Alfred Jens Bjørlo (V): Kvifor antyder departementet i vedtaket om å godkjenne detaljreguleringsplan for Aksla steinbrot og utskipingshamn ved Bårdvikneset i Bremanger, noko som vil rasere eit område med den sjeldne naturtypen boreonemoral regnskog, at det er eit argument at aktuell grunneigar ikkje har søkt om frivillig skogvern av området, kan departementet i staden opplyse om korvidt ansvarlege faginstansar for skogvern har ønskt at området blir verna eller ikkje, og kvifor er det ikkje denne faglege vurderinga som er lagt vekt på i vedtaket?
Grunngiving
Departementet skriv i sitt vedtak om godkjenning av detaljregulering for Aksla i Bremanger kommune, og dette like etter at dei har omtala den sjeldne boreonemoral regnskogen at:
«Bremanger kommune har opplyst at det er vedteke frivillig skogvern av to andre lokalitetar av naturtypen i kommunen, Gaddeskogvatn ved Vingesetra og Bugen i Botnane. Det har ikkje vore forslag om vern av lokaliteten ved inste Bordvikneset (rik boreonemoral regnskog).»
Skogvern i Noreg skjer utelukkande gjennom ordninga med frivillig skogvern. Den går ut på at grunneigar melder inn til ein skogeigarorganisasjon at dei er interesserte i vern, og så legg ein av organisasjonane tilbodet fram for Statsforvaltaren.
Kor vidt eit skogområde er foreslått verna av grunneigar, seier difor ingenting om den reelle verneverdien av eit skogområde.
Det som seier noko reelt om verneverdien til eit område, er kor vidt Statsforvaltaren har meldt inn til skogeigarorganisasjonane om eit visst skogområde er ønskt i ordninga for frivillig skogvern. Etter det eg er kjend med, står Inste Bårdvikneset på denne «ønskjelista» til Statsforvaltaren i Vestland.
Eg vil be departementet stadfeste om dette er tilfelle, og kvifor departementet likevel skriv i sitt vedtak at det «..har ikkje vore forslag om vern av lokaliteten».