Det offentlege konsumet utgjer om lag ein tredjedel
av det samla konsumet i Noreg. Verksemdene i offentleg sektor kjøper
inn varer og tenester for ein verdi av 272 mrd. kroner i året. Dette
er fellesskapets midlar som skal forvaltast på ein best mogleg måte.
Offentleg sektor står overfor vesentlege utfordringar
dei kommande åra. Desse må løysast med avgrensa ressursar. Samtidig
vert det stilt stadig større krav til kvaliteten på offentlege tenester.
Det offentlege må derfor opptre som ein profesjonell innkjøpar og
sørgje for at ein får mest mogleg igjen for fellesskapet sine pengar og
at pengar ikkje vert brukte unødig. Offentlege verksemder skal gå
føre i arbeidet med å ivareta sosiale og miljømessige omsyn. Gjennom
å vere ein krevjande og konstruktiv innkjøpar, kan det offentlege
medverke til at det vert utvikla meir miljø- og klimavennlege varer
og tenester. Det offentlege kan òg som ein viktig marknadsaktør støtte
etisk åtferd i næringslivet. Ved å leggje vekt på innovasjon, etikk,
miljø og livsløpskostnader vil det offentlege skaffe seg betre og
meir berekraftige produkt, og vil sjølv kunne levere betre tenester
til innbyggjarane.
I kraft av storleiken er etterspørselen i offentleg sektor
svært viktig for produksjonen av varer og tenester i privat sektor.
Ved å vere ein krevjande kunde som stimulerer til konkurranse mellom
eit breitt spekter av leverandørar og medverkar til auka kostnadsmedvit
og effektivitet hos norske bedrifter, vil det offentlege bidra til
at norsk næringsliv vert meir konkurransedyktig.
Regelverket for offentlege innkjøp er eit prosessuelt
rammeverk med hovudformål å sikre best moglege innkjøp gjennom konkurranse
og openheit om offentlege kontraktar. I dei seinare åra er det òg
lagt vekt på at regelverket skal sikre andre samfunnsomsyn.
Bakgrunnen for denne meldinga er at Regjeringa vil
forbetre offentleg innkjøpsverksemd. Då er det naudsynt å sjå på
gjennomføring av offentlege innkjøp i ein større samanheng. Innkjøpsreglar,
organisering og gjennomføring av konkurransar, kompetansebehov og
statusen til innkjøpsfaget er blant dei faktorar som har avgjerande
innverknad på kvaliteten i innkjøpsprosessane. Ved å sjå nærmare
på korleis stat og kommune gjennomfører sine innkjøp, har Regjeringa
avdekt område der det er trong for tiltak.
Regjeringa tek Riksrevisjonens stadige og omfattande
merknader om brot på reglane om offentlege innkjøp alvorleg. Funn
i kommunale og fylkeskommunale revisjonar og saker til behandling
i Klagenemnda for offentlige anskaffelser (KOFA), underbyggjer òg
at brot på regelverket er eit problem, og at dette problemet ikkje
berre er knytt til statleg sektor. Regjeringa har ansvaret for at
reglane er så gode som mogleg, og at handhevingssystemet er formålstenleg
utforma og sikrar god regeletterleving. Brukarane av regelverket
skal ha tilgang til kvalitetssikra og einskapleg informasjon om
regelverket. Regjeringa har gjort mykje for å betre etterlevinga
av regelverket. Nytt og forbetra regelverk trådde i kraft i januar
2007, etter eit omfattande arbeid for å gjere det enklare og meir
brukarvennleg. Samtidig vart handhevinga skjerpa ved at KOFA har
fått høve til å gi gebyr der ein har unnlate å kunngjere konkurranse
i samsvar med krava i regelverket. Direktoratet for forvaltning
og IKT (Difi) vart etablert i 2008, med ei eiga avdeling for styrkt
og samordna kompetansetilbod for offentlege innkjøp. I meldinga
vert det gitt ein omtale av dei bakanforliggjande årsakene til regelbrota.
Ved å forbetre innkjøpsverksemda i offentleg sektor vil òg etterlevinga
av reglane bli betre.
Kapittel 2 i meldinga gjer greie for statistikk
og fakta frå Statistisk sentralbyrå og Databasen for offentlege
innkjøp (Doffin). Regjeringa meiner det er behov for å styrkje datagrunnlaget
om offentlege innkjøp, og Fornyings- og administrasjonsdepartementet
har bedt Difi vidareutvikle og forbetre datagrunnlaget i Doffin.
I kapittel 3 vert det framheva kor stor innverknad offentlege
innkjøp har på samfunnsøkonomien og kor viktig det er å stimulere
til effektive offentlege innkjøp. Regelverket om offentlege innkjøp
skal òg bidra til at risikoen for korrupsjon og misgjerningar vert
redusert. Regjeringa framhevar òg at offentlege innkjøp skal gjennomførast
på ein måte som fremjar viktige samfunnsomsyn som miljø, etikk og
innovasjon.
I juni 2007 la Regjeringa fram ein handlingsplan for
miljø og samfunnsansvar i offentlege innkjøp. Regjeringa har pålagt
alle statlege verksemder å følgje opp dei konkrete krava i handlingsplanen
frå 2008. Regjeringa reknar med at alle kommunar og fylkeskommunar
vil slutte seg til arbeidet og at KS vil vere ein viktig støttespelar.
For å gi dei offentlege verksemdene den hjelpa dei treng for å gjennomføre
handlingsplanen, skal det etablerast eit "knutepunkt" i kvart fylke/region.
Seks knutepunkt er etablerte, og i løpet av 2009 skal alle fylke/regionar
ha etablert knutepunkt.
I 2006 la Regjeringa fram ein handlingsplan
mot sosial dumping med ei rekkje konkrete tiltak. I tråd med planen
innførte Regjeringa 1. mars 2008 forskrift om lønns- og arbeidsvilkår
i offentlige kontrakter. Forskrifta gjeld statlege, kommunale og
fylkeskommunale myndigheiter og offentlegrettslege organ og kjem
til bruk på kontraktar over ein viss terskelverdi. Arbeid som skal
utførast i utlandet, er også omfatta.
Etter at den nye offentleglova trådde i kraft 1. januar
2009, er alle anbodsprotokollar og tilbod offentleg tilgjengelege.
Kravet i regelverket til kunngjering i Doffin, forbodet mot forskjellsbehandling
av leverandørar og føresegner om korleis prosessen skal gjennomførast,
sikrar at kontraktane vert tildelte etter open og rettferdig konkurranse.
Kapittel 4 beskriv utviklinga av regelverket
om offentlege innkjøp og etableringa av KOFA. Då ny forskrift om
offentlige anskaffelser og forskrift om innkjøpsregler for forsyningssektorene vart
iverksett 1. januar 2007, var det gjort eit omfattande og breitt
arbeid for forenkling av regelverket. Regjeringa orienterte i Ot.prp.
nr. 62 (2005–2006) Stortinget om dei forbetringar som var gjorde
i forskriftene.
Regjeringa kan ikkje sjå at det er formålstenleg med
nok ein brei gjennomgang av heile regelverket med tanke på generell
forenkling berre to år etter at det trådde i kraft. Det må òg leggjast
vekt på at både oppdragsgivarar og leverandørar skal få tid til
å bli kjende med og forstå korleis reglane skal etterlevast.
Regjeringa vil likevel arbeide vidare på utvalde område
der praktisering av regelverket inneber spesielle utfordringar.
Regjeringa har nedsett eit utval som skal greie
ut implementeringa av nytt handhevingsdirektiv i norsk rett, og
vurdere korleis det samla norske handhevingssystemet best kan organiserast.
I denne samanhengen skal òg KOFAs oppgåver vurderast.
Ei kartlegging av brot på reglane om offentlege innkjøp
og årsaker til regelbrot, gjort av First Ventura AS hausten 2008,
viser at omfang og breidd i type regelbrot er stort. Etter Regjeringas vurdering
er særleg brot på grunnleggjande krav om konkurranse og gjennomføring
av ulovlege direkte innkjøp alvorleg. Brot på kravet om dokumentasjon
gjer det vanskeleg å etterkontrollere viktige val og avvegingar
i løpet av innkjøpsprosessen, og kan bidra til å svekkje tilliten
til offentlege innkjøpsprosessar. Dette reduserer også moglegheita
for å avdekkje forsømingar og korrupsjon.
Kartlegginga viser at årsaksbiletet er samansett, og
at det er naudsynt å sjå meir heilskapleg på korleis ein gjennomfører
innkjøp i offentleg sektor. Regjeringa meiner at det særleg er tre
område som skil seg ut når det gjeld vidare oppfølging:
I kapittel 5 vert leiarane sitt ansvar for offentlege innkjøp
framheva. Leiarfokus og god forankring av innkjøpsaktiviteten i
verksemdene er sentrale føresetnader for profesjonelle og korrekte
innkjøp. Tiltak for å få auka forankring av innkjøp hos verksemdsleiarar
og betre kontroll av innkjøpsaktiviteten er derfor viktig, og dei verkemiddel
som vert nytta for styring og utvikling av offentlege verksemder,
må i større grad takast i bruk på dette området.
Kapittel 6 orienterer om arbeidet med intern kontroll
i statleg og kommunal sektor. Den interne kontrollen varierer sterkt
mellom ulike offentlege verksemder. Dette gjeld òg på innkjøpsområdet.
For å forbetre offentlege innkjøpsprosessar ved meir aktiv bruk
av intern kontroll, vil rettleiinga styrkjast på området.
Kapittel 7 understrekar at formålstenleg organisering
er ein føresetnad for effektive og korrekte innkjøp. Utan formålstenleg
organisering vil òg andre tiltak, som for eksempel kompetansetiltak, ha
avgrensa effekt.
Regjeringa vil greie ut auka samordning av innkjøp,
og vil sjå nærmare på kva effektar samordning av innkjøp har gitt
både når det gjeld pris og kvalitet på produkta, men også når det
gjeld ressursbruk og forbetring av innkjøpsprosessar. Dei marknadsmessige
konsekvensane skal òg vurderast. På bakgrunn av ei slik utgreiing
vil Regjeringa vurdere organisatoriske tiltak for auka samordning.
Kapittel 8 beskriv eksisterande rettleiings-
og kurstilbod i offentleg regi og drøftar behovet for styrking av
kompetanse om offentlege innkjøp. Regjeringa vil vidareutvikle tilbodet
i Difi, og særleg ha fokus på innkjøpsfag og kompetanse om styring
og organisering av offentlege innkjøp. Regjeringa vil òg få greidd
ut behovet for eit universitets- og høgskoletilbod om offentlege innkjøp.
I kapittel 9 omtaler ein arbeidet for å auke bruken
av elektroniske løysingar ved offentlege innkjøp. Bruk av elektroniske
løysingar gir betre, enklare og sikrare innkjøp. Regjeringa vil sikre
eit breitt tilbod for elektroniske løysingar som dekkjer heile innkjøpsprosessen
frå konkurransegjennomføring til ordrehandtering, faktura og betaling.
Regjeringa vil vidareutvikle løysingane på Ehandel.no og Doffin,
og foreslå løysing for oppretting av leverandørregister for å forenkle
innkjøpsprosessen for leverandørar og oppdragsgivarar. Regjeringa
vil òg innføre eit felles standardformat for elektronisk faktura
og ønskjer at ein skal ta i bruk elektronisk faktura i heile offentleg
sektor.
Kapittel 10 orienterer om nivået på terskelverdien
og drøftar framtidig nivå for terskelverdien om offentlege innkjøp.
Evalueringa av terskelverdien tyder på at innsparing i transaksjonskostnader
og den negative konkurranseeffekten ved å heve terskelverdien frå
200 000 til 500 000 kroner, har vore av same omfang. Ei vidare heving
synest ikkje å vere samfunnsøkonomisk lønsamt. Ro og stabilitet
rundt eit relativt nytt regelverk er eit viktig poeng i vurderinga
av om terskelverdien skal hevast. Ved å halde terskelverdien på
dagens nivå er ein i større grad sikra at ein går i retning av meir
profesjonelle, forretningsmessige, ryddige og samfunnstenlege offentlege
innkjøp. Regjeringa vil derfor ikkje no heve terskelverdien vidare.
Innføring av eit generelt krav om forenkla kunngjeringsplikt
under dagens terskelverdi vil utvide pliktene for stat og kommunar
og komplisere regelverket. Å innføre eit slikt krav no, kort tid
etter siste regelrevisjon, vil gi større utfordringar med etterleving
og praktisering. Regjeringa har derfor ikkje funne at det er grunnlag
for å innføre ei slik plikt. Det bør likevel stimulerast til auka
bruk av den frivillige ordninga som i dag eksisterer i Doffin.
Kapittel 11 gjer greie for økonomiske og administrative
konsekvensar av forslaga. Lov om offentlige anskaffelser skal medverke
til auka verdiskaping i samfunnet ved å sikre mest mogleg effektiv
ressursbruk ved offentlege innkjøp. Målet med tiltaka i meldinga
er å få meir profesjonelle offentlege innkjøp. Det vil føre til
betre kvalitet, lågare prisar eller lågare ressursbruk i innkjøpsprosessen.
Meir profesjonelle innkjøp vil føre til færre klager i KOFA og mindre
kritikk frå Riksrevisjonen og kommunerevisjonen.
Regjeringa vil styrkje offentlege innkjøpsprosessar
gjennom ei rekkje tiltak som skal heve kompetansen om offentlege
innkjøp og bidra til meir formålstenleg organisering og forankring hos
leiinga i offentlege verksemder. Meir aktiv bruk av ordninga med
intern kontroll gir viktig informasjon til leiinga, og grunnlag
for å setje i verk tiltak som kompetanseheving og forbetring av
rutinar. Bruk av elektroniske løysingar i innkjøpsprosessen skal
medverke til meir effektive offentlege innkjøp. Terskelverdiane
er sett på eit nivå som skal gi god balanse mellom transaksjonskostnader
forbundne med å følgje regelverket, og vinstar ved auka konkurranse.
Regjeringa meiner tiltaka samla sett vil føre til meir profesjonelle
offentlege innkjøp og betre ressursbruk.
Regjeringa foreslår tiltak innanfor områda leiing,
organisering og kompetanse om offentlege innkjøp. Tiltaka det er
gjort framlegg om i meldinga vil bli gjennomførte innanfor eksisterande budsjettrammer.
Tiltaka for å styrkje kompetansen vil i stor grad gjerast gjennom
arbeid i Difi.
Det er foreslått vidare utgreiing om oppretting
av universitets- eller høgskoletilbod. Regjeringa vil komme tilbake
til Stortinget om behov for løyvingar dersom det vert aktuelt å
opprette eit nytt undervisningstilbod.
Totalt for heile offentleg sektor bereknar ein
nytten av elektroniske innkjøp (elektronisk faktura blir halden
utanfor dette anslaget) til ca. 5,6 mrd. kroner og kostnadene til
ca. 2 mrd. kroner. Regjeringa tek sikte på at ny løysing for Ehandel.no
vil redusere kostnadene for å komme i gang med e-handel.
Oppretting av eit leverandørregister vil truleg
gi ytterlegare innsparingar ved innhenting og levering av dokument
ved offentlege innkjøpsprosessar. Dei økonomiske og administrative konsekvensane
ved etablering av eit slikt register vil bli vurderte i utgreiingane
som Difi gjennomfører.