Eit aktivt næringsliv og verdiskaping
er avgjerande for utviklinga av velferdssamfunnet. Næringspolitikken
er difor viktig for å trygga og fornya det norske velferdssamfunnet
og for å sikra sysselsetting og spreidd busetnad.
Komiteen viser til at delar av
norsk næringsliv no er inne i ei nedgangstid, med kraftig
avskaling innan delar av norsk industri og anna konkurranseutsett næringsliv.
Problema rammar teknologiindustrien og særleg arbeidsintensiv
industri. Tradisjonell industri blir òg møtt av
internasjonale utfordringar, ved at renta i Noreg er høg
og ved at timelønskostnadene sammenlikna med handelspartnarane
våre har auka merkbart. Komiteen viser til
at denne utviklinga gir store utfordringar for utforminga av den
norske næringspolitikken, og at det er særleg
viktig med langsiktige og stabile rammevilkår.
Komiteen vil understreka at det
no er svært viktig å føra ein aktiv politikk
for nyskaping, og leggje til rette for kreativitet, idear og nyetableringar.
Endringane i næringsstrukturen går fort, og mange
av dei tradisjonelle verksemdene kan få problem i tida
framover. For å sikra sysselsetting og framtidig verdiskaping,
er det difor viktig med kontinuerleg utvikling av nye verksemder.
Dette krev stor FoU-innsats og eit breitt verkemiddelapparat. Komiteen meiner
det er naudsynt med ein gjennomgang av verkemiddelapparatet. Komiteen meiner
ulike verkemidlar bør nyttast på ulike stadium
i ein innovasjons- og nyskapingsprosess.
Ein for ekspansiv budsjettpolitikk kan skapa
press i økonomien, som igjen svekkjer konkurransekrafta
til norsk næringsliv, difor er det avgjerande med ein økonomisk
politikk som sikrar norsk næringsliv stabile rammevilkår
og bidrar til å unngå tap av konkurransekraft
og marknadsdelar.
Det er i dag press i arbeidsmarknaden med mange ledige
stillingar. Samtidig har Noreg ein kraftig auke i talet på arbeidslause. Komiteen meiner
ein må føra ein brei sysselsettingspolitikk, og
i tillegg ein bevisst politikk for å kvalifisera den ledige
arbeidsstyrken for dei ledige stillingane. Den arbeidsreserven ein
finn i den eldre delen av folket må også nyttast
betre. Auken i talet på uføre må snuast
og sjukefråværet må ned.
For næringslivet er det viktig at arbeidet
med opprydding og forenkling av regelverket held fram.
Komiteen viser til at Noreg er
ein stor maritim nasjon som opererer i ein global marknad, og at
det for norsk skipsfart er ei utfordring å sikre både
den maritime kompetansen, og dessutan halde på stabile
konkurransevilkår for næringa.
Komiteen syner til at Såkornfond
kan utgjere ein viktig del av verkemiddelapparatet, og ber Regjeringa omtale
dette i den varsla verkemiddelgjennomgangen.
Komiteen meiner det
er viktig at matvaretryggleik vert prioritert, og at ein innan landbrukspolitikken
har stor fokus på trygg mat av god kvalitet. Dette krev
eit variert og forbrukarretta landbruk som legg til rette for auka
mangfald og nyskaping. Dette er òg viktig for å trygga
grunnlaget for det norske landbruket i åra framover. Komiteen stør
såleis opprettinga av Mattilsynet, og målet om
at 10 pst. av det totale jordbruksarealet skal vera økologisk
innan 2010.
Det er etter komiteen sitt syn
viktig å nytte verkemidlar som gir jordbruket høve
til sysselsetting og inntekt. Dette er av stor verdi for at landbruket
skal medverke til busetting og sysselsetting i distrikta. Samtidig er
det også viktig med tiltak som gir tydelege kostnadsreduksjonar
til omstillingar i heile matvarekjeda og forenkling av virkemiddelbruken,
og at næringsutøvaren si sjølvstendige
rolle i produksjonen vert styrkt.
Drøftingar i WTO, avtaler med EU og
andre internasjonale prosessar påverkar rammevilkåra
for den nasjonale mat- og landbrukspolitikken. Komiteen føreset at
Regjeringa aktivt påverkar desse prosessane, slik at ein
vert sikra eit handlingsrom for å føra ein aktiv
norsk landbrukspolitikk også i framtida.
Komiteen meiner det er nødvendig å auka
verdiskapinga i jord- og skogbruket og i foredlingsindustrien. Komiteen har
merka seg at Regjeringa har lagt om skogpolitikken.
Komiteen meiner at
nyskaping, vekst og konkurranseevne basert på marine ressursar
krev ein målretta forsking- og utviklingsinnsats. Noreg
har eit fortrinn innan fiskeri og havbruk gjennom naturgjevne vilkår, og
vår fiskeri- og havbruksnæring har særleg
mykje å seie for verdiskapning og busetting langs store
delar av kysten. Marin sektor er ein av dei sektorane Noreg må satse
på i framtida.
Komiteen peikar på at
fiskeripolitikken må baserast på ei berekraftig
forvalting, der ein tek omsynet til bestanden og til næringsutøvarane.
For å unngå store ulukker
langs kysten, er det viktig med auka fokus og auka innsats innan
den maritime trafikkontrollen.
Komiteen ber Regjeringen vurdere
om det innenfor eksisterende budsjett i samarbeid mellom involverte
departementer og institusjoner finnes en løsning som sikrer
at selskapet Protevs A/S får tilførsel
av kapital i 2003.