I proposisjonen blir det gjort framlegg om utbygging og
finansiering av Fastlandssamband til Finnøy i Rogaland
(Finnfast).
Prosjektet vil gi innbyggjarane på øyane
Finnøy og Talgje ferjefritt vegsamband med Rennesøy
og vidare med fastlandet. Tiltaket er eit ferjeavløysingsprosjekt som
vil frigjere ei ferje som i dag trafikkerer i Søndre Finnøysamband
mellom Rennesøy (Hanasand) og Finnøy (Talgje og
Ladstein).
Finansieringa av Finnfast er basert på bompengar, alternativ
bruk av ferjetilskot (statleg og fylkeskommunal del) og statlege
midlar. Bompengar og alternativ bruk av ferjetilskot utgjer det
alt vesentlege av finansieringa.
Bompengeselskapet og lokale styresmakter i samarbeid
med Statens vegvesen har arbeidd fram ei finansieringsløysing
med svært små ordinære statlege løyvingar.
Dette gjer det mogleg å få til ei raskare realisering av
prosjektet enn det som elles ville vere tilfelle.
Finnfast inngår som eit element i "Ryfylkepakken" som
er ein samla strategi for å løyse transportutfordringane
i Ryfylkeregionen. Konsekvensutgreiinga for prosjektet blei godkjent
i 2001, og reguleringsplanen blei godkjent i 2003 (Finnøy
kommune) og 2004 (Rennesøy kommune). Bomstasjonen inngår
i reguleringsplanen for prosjektet.
Prosjektet omfattar bygging av ein 5,7 km lang undersjøisk
tunnel mellom Hanasand i Rennesøy kommune og Ladstein i
Finnøy kommune med ein 1,5 km lang tilknytingsveg i tunnel
til øya Talgje. I tillegg kjem om lag 1,2 km tilførselsvegar
for påkopling til eksisterande vegnett. Tilknytingsvegen
blir klassifisert som fylkesveg.
På lengre sikt vil det vere behov for
opprusting av vegsystemet på Finnøy. Dette vil
eventuelt bli gjennomført som eit eige prosjekt med eiga
finansiering.
Finnøy kommune har om lag 2 800
innbyggjarar, busette på 16 øyar. Prosjektet vil
gi innbyggjarane på dei to øyane Finnøy
og Talgje ferjefritt vegsamband med fastlandet via Rennesøy-sambandet.
Prosjektet vil kunne medverke til effektivisering
av ferje- og hurtigbåtdrifta i Ryfylke. Pendlarane vil
få kortare reisetid og ein utvida arbeidsmarknad. For næringslivet
i området vil prosjektet medverke til auka konkurranseevne.
Spesielt havbruksnæringa framhevar at prosjektet er viktig.
Ved behandlinga av St.prp. nr. 1 Tillegg nr.
2 (2002-2003), jf. Budsjett-innst. S. nr. 13 Tillegg nr. 2 (2002-2003),
gav Stortinget løyve til å krevje inn forskotsbompengar
på kjøretøy i Søndre Finnøysamband
for å finansiere den vidare planlegginga av Finnfast.
Kostnadsoverslaget er kvalitetssikra av ein
ekstern konsulent i samsvar med prinsippa for styring av statlege
investeringar. Kvalitetssikringa har i tillegg omfatta trafikkgrunnlaget
og finansieringsopplegget.
Samferdselsdepartementet legg til grunn ei styringsramme
på 530 mill. 2006-kroner og ei kostnadsramme på 560
mill. 2006-kroner.
Konsulenten meiner at Statens vegvesen si vurdering av
trafikkgrunnlaget i opningsåret er for optimistisk, og tilrår
at det blir lagt til grunn ein årsdøgntrafikk
i opningsåret 2009 på 464 kjøretøy.
Vegdirektoratet har samanlikna konsulenten sitt forslag med det
opphavelege forslaget frå regionvegkontoret om å leggje
til grunn 550 kjøretøy. Samferdselsdepartementet
sluttar seg imidlertid til konsulenten si tilråding som
er mest nøktern.
Basert på at prosjektet blir delvis
bompengefinansiert, er samfunnsøkonomisk netto nytte for
prosjektet (NN) rekna til - 10 mill. kroner. Netto nytte over totale kostnader
(NN/K) er rekna til - 0,0. Internrenta er rekna til 7 pst.
Lokalpolitisk behandling er nærare
omtala i kapittel 4 i proposisjonen, jf. behandling i Finnøy
kommune, Rennesøy kommune og Rogaland fylkeskommune.
Finansieringsopplegget med dei enkelte element,
er omtala i kapittel 5 i proposisjonen.
Anleggsarbeida på prosjektet er planlagt å starte sommaren/hausten
2006, med fullføring i 2009. Finansieringsplanen byggjer
på følgjande element:
Styringsramma for prosjektet er 530 mill. 2006-kroner.
Med dei føresetnader som er lagt til grunn, er finansieringskostnadene,
inkl. kostnadene ved forskottering, rekna til om lag 220 mill. kroner.
Samla gir dette eit finansieringsbehov på 747 mill. 2006-kroner:
Finansieringsplan
| Mill.
2006-kroner |
Forskottering - innspara
statlege tilskot til drift av ferjesambandet1 | 43 |
Forskottering - innspara
fylkeskommunale tilskot til drift av ferjesambandet1 | 15 |
Forskottering - innspara
statlege tilskot til kapitalkostnader for ei ferje | 71 |
Bompengar - forskotsbompengar | 19 |
Bompengar - etterskotsbompengar
på prosjektet2 | 512 |
Bompengar - forlenging
av innkrevjinga ved Sokn bomstasjon i 7-8 mnd. | 65 |
Statlege midlar
- ordinære midlar | 22 |
Sum | 747 |
1 Korrigert for auka drifts- og vedlikehaldsutgifter
på vegnettet.
2 I tillegg kjem bompengar til dekking av innkrevjingskostnader
og drift av bompengeselskapet.
Ved tidlegare vedtekne ferjeavløysingsprosjekt
der alternativ bruk av ferjetilskot inngår i finansieringsplanen,
er det lagt til grunn at eventuell reduksjon i prosjektkostnadane
skal godskrivast post 72, slik at dei årlege utbetalingane
kan stanse før det er gått 15 år. For dette
prosjektet tilrår Vegdirektoratet at så lenge
perioden med etterskotsinnkrevjing ligg an til å bli lengre enn
15 år, skal eventuelle innsparingar bidra til å redusere
innkrevjingsperioden.
Det er lagt til grunn forskotsinnkrevjing på kjøretøy
i Søndre Finnøysamband i om lag 3 år
frå prosjektet er godkjent av Stortinget og fram til trafikkopning.
Etter kvalitetssikringa av føresetnadene for finansieringsplanen
er det lagt til grunn vel 20 års etterskotsinnkrevjing i
det nye vegsambandet. I tillegg er det føresett eit bompengebidrag
til prosjektet ved at innkrevjinga i Sokn bomstasjon i Rennesøy
kommune skal halde fram i 7-8 månader etter at Rennfast-prosjektet
på E39 er nedbetalt.
Det er lagt til grunn at etterskotsinnkrevjinga
vil skje i ein automatisk, ubemanna bomstasjon på Hanasand
i Rennesøy kommune, nær det noverande ferjeleiet.
Det er føresett tovegs innkrevjing.
Ved endeleg fastsetting av takstnivået
er det ein føresetnad at netto bompengeinntekt ikkje blir
redusert i forhold til det som er lagt til grunn i proposisjonen.
Det er vidare ein føresetnad at takstane blir justerte
i samsvar med prisutviklinga.
Det er rekna med at bompengeinntektene vil gi
eit samla finansieringsbidrag på 596 mill. kroner, fordelt med
8,5 mill. kroner frå den avslutta forskotsinnkrevjinga,
10,5 mill. kroner frå den nye forskotsinnkrevjinga, 65
mill. kroner frå den ekstra innkrevjinga i Sokn bomstasjon
og 512 mill. kroner frå etterskotsinnkrevjinga.
I tillegg kjem bompengar til dekning av innkrevjingskostnader og
drift av bompengeselskapet.
Vegdirektoratet tilrår at det blir
akseptert å leggje til grunn vel 20 år med etterskotsinnkrevjing
av bompengar for ferjeavløysingsprosjektet Finnfast.
Økonomien i prosjektet er følsam
for endringar i føresetnadene. Det må derfor vere
ein føresetnad at bompengeselskapet sikrar eit rentenivå i
tråd med det som er lagt til grunn i gjeldande avtale og
som også er lagt til grunn i finansieringsplanen. Samferdselsdepartementet
føreset at dokumentasjon for avtale om rentenivå blir
sendt Vegdirektoratet før bompengeavtalen blir underskriven.
Føresetnaden om å forlenge
innkrevjingsperioden i bomstasjonen på Sokn i Rennesøy
kommune etter at Rennfast-prosjektet er nedbetalt, er i utgangspunktet
i strid med retningslinjene for bompengeprosjekt.
Rennesøy kommune aksepterer ikkje denne
forlenginga. Etter ei samla vurdering, der det m.a. er lagt vekt på at
innbyggjarane i Finnøy kommune har bidratt til finansieringa
av Rennfast-prosjektet sidan opninga i 1992, har Vegdirektoratet
tilrådd at innkrevjinga av bompengar i Sokn bomstasjon
i Rennesøy kommune skal gi eit finansieringsbidrag til
Finnfast på 65 mill. 2006-kroner. Vegdirektoratet har også lagt
vekt på at forlenginga ikkje vil utgjere meir enn 7-8 månader
som trass alt er ein avgrensa periode. Vegdirektoratet har tilrådd
ein særskilt rabatt for dagpendlarar i perioden med forlenging.
Samferdselsdepartementet er samd i Vegdirektoratet sine vurderingar.
Fylkesutvalet har i møte 16. august
2005 fatta vedtak om fylkeskommunal garanti for eit bompengelån
på inntil 500 mill. kroner. Fylkeskommunen har vidare akseptert
at ordninga med betinga refusjon kan nyttast for dette prosjektet.
Garantien vil først komme til utbetaling
dersom gjelda ikkje blir mogleg å handtere etter at realtakstane er
auka med 20 pst., bompengeperioden er forlenga med inntil 5 år
og selskapet si gjeld er redusert med midlane frå den betinga
refusjonen.
Etter at Stortinget har gjort vedtak om utbygging
og finansiering av rv 519 Fastlandssamband til Finnøy, med
tilknyting til Talgje (fv 606), vil det bli inngått avtale
mellom Vegdirektoratet og bompengeselskapet i tråd med
gjeldande standardavtale og dei føresetnadene som er lagt
til grunn i denne proposisjonen.