I denne proposisjonen legg Barne- og likestillingsdepartementet
fram endringsforslag på statsbudsjettet for 2009 i samsvar med punkt
1.2 nedanfor.
Tilskotet til krisesentra i 2009 er rekna til
å bli 11 mill. kroner høgare enn løyvinga i vedteke budsjett. Venta
utbetalingar i 2009 tilsvarar ein nominell auke på om lag 11 pst.
frå rekneskapen for 2008. Meirforbruket utover saldert budsjett
2009 kjem mellom anna av auka personalkostnader grunna lønnsvekst
og fleire tilsetjingar av frivillige i faste stillingar. Fleire
senter har òg utvida og rehabilitert lokala sine.
Departementet føreslår å auke løyvinga under kap.
840 post 60 med 11 mill. kroner.
Departementet føreslår å redusere løyvinga med 200 000
kroner som inndekning for lågare inntekter enn budsjettert under
kap. 3842 post 1, jf. omtale under denne posten.
Utgiftene til kontantstøtte i 2009 er rekna
til 1 515 mill. kroner, som er 23 mill. kroner meir enn løyvinga
i vedteke budsjett. Meirbehovet kjem av at det er fleire barn i
kontantstøttealder og færre barn i barnehage enn lagt til grunn
for anslaget i vedteke budsjett. I tillegg til at det er fleire
barn med kontantstøtte, er det høgare gjennomsnittleg utbetaling
per barn.
Departementet føreslår å auke løyvinga under kap.
844 post 70 med 23 mill. kroner.
Utgiftene til barnetrygd i 2009 er rekna til 14 800
mill. kroner, 80 mill. kroner meir enn løyvinga i vedteke budsjett.
Meirbehovet kjem i hovudsak av auka anslag på utbetalingar av ordinær
barnetrygd, utvida stønad til einslege forsørgjarar og ein større
vekst i etterbetalingane enn føresett i vedteke budsjett.
Departementet føreslår å auke løyvinga under kap.
845 post 70 med 80 mill. kroner.
Departementet føreslår å setje ned posten med 305 000
kroner som inndekning for meirforbruk på kap. 846 post 72.
Departementet føreslår å auke posten med 305 000
kroner mot tilsvarande nedjustering av post 50.
Gjeldande budsjett på posten er 10,4 mill. kroner.
Barneombodet har fått 316 000 kroner til følgjande tre prosjekt:
Etablering av barneombodsliknande
institusjonar i Kina.
Mekanismar for å tryggje ivaretaking av
barns rettar i samfunnet.
Konfliktråd/meklingsprosjekt i Kina.
I 2009 har Barneombodet teke initiativ til prosjektet
"Skjønner du hva jeg mener?", der ungdom gjennom kunstnariske uttrykk
skal formidle sitt tilhøve til det norske språket. Midlane på til saman
145 000 kroner frå den nedlagte stiftinga Framtidsfondet, vil bli
nytta i samband med prosjektet. Prosjektet skal gjennomførast i
samarbeid med andre aktørar.
Departementet føreslår derfor å auke kap. 850 post
1 med 461 000 kroner, tilsvarande auken under kap. 3850 post 1.
Gjeldande budsjett for 2009 på posten er 20,0 mill.
kroner. Talet på adopsjonar og utbetalingane til adopsjonsstønad
er lågare enn tidlegare lagt til grunn. Hovudgrunnen til nedgangen
er at samarbeidsland har frigitt færre barn for adopsjon til utlandet
enn tidlegare, samtidig som talet på adopsjonssøkjarar internasjonalt
aukar. Departementet ventar at det blir adoptert 325 barn totalt
i 2009. Talet på adopsjonar i 2009 ligg dermed på om lag same nivå
som i 2008.
Departementet føreslår å redusere kap. 852 post 70
med 7,0 mill. kroner.
Løyvinga på posten er på 54,4 mill. kroner i 2009.
Av dette er det sett av 8,0 mill. kroner til tilrettelegging av
butilbod for unge under 18 år som er offer for tvangsekteskap.
Prognosen for 2009 tilseier utgifter på 4,5
mill. kroner til tiltaket på posten. Bufetat har etablert butilbod
for unge utsette for tvangsekteskap. Årsaka til mindreforbruket
er at behovet for butilbodet har vore mindre enn forventa.
Departementet føreslår å redusere posten med 3,5
mill. kroner.
Gjeldande budsjett i 2009 er på 192,9 mill.
kroner. Posten dekkjer det særskilte tilskotet som vert utbetalt
til kommunane når einslege, mindreårige flyktningar og asylsøkjarar
er busette. Utgiftsnivået i 2009 er rekna til om lag 148 mill. kroner,
basert på ein prognose der 500 nye busette utløyser tilskot.
Departementet føreslår derfor å redusere løyvinga
på posten med 44,9 mill. kroner.
Løyvinga skal dekkje refusjon av kommunale utgifter
til barneverntiltak inkludert utgifter til bufellesskap og refusjon
av utgifter for plassering i statlege tiltak eller ved kjøp av private
plassar. Utgiftsnivået på posten avheng av kor mange barn som blir
busette i kommunane og kor stor del av alle einslege, mindreårige
asylsøkarar og flyktningar som har behov for barnevernteneste. Basert
på prognosane frå Bufdir om venta utbetalingar i 2009, føreslår
departementet å auke løyvinga på posten med 31,1 mill. kroner.
Etter forslag i St.prp. nr. 67 (2008–2009) Tilleggsbevilgninger
og omprioriteringer i statsbudsjettet 2009, blei løyvinga til det
statlege barnevernet auka som følgje av klientvekst og utgiftsnivået
frå 2008. Siste halvår 2009 har utgiftene per opphaldsdag auka meir
enn det som vart sett føre i St.prp. nr. 67 (2008–2009). Tildelinga
på posten er på 2 985,3 mill. kroner. Prognosen tilseier ein totalutgift
for 2009 på 3 128,3 mill. kroner og meirbehovet på posten utgjer dermed
143,0 mill. kroner.
Departementet føreslår å auke kap. 855 post
1 med 143,0 mill. kroner.
Tildelinga på posten er på 63,3 mill. kroner. Barne-,
ungdoms- og familiedirektoratet har sett i verk investeringsstopp
for å redusere meirutgiftene på kap. 855. Forbruk per andre tertial
2009 er på 22,4 mill. kroner og prognosen for totalforbruket ut
året er på 32,0 mill. kroner.
Departementet føreslår å redusere kap. 855 post 45
med 31,3 mill. kroner.
Som følgje av auken i talet på einslege, mindreårige
asylsøkjarar er det behov for fleire plassar i omsorgssenter for
denne gruppa enn tidlegare føresett. Prognosen tilseier at det i
2009 vil vere eit gjennomsnittleg belegg på 220 einslege, mindreårige
asylsøkjarar i omsorgssentra. Dette fører til auka driftsutgifter
på 53 mill. kroner i 2009.
Departementet føreslår å auke kap. 856 post
1 med 53,0 mill. kroner.
På kap. 857 post 71 er det tildelt midlar til
drift og utvikling av innhald og tenester på nettstaden ung.no.
Ein del av utgiftene til drift og utvikling av nettstaden er lønnsutgifter.
For å sikre rett postering føreslår departementet å omdisponere tildelinga
frå kap. 857 post 71 til kap. 857 post 21.
Departementet føreslår derfor å auke løyvinga på
kap. 857 post 21 med 0,4 mill. kroner og å redusere løyvinga på
kap. 857 post 71 tilsvarande.
Departementet føreslår å redusere løyvinga under
kap. 857 post 71 med 0,4 mill. kroner og å auke løyvinga under kap.
857 post 21 tilsvarande, jf. omtale under kap. 857 post 21.
Utgiftene til foreldrepengar ved fødsel i 2009
er anslått til 12 940 mill. kroner, som er 714,5 mill. kroner meir
enn løyvinga i vedteke budsjett. Venta meirutgifter kjem av eit
høgare overslag på talet på fødsler og auka overslag på lønnsveksten
frå 2008 til 2009. I tillegg til dette kjem utbetaling av restansar
på 440 mill. kroner.
Departementet føreslår å auke løyvinga under kap.
2530 post 70 med 714,5 mill. kroner.
Utgiftene til eingongsstønad i 2009 er rekna
til 435 mill. kroner, som er 35 mill. kroner meir enn løyvinga.
Meirbehovet kjem av fleire utbetalingar av eingongsstønad enn føresett
i vedteke budsjett, medrekna restansar.
Departementet føreslår å auke løyvinga under kap.
2530 post 71 med 35 mill. kroner.
Dei samla utbetalingane av feriepengar i 2009
er på 360 mill. kroner, som er 15 mill. kroner meir enn løyvinga
i vedteke budsjett.
Departementet føreslår å auke løyvinga under kap.
2530 post 72 med 15 mill. kroner.
Utgiftene til foreldrepengar ved adopsjon i
2009 er anslått til 70 mill. kroner, som er 30 mill. kroner mindre
enn løyvinga i vedteke budsjett. Den årlege nedgangen i talet på
adopsjonar held fram også for inneverande år, på grunn av at færre barn
er tilgjengelege for adopsjon frå utlandet.
Departementet føreslår å redusere løyvinga under
kap. 2530 post 73 med 30 mill. kroner.
Inntektene under posten er knytte til kurs,
rettleiing mv. i familievernet. Tal for andre kvartal tyder på ei
mindreinntekt på 200 000 kroner i høve til budsjettet. Departementet
føreslår å setje ned inntektene på posten med 200 000 kroner, jf.
inndekning under kap. 842 post 1.
I tråd med omtale under kap. 850 post 1 føreslår Barne-
og likestillingsdepartementet å auke inntektene med 461 000 kroner.
Dei ODA-godkjende utgiftene er rekna til å utgjere
om lag 44,9 mill. kroner i 2009, noko som er 21,5 mill. kroner mindre
enn tidlegare lagt til grunn.
Departementet føreslår å redusere kap. 3854
post 4 med 21,5 mill. kroner.
Inntektene på kapittel 3855 post 1 gjeld ulike prosjekt
og tiltak, mellom anna refusjonar for klientutlegg og utgiftsdeling
med andre statlege verksemder. Sidan 2006 er talet på barn og unge plasserte
i institusjon redusert med om lag 11 prosent, og dette vil redusere
refusjonane for klientutlegga. Inntektskravet på kapittel 3855 post
1 er på 40,6 mill. kroner i 2009. Prognosen per andre tertial tilseier
inntekter på 24,5 mill. kroner for 2009, noko som er 2,8 mill. kroner
lågare enn inntektene i 2008.
Departementet føreslår å redusere inntektene
på kap. 3855 post 1 med 16,1 mill. kroner.
Posten omfattar refusjonar utover den kommunale
eigendelen for utgifter til einslege, mindreårige asylsøkjarar og
flyktningar som er busette i kommunane og plasserte i statlege barnevernstiltak.
Inntektene motsvarar refusjonane som blir utgiftsført på kap. 854
post 65.
Prognosen for 2009 tilseier inntekter på 108,7 mill.
kroner, grunna ein auke i talet på einslege, mindreårige asylsøkjarar
med tiltak i det statlege barnevernet.
Departementet føreslår å auke kap. 3855 post
3 med 37,9 mill kroner.
Nokre innanlandske utgifter knytte til mottak
av asylsøkjarar og flyktningar kan, i samsvar med OECD/DACs statistikkdirektiv,
godkjennast som offisiell utviklingshjelp. I tråd med tidlegare utrekningar
legg BLD til grunn at om lag 74 prosent av utgiftene per plass vil
bli godkjend som ODA-midlar. Auken i ODA-godkjende utgifter utgjer
dermed 39 mill. kroner.
Departementet føreslår å auke kap. 3856 post
4 med 39,0 mill. kroner.