Det blir i proposisjonen fremja forslag om å
regulere grunnbeløpet (G) med verknad frå 1. mai 2009 og å auke
løyvingar på statsbudsjettet for 2009 som følgje av reguleringa.
Regjeringa har lagt dei retningslinjene for
trygdeoppgjeret Stortinget fastsette i 2003 til grunn for framlegget,
jf. Innst. S. nr. 223 (2002–2003).
Det blir i proposisjonen gjort greie for drøftingane
mellom Regjeringa og Norsk Pensjonistforbund, Funksjonshemmedes Fellesorganisasjon,
Samarbeidsforumet av funksjonshemmedes organisasjoner, Landsorganisasjonen
i Noreg, Unio, Yrkesorganisasjonenes Sentralforbund og Akademikerne.
Partane blei samde om å auke grunnbeløpet med 2 625 kroner frå 1. mai
i år. Organisasjonane har ein protokolltilførsel der dei viser til
at ein i dei tre siste reguleringane har hatt eit større etterslep
grunna avvik mellom venta og faktisk lønnsutvikling. Dei meinar
at ein må ta omsyn til dette ved trygdeoppgjeret i 2010 om denne
utviklinga held fram.
Det gis framlegg om at grunnbeløpet blir auka frå
70 256 kroner til 72 881 kroner frå 1. mai 2009, det vil seie med
3,74 prosent. Det gjennomsnittlege grunnbeløpet aukar då med 4,2 prosent
frå 2008 til 2009.
Det blir i proposisjonen og gjort greie for
trygdedrøftingane i 2008 der partane blei samde om ein plan for
å trappe opp minstepensjonen til einslege pensjonistar.
I samsvar med dette blir det i proposisjonen
gjort framlegg om at den ordinære satsen for særtillegget skal vere
97 prosent av grunnbeløpet frå 1. mai 2009. Meirutgiftene for 2009
som følgje av høgare særtilleggssats er om lag 202 mill. kroner,
og er alt medrekna i statsbudsjettet for 2009, jf. St.prp. nr. 1
(2008–2009).
Som følgje av auken i særtillegget frå 1. mai 2009,
blir det i Ot.prp. nr. 99 (2008–2009) gjort framlegg om at satsane
for supplerande stønad blir auka tilsvarande. Kostnadene ved framlegget
er anslått til 2,4 mill. kroner, jf. Innst. O. nr. 129 (2008–2009).
Pensjonane til einslege minstepensjonistar auker då
frå 1. mai 2009 med 7 272 kroner til 143 568 kroner pr. år. For
ektepar der begge er minstepensjonistar aukar pensjonen med 13 776
kroner til 265 272 kroner pr. år.
Meirutgiftene for 2009 som følgje av høgare grunnbeløp
blir om lag 4 910 mill. kroner. I tillegg kjem auka utgifter til
statspensjonistane frå 1. mai 2009. Fornyings- og administrasjonsdepartementet
legg fram eigen proposisjon om dette.
Tabellen nedanfor viser utviklinga av minstepensjonane
og pensjonane for unge uføre fødde etter 1940 frå 1. mai 1992 etter
framlegget til pensjonsregulering
.
| Minstepensjon | Unge uføre fødde etter 1940 |
| Einslege | Ektepar | |
| Pr. år | Pr. md. | Pr. år | Pr. md. | Pr. år | Pr. md. |
1.05.92–30.04.93 | 58 583 | 4 882 | 94 752 | 7 896 | 87 096 | 7 258 |
1.05.93–31.12.93 | 59 868 | 4 989 | 96 816 | 8 068 | 88 992 | 7 416 |
1.01.94–30.04.94 | 59 868 | 4 989 | 101 0881 | 8 4241 | 88 991 | 7 416 |
1.05.94–31.12.94 | 61 116 | 5 093 | 103 200 | 8 600 | 90 852 | 7 571 |
1.01.95–30.04.952 | 61 512 | 5 126 | 103 992 | 8 666 | 90 852 | 7 571 |
1.05.95–30.04.96 | 63 372 | 5 281 | 107 136 | 8 928 | 93 600 | 7 800 |
1.05.96–30.04.97 | 66 240 | 5 520 | 111 984 | 9 332 | 97 836 | 8 153 |
1.05.97–30.04.983 | 69 360 | 5 780 | 117 456 | 9 788 | 101 412 | 8 451 |
1.05.98–30.04.994 | 81 360 | 6 780 | 140 040 | 11 670 | 108 252 | 9 021 |
1.05.99–30.04.00 | 84 204 | 7 017 | 144 912 | 12 076 | 112 032 | 9 336 |
1.05.00–30.04.01 | 88 032 | 7 336 | 151 512 | 12 626 | 117 132 | 9 761 |
1.05.01–30.04.02 | 92 100 | 7 675 | 158 520 | 13 210 | 122 544 | 10 212 |
1.05.02–30.04.03 | 97 140 | 8 095 | 167 208 | 13 934 | 129 252 | 10 771 |
1.05.03–30.04.04 | 101 964 | 8 497 | 181 2005 | 15 100 | 135 660 | 11 305 |
1.05.04–30.04.05 | 105 408 | 8 784 | 190 2486 | 15 854 | 140 244 | 11 687 |
1.05.05–30.04.06 | 108 852 | 9 071 | 199 5127 | 16 626 | 144 828 | 12 069 |
1.05.06–30.04.07 | 112 788 | 9 399 | 206 712 | 17 226 | 150 060 | 12 505 |
1.05.07–30.04.08 | 119 820 | 9 985 | 219 600 | 18 300 | 159 420 | 13 285 |
1.05.08–30.04.098 | 136 296 | 11 358 | 251 496 | 20 958 | 173 5329 | 14 461 |
1.05.09–30.04.1010 | 143 568 | 11 964 | 265 272 | 22 106 | 180 012 | 15 001 |
1 Heving av sats for særtillegget for ektepar
frå 1.01.1994. Ny sats 2 x 60,5 pst. av grunnbeløpet, dvs. dobbelt
av ordinær sats og ny minstesats.
2 Heving av sats for særtillegget frå 1.01.1995. Ordinær
sats utgjorde 61,55 pst. av grunnbeløpet.
3 Heving av sats for særtillegget frå 1.05.1997. Ordinær
sats utgjorde 63,2 pst. av grunnbeløpet (minstesats 57,5 pst).
4 Heving av sats for særtillegget frå 1.05.1998. Ordinær
sats utgjorde 79,33 pst. av grunnbeløpet, medan minstesats er 74
pst. av grunnbeløpet.
5 Grunnpensjonen for ektepar auka frå 0,75 G
til 0,8 G frå 1.05.2003.
6 Grunnpensjonen for ektepar auka til 0,825
G frå 1.05.2004.
7 Grunnpensjonen for ektepar auka til 0,85 G
frå 1.05.2005.
8 Ordinær sats for særtillegget auka til 94
pst. av grunnbeløpet frå 1.05.2008.
9 Dei medrekna framtidige pensjonspoenga for unge
uføre blei heva frå 3,30 til 3,50 frå 1.05.2008.
10 Ordinær sats for særtillegget vil auke til
97 pst. av grunnbeløpet frå 1.05.2009.
Kjelde: Arbeids- og velferdsdirektoratet
Pensjonane aukar til vanleg tilsvarande veksten
i grunnbeløpet. Gjennomsnittleg pensjon har likevel auka med meir
enn grunnbeløpet. Dette kjem av at pensjonistane i aukande grad
har tent opp tilleggspensjon. Pensjonane for ektepar og sambuande
auka sterkare enn grunnbeløpet i åra 2003–2008. Årsaka er at grunnpensjonen
for ektepar og sambuande auka frå 0,75 G til 0,8 G frå 1. mai 2003,
til 0,825 G frå 1. mai 2004 og til 0,85 G frå 1. mai 2005. Den siste
endringa fekk heilårsverknad i 2006.
Pensjonane for dei einslege minstepensjonistane auka
meir enn grunnbeløpet i same periode av di særtillegget ordinær
sats blei auka til frå 79,33 prosent til 94 prosent av grunnbeløpet
frå 1. mai 2008. For ektepar og sambuande med minstepensjon var
veksten sterkare av di grunnpensjonen blei trappa opp, samt at særtillegget
ordinær sats blei auka frå 79,33 prosent til 94 prosent av grunnbeløpet
frå 1. mai 2008.
Den historiske utviklinga av pensjonane viser
at minstepensjonen har hatt ein særleg sterk realvekst. Dette heng
saman med at satsane for særtillegget er trappa opp gjennom åra,
seinast gjennom den nemnde auken frå 1. mai 2008. Denne utviklinga
vil halde fram dei neste to åra som følgje av den vidare opptrappinga
av særtillegget som partane blei samde om i trygdeoppgjeret for
2008.
Det blir i proposisjonen gjort greie for dei
særlege skattereglane som gjeld for pensjonistar i 2009 er i hovudsak
ei vidareføring av skattereglane frå 1992.
Reguleringa har og konsekvensar for krigspensjoneringa,
og for 2009 blir det rekna med meirutgifter på 5 mill. kroner til
krigspensjoneringa for militærpersonar og 12 mill. kroner til krigspensjoneringa
for heimestyrkepersonell og sivilpersonar.
Krigspensjonane blir samordna med pensjonar frå
folketrygda. Det blir gjort framlegg om å auke løyvinga under kap.
660 Krigspensjonering med 17 mill. kroner for 2009.
På bakgrunn av at avtalefesta pensjon og pensjonstrygda
for sjømenn skal regulerast i høve til ytingane frå folketrygda,
blir det gjort framlegg om at statstilskottet til avtalefesta pensjon
(kap. 666 post 70) auka med 31 mill. kroner, og at løyvingane til
pensjonstrygda for sjømenn (kap. 664 post 70) aukar med 30 mill.
kroner.
I samsvar med trygdedrøftingane i 2008 blir
det i proposisjonen fremja forslag om at den ordinære satsen for
særtillegget skal vere 97 prosent av grunnbeløpet frå 1. mai 2009.
Særtillegget blir gitt med ein ordinær sats og ein minstesats (74
prosent av grunnbeløpet). Minstesatsen gjeld når pensjonisten har
ektemake eller sambuar som har tilleggspensjon større enn det ordinære særtillegget,
men ektemakane er likevel sikra samla tilleggspensjon og særtillegg
tilsvarande to gonger særtillegget etter ordinær sats. I andre høve
blir det gitt særtillegg etter ordinær sats, det vil seie både til
einslege minstepensjonistar og til ektepar der begge er minstepensjonistar.
Det vert gjort merksam på at pensjonistar med supplerande
pensjonar som er samordningspliktige med folketrygda, vil få dei
supplerande pensjonane samordna på nytt. Minstepensjonistar som
har tenestepensjon som er fullt opptent, vil såleis ikkje få ein
ekstra auke i samla pensjon ved at særtilleggssatsen blir heva til
97 prosent av grunnbeløpet frå 1. mai 2009. Minstepensjonistar som
har ein tenestepensjon i tillegg til folketrygda vil difor få ein
auke på 4,2 prosent frå 2008 til 2009.