I kapittel 2 i Kredittmeldinga 2006 blir det
gitt generell informasjon om finansinstitusjonane og utviklinga i
finansmarknaden. Det blir også gitt ein omtale av den finansielle
stabiliteten. Kapittel 3 handlar om hovudtrekka i regelverksutviklinga
og dei viktigaste løyvesakene som departementet og Kredittilsynet
behandla på finansmarknadsområdet i 2006. Kapittel
4 omtalar verksemda til Noregs Bank i 2006, og inneheld mellom anna
ei vurdering av utøvinga av pengepolitikken. Omtalen av
verksemda til Noregs Bank er pålagd ved lov, jf. sentralbanklova § 30.
Kapittel 5 inneheld ein omtale av verksemda til Kredittilsynet i
2005. Omtalen i kapittel 4 og 5 bygger i stor grad på årsmeldingane
frå institusjonane. Kapittel 6 omtalar verksemda til Det internasjonale
valutafondet (IMF). Årsmeldingane frå Noregs Bank
og Kredittilsynet for 2006 følgjer som utrykte vedlegg
til meldinga.
Komiteen, medlemene frå Arbeidarpartiet,
Marianne Aasen Agdestein, Alf E. Jakobsen, Rolf Terje Klungland,
Torgeir Micaelsen, leiaren Reidar Sandal og Eirin Kristin Sund,
frå Framstegspartiet, Gjermund Hagesæter, Ulf
Leirstein, Jørund Rytman og Christian Tybring-Gjedde, frå Høgre,
Svein Flåtten, Peter Skovholt Gitmark og Jan Tore Sanner, frå Sosialistisk
Venstreparti, Magnar Lund Bergo og Heikki Holmås, frå Kristeleg
Folkeparti, Hans Olav Syversen, frå Senterpartiet, Per
Olaf Lundteigen, og frå Venstre, Lars Sponheim,
viser til at komiteen inviterte sentralbanksjef Svein Gjedrem til open
høyring om utøvinga av pengepolitikken i samband
med behandlinga av Kredittmeldinga 2006. Referatet frå høyringa
følgjer som vedlegg til denne innstillinga.