Det blir i proposisjonen fremja framlegg om
å auke løyvingar på statsbudsjettet for 2015 som følgje av reguleringa
av grunnbeløpet (G) og pensjonar i folketrygda og i visse andre
pensjonsordningar frå 1. mai 2015.
Ein syner til forskrift fastsett ved kongeleg
resolusjon 29. mai 2015 om grunnbeløp, reguleringsfaktorer, satser
for minste pensjonsnivå frå 1. mai 2015 og virkningstidspunkt for
regulering av kravet til minsteinntekt for rett til dagpengar.
Grunnbeløpet er auka frå 88 370 kroner til 90 068
kroner frå 1. mai, det vil seie med 1,92 pst. Uføretrygda og andre
som får pensjonar og ytingar regulerte gjennom endringar i grunnbeløpet,
får dermed ein tilsvarande auke frå same dato. Alderspensjon under
opptening vert også oppregulert med 1,92 pst.
Alderspensjon under utbetaling vert regulert
med lønnsauken på 1,92 pst. og deretter fråtrekt 0,75 pst. Dette
inneber at alderspensjonistar får auka pensjonen med 1,16 pst. frå
1. mai 2015.
Satsane for minste pensjonsnivå for alderspensjonistar
er auka med lønnsauken på 1,92 pst. og deretter justerte for effekten
av levealdersjusteringa, noko som inneber at satsane er auka med
1,42 pst. Satsane er frå 1. mai 2015 sette til 139 728 kroner for låg
sats, 162 566 kroner for ordinær sats, 175 739 kroner for høg sats
og 274 085 kroner for særskilt sats.
Meirutgiftene for 2015 som følgje av reguleringa av
grunnbeløpet og pensjonar vert om lag 3 213 mill. kroner.
For å sikre lik praksis for budsjettproposisjonar til
Stortinget, har departementet som utgangspunkt i vedtaksdelen i
denne proposisjonen nytta Prop. 119 S (2014–2015) som vart fremma
samtidig med revidert nasjonalbudsjett for 2015.
Alderspensjonistane kan i 2015 få ei negativ
utvikling i kjøpekraft. For å hindre ei utvikling der pensjonistane
får negativ kjøpekraft over tid samstundes som kjøpekrafta til lønnstakarane
aukar, vil regjeringa gjennomgå regelverket om regulering av pensjonar
og vurdere moglege endringar.
Ein syner til kapittel 3 i proporsjonen, som
gjer greie for utviklinga i grunnbeløpet, pensjonar og lønn dei
seinare åra.
Når det gjeld skattereglane for pensjonistar
i 2015 er dette gjort greie for i kapittel 4 når det gjeld:
I kapittel 5 og 6 i proposisjonen er det nærare gjort
greie for:
Pensjonar og ytingar
frå folketrygda
Pensjonar mv. frå Statens pensjonskasse
Avtalefesta pensjon i privat sektor
Pensjonstrygda for sjømenn
Krigspensjonering
Supplerande stønad til personar med kort
butid i Noreg
Reglane for regulering av pensjonar i folketrygda går
fram av folketrygdlova §§ 1-4, 19-14 og 20-18 og forskrift 6. mai
2011 nr. 465 om beregning av lønnsveksten som skal benyttes ved
regulering av grunnbeløpet og alderspensjon i folketrygda.
Alderspensjon under utbetaling skal regulerast med
eit gjennomsnitt av lønns- og prisveksten. Dette skjer ved at pensjonen
vert regulert i samsvar med lønnsauken og deretter fråtrekt ein
fast faktor på 0,75 pst.
Det vises til kapittel 2 i proposisjonen der
det er gjort detaljert greie for reglane for reguleringane, samt
regulering av grunnbeløpet, pensjonar og satsane for minste pensjonsnivå
frå 1. mai 2015.
Grunnlaget for reguleringa har vore drøfta med Pensjonistforbundet,
Seniorsaken, Forsvarets seniorforbund, Landslaget for offentlige
pensjonister, Funksjonshemmedes Fellesorganisasjon, Samarbeidsforumet
av funksjonshemmedes organisasjoner, Landsorganisasjonen i Norge,
Unio og Yrkesorganisasjonenes Sentralforbund.
Det vert lagt til grunn ein venta lønnsauke
på 2,7 pst. i 2015 i tråd med anslaget til regjeringa som går fram
av revidert nasjonalbudsjett for 2015. I trygdeoppgjeret 2014 vart
det lagt til grunn for reguleringa av grunnbeløpet ein venta lønnsauke
på 3,3 pst. i 2014 i tråd med anslaget til regjeringa som går fram av
revidert nasjonalbudsjett for 2014. Faktisk lønnsauke for 2014 er
nå anslått til 3,1 pst. i rapporten «Grunnlaget for inntektsoppgjørene
2015» frå Det tekniske berekningsutvalet for inntektsoppgjera av
30. mars 2015. Partane er samde om at det ligg føre eit negativt
avvik på 0,2 prosentpoeng for 2014. I trygdeoppgjeret 2014 vart
det lagt til grunn ein faktisk lønnsauke på 3,9 pst. i 2013. Faktisk
lønnsauke for 2013 er i rapporten frå Det tekniske berekningsutvalet
for inntektsoppgjera framleis sett til 3,9 pst. Partane er samde
om at det dermed ikkje ligg føre eit avvik for 2013.
Med dagens reguleringsreglar vil pensjonistane normalt
få ei årleg betring av kjøpekrafta, men noko lågare enn for lønnstakarane.
I år med moderate lønnsoppgjer, der lønnstakarane får ein lønnsauke som
berre er litt høgare enn forventa prisvekst, kan fråtrekket på 0,75
pst. føre til at pensjonistane får ei negativ utvikling i kjøpekrafta.
Regjeringa vil difor gjennomgå prinsippa for
den årlege reguleringa av pensjonar. Siktemålet er å unngå ei utvikling
over fleire påfølgande år der pensjonistane får minska kjøpekraft,
samstundes som arbeidstakarane får auka kjøpekraft. I denne samanhengen
skal ein vurdere ei eller anna form for glattingsmekanisme.
Til grunn for gjennomgangen skal liggja ein
føresetnad om at eventuelle endringar ikkje må svekke bærekrafta
i pensjonssystemet. Det skal ikkje gis nokon garanti mot minska
kjøpekraft i enkelte år. Ein skal framleis justere for eventuelle
avvik mellom forventa og faktisk lønnsauke dei siste to åra.
Gjennomgangen vil ikkje påverke trygdeoppgjeret
i år, men skal vere klar i god tid før trygdeoppgjeret neste år.
Ein skal like fullt vurdere om eventuelle endringar skal gjelde
frå og med 2016, eller om ein ved trygdeoppgjeret i 2016 også skal
ta omsyn til ei eventuell minska kjøpekraft i 2015.