen i så fall
organisere og bemanne verksemda etter dei same godkjenningskrava
som gjeld for private landmålarføretak. Det same
gjeld statlege etatar som har behov for å vidareføre
eigne landmålarverksemder.
Departementet finn det ikkje nødvendig å krevje at
kommunen organiserer landmålarføretaket som eige
selskap eller juridisk føretak. Det vil vere tilstrekkeleg
at kommunen registrerer den eininga som skal fungere som landmålarføretak,
i Einingsregisteret.
Kommunar som ønskjer å opne for privat tenesteyting
og innføre fritt landmålarval, kan ha behov for
ei overgangsordning når lova blir sett i verk, og det foreslås
at kommunane skal kunne halde fram med å utføre
oppmålingsforretningar som kommunal oppgåve utan
godkjenning i inntil fem år. Kommunar som utfører
oppmålingsforretningar som kommunalt eineansvar vil vere
landmålarføretak i kraft av kommunalt vedtak etter
lova. Departementet foreslår derfor ingen særskilde
krav til korleis desse organiserer verksemda si.
Departementet legg til grunn at den sentrale matrikkelstyresmakta
ikkje skal drive eller ha interesser i landmålarføretak,
men har ikkje funne det nødvendig å lovfeste dette.
Det foreslås ei organisering rundt matrikkelen med ei
sentral, statleg styresmakt og lokale, kommunale matrikkelstyresmakter.
Matrikkelen skal vere einsarta i heile landet, både når
det gjeld datainnhald og tilgjenge, og dette kan berre sikrast gjennom
at staten har ansvaret for drift av matrikkelen, og fører tilsyn
med at matrikkelen blir ført korrekt i alle kommunar. Den
sentrale matrikkelstyresmakta, som vil vere Statens kartverk, skal
syte for ordning, drift og forvaltning av matrikkelen, under dette
utvikling, vedlikehald, betra tilgjenge, tilsyn, generell informasjon
og rådgiving. Statens kartverk og fylkesmannen skal ha
oversikt over ordninga i den einskilde kommunen, og fylkesmannen
skal vere orientert som klageorgan.
Kommunen skal som lokal matrikkelstyresmakt ha ansvaret for å føre
opplysningar inn i matrikkelen. Den viktigaste grunnen til å velje
kommunal matrikkelføring framfor statleg sentral føring,
er at det meste av data for ajourføring av matrikkelen
oppstår i tilknyting til saksbehandling i kommunane. Kommunane
bør kunne føre matrikkelen anten åleine
eller ved interkommunalt samarbeid, eventuelt med nødvendig
hjelp frå Statens kartverk.
Departementet viser til at etablering av private landmålarføretak
kan gi ein nyttig konsulentbransje som gir partane effektiv hjelp
i mange spørsmål i samband med eigedomsdeling
og andre forhold rundt fast eigedom.
Utføring av oppmålingsforretninga er basert
på dokumentasjon og eigenkontroll og blir avslutta med krav
om matrikkelføring. Omgrepet "oppmålingsforretning"
skal erstatte omgrepet "kart- og delingsforretning" i delingslova.
Oppmålingsforretning kan vere oppretting av matrikkeleining,
grensejustering, arealoverføring så vel som klarlegging
av eksisterande grenser. Oppmålingsforretning omfattar,
i tillegg til dokumentasjon, normalt eit arbeid i marka.
Landmålarføretaket skal avklare rettsforhold
og kunne hjelpe partane med å utforme nødvendige
avtaler og dokument for tinglysing. Det blir poengtert at landmålarføretaket
ikkje har noka form for styresmaktfunksjon, og føretaket
må innhente godkjenning frå kommunen dersom løyvet
til å opprette ny matrikkeleining eller arealoverføring
må fråvikast, og for å kunne unnlate
fullstendig merking og innmåling av grensene. Dei elementa
av styresmakt som ligg i styrarfunksjonen i gjeldande lov, er fullt
ut lagt til kommunen som matrikkelførar.
Departementet foreslår at dei same reglane for utføring
og dokumentasjon av oppmålingsforretninga skal gjelde når
kommunen utfører oppmålingsforretninga. Det gjeld
når kommunen opptrer som godkjent landmålarføretak
på linje med private utøverar, men også så langt
det passar, når kommunen har vedteke kommunalt eineansvar,
eller når kommunen følgjer overgangsreglane. Også for
kommunen vil oppmålingsforretninga og matrikkelføringa
vere to skilde oppgåver, der "kravet" om matrikkelføring
markerer grensesnittet mellom dei.
Det er i proposisjonen gjort nærare rede for dokumentasjonskravet,
kven som er partar i oppmålingsforretning, plikt til å halde
oppmålingsforretning, grensemerking og måling
og om klarlegging av rettsforhold mv.
Departementet viser til at betaling for tenestedelen i forbindelse
med oppmålingsforretning vil bli fastsett gjennom fri prisdanning
i ein marknad basert på konkurranse, og at det skjer ei
rask utvikling med omsyn til målemetodar, måleinstrument,
utrekningsprogram osv. Det er ønskjeleg å få rammevilkår
som stimulerer til å utnytte optimale arbeidsmetodar, målemetodar
o.a., tilpassa krav til presisjon og forholda elles på staden.
Fri prisfastsetjing og konkurranse vil i større grad medverke
til at det blir fokusert på optimale løysingar.
Departementet legg til grunn at prisar på oppmålingsforretningane
som speglar dei faktiske kostnadane, gir ein meir effektiv samfunnsøkonomisk
ressursbruk, jamvel om fri prisdanning skulle gi noko høgare
priser. Forslaget om å definere oppmålingsforretningane
som teneste, medfører at oppgåva kjem inn under
meirverdiavgiftsplikta, og vil i seg sjølv føre
til ei prisauke.
I kommunar som førar vidare ordninga med oppmålingsforretningar
som kommunalt eineansvar, vil det ikkje vere konkurranse om tenesta,
og departementet meiner betaling i desse kommunane må skje på grunnlag
av gebyrregulativ fastsett av kommunestyret. Departementet kan gi
nærare reglar om dette i forskrift. For å få meir
like vilkår med ordninga i resten av landet,
foreslår departementet at det blir lagt meirverdiavgift
på denne typen gebyr.
Departementet foreslår ingen detaljerte reglar om betaling
for oppmålingsarbeid som kommunane utfører etter
overgangsreglane, og i ytste konsekvens kan såleis desse
kommunane setje prisar som går ut over sjølvkost.
Det skal betalast gebyr til kommunane for matrikkelføring,
og kommunen bør kunne dekkje andre oppgåver etter
lova med gebyr, f.eks. utferding av matrikkelbrev som eiga sak.
Kommunen fastset gebyrregulativ avgrensa oppover til sjølvkost,
men innanfor eit øvre tak som blir fastsett av departementet ved
forskrift. Departementet foreslår at gebyret blir fastsett
som eit visst tal rettsgebyr. Det bør vere ulike satsar
avhengig av kor mykje arbeid den enkelte sakstypen krev i gjennomsnitt.
Det er føresett like maksimalsatsar for heile landet.
Departementet meiner det bør betalast gebyr for registrering
av data frå jordskifteretten, og slik at dette inngår
i dei sakskostnadene som partane må dekkje i saka for jordskifteretten.
Departementet foreslår å vidareføre
gebyrheimelen for eigarseksjonering i lov om eigarseksjonar, og det
skal såleis ikkje betalast gebyr for matrikkelføring
av eigarseksjonar. Brukarane skal vidare normalt betale for opplysningar
frå matrikkelen og eventuell rett til å vidaredistribuere
desse.
Når det gjeld krav til verksemd som skal utføre oppmålingsforretning
foreslår departementet at kompetansekrava blir sikra gjennom
ei ordning med godkjende landmålarføretak etter
mønster av den sentrale godkjenningsordninga i plan- og
bygningslova. Det er ikkje ønskjeleg å opprette
ei ordning for å autorisere fagpersonar på allment
grunnlag, utan at dette skjer i direkte samanheng med utøving
av verksemd. I tillegg vil det truleg vere aktuelt for mange landmålarføretak å søkje
godkjenning innanfor plan- og bygningslova sitt fagområde.
Departementet har vurdert om godkjenningsordninga skulle vere
heimla i plan- og bygningslova, men har funne dette lite formålstenleg.
Det ligg godt til rette for at Kartverket får ansvaret
for godkjenning av landmålarføretaka. Departementet
har vurdert om det kunne vere formålstenleg å differensiere
kompetansekravet basert på lette og vanskelege typar oppmålingsforretning,
ikkje minst for å kunne gjere det lettare å etablere
seg i distrikta.
Kompetansekrava skal gjelde fullt ut frå lova trer i
kraft. Departementet legg til grunn at Universitetet for miljø-
og biovitskap (UMB) vil opprette eit komplett studieopplegg for
landmålarar. Opplegget vil vere ei justering og mindre
påbygging i forhold til eksisterande linjer og utdanningsretningar.
Departementet er kjent med at det er sett i gang eit arbeid for å utvikle
eit tilbod som dekkjer behovet for utdanning og spesielt etterutdanning.
Departementet legg vekt på at kompetansekravet til føretaket
i sum skal vere basert på høgskule- og universitetsnivå.
I prinsippet opnast det for at ein som ønskjer å etablere
landmålarføretak, og ikkje åleine har
all den kompetansen som fagområdet krev, kan etablere eit
føretak basert på eit kompaniskap som til saman
oppfyller krava.
Departementet foreslår nemninga "ansvarleg landmålar"
på den faglege leiaren. Med dette blir det sikta til den
funksjonen vedkommande har internt i landmålarføretaket.
Vedkommande skal underteikne kravet om matrikkelføring
og slik representere landmålarføretaket i den
enkelte forretning.
Det kan liggje til rette for at bransjen etablerer frivillige
ordningar som skriv ut sertifikat eller "landmålarbrev"
til dei som har ei særskilt utdanning eller på anna
grunnlag oppfyller bestemte kompetansekrav. Alternativt kan det
i forskrift til universitetslova fastsetjast titlar i tilknyting
til bestemte utdanningsretningar.
Dei samla godkjenningskrava skal sikre at landmålarføretaket
har evne til å gjennomføre alle typar oppmålingsforretningar
og fremje krav om matrikkelføring på vegne av
oppdragsgivar. I tillegg til dei reine kompetansekrava kan dette
m.a. gjelde krav om registrering og organisering av føretaket,
krav til økonomisk tryggleik og rutinar for kvalitetssikring og
arkivering.
Kommunar som utfører oppmålingsforretninga som
kommunalt eineansvar treng ikkje godkjenning, men må peike
ut ein eller fleire ansvarlege landmålarar.
I proposisjonen går ein nærare inn på:
reglane for det geodetiske grunnlaget,
og korleis signallova er ført vidare i lov om eigedomsregistrering
oppbygginga av matrikkelsystemet og rettane til datagrunnlaget
særskilde tiltak for å få betre
oversikt over eigedomsforholda
tildeling av offisiell adresse og bruksnamn
dei enkelte sakstypane, under dette oppretting av anleggseigedom,
matrikulering av festegrunn, saker som gjeld areal til offentleg
veg- og jernbanegrunn, matrikulering av umatrikulert grunn, registrering
av jordsameige, grensejustering og arealoverføring og referanse
til private avtaler om eksisterande grenser
merking, måling og matrikkelføring av
grenser som blir fastsette av domstolane
klage og retting.
Når det gjeld forholdet til andre lover er det i proposisjonen
særleg drøfta forholdet til jordskiftelova, plan-
og bygningslova, eigarseksjonslova, tinglysingslova, personopplysningslova,
forureiningslova og kulturminnelova.
Vidare vises det til at eksisterande eigedom som ikkje tidlegare
er kartlagt, på sikt bør bli målt og merkt
på lik linje med annan eigedom, og departementet har formulert
ei føresegn om at grenser skal vere klarlagt ved heimelsovergang.
Departementet foreslår likevel at dette først
blir sett i verk når det har vakse fram eit tilfredsstillande
tenestetilbod.
Tildeling og endring av offisiell adresse er regulert i lovforslaget,
og departementet meiner det er viktig at offentleg administrasjon
nyttar offisielle adresser frå matrikkelen, så vel
som dei andre offisielle nemningane i matrikkelen. Departementet
vil arbeide for nødvendig harmonisering av reglane for å oppnå dette.
Departementet meiner det er viktig å få på plass eit
eintydig adressesystem basert på gateadresseforma for alle
adresseverdige eigedommar og bygg, og ein ønskjer ei intensivering
av arbeidet med tildeling av offisielle adresser i form av gateadresser.
Tildeling av adresser må utførast av den enkelte
kommunen, og involverer gjerne politiske utval (namnesaker) i tillegg
til arbeidet i administrasjonen.
Departementet føreset at matrikkelnummer etter kvart
går ut og at gateadresseforma blir innført som felles
adresseform for heile landet. Statens kartverk må som sentral
matrikkelstyresmakt aktivt rettleie kommunane om prosedyrar og metodar
for slik adressetildeling, og på ein positiv måte
fungere som pådrivar i arbeidet. Det kan bli aktuelt med
ein samla overgang på eit seinare tidspunkt. Om lag 9 00 000 eigedommar
manglar framleis ei fullverdig adresse i form av gateadresse eller
tilsvarande.
Departementet meiner at dei som er involverte skal få høve
til å uttale seg før kommunen fattar endeleg vedtak
om tildeling av offisiell adresse, og har teke dette inn i lovforslaget.
Departementet foreslår at eigar skal ha rett til å få registrert
bruksnamn som språkleg og geografisk fell saman med nedarva
stadnamn som del av den offisielle adressa. Det foreslås
vidare at kommunen etter oppmoding frå eigaren også kan
tildele slikt adressenamn til spesielle institusjonsbygningar eller
andre særskilt kjende bygningar, når det etter
kommunen si vurdering vil vere spesielt nyttig for omverda at adressa
omfattar eit slikt namn.
Departementet foreslår at nærare reglar om adressetildeling
blir fastsette i forskrift slik som i dag.