Endra
takstar for legar, psykologar og fysioterapeutar
Helse- og omsorgsdepartementet
gjer med dette framlegg om endringar i budsjettet for legehjelp
og psykologhjelp. Dette på grunnlag av forhandlingar med Den norske
legeforening og Norsk Psykologforening, og at departementet får
fullmakt til å gjere endringar i driftstilskot og folketrygdrefusjonar
for fysioterapi frå 1. november 2020. Endringane for fysioterapi
vert gjort på grunnlag av forhandlingar med dei tre fysioterapeutorganisasjonane
Norsk Fysioterapeutforbund, Norsk Manuellterapeutforening og Privatpraktiserende
Fysioterapeuters Forbund. Endringar i refusjonstakstane vert fastsett
i forskrifter. Forhandlingane med dei nemnde fysioterapeutorganisasjonane
er enno ikkje avslutta. Regjeringa vil kome attende til Stortinget
med framlegg om eventuelle løyvingsendringar.
Basistilskot, driftstilskot
og takstar for legar, psykologar og fysioterapeutar vert fastsett
for perioden 1. juli til 30. juni påfølgjande år. Forhandlingane
finn normalt stad i mai/juni. På grunn av koronapandemien vart forhandlingane
i vår utsett til september. Det vart inngått avtalar med legeforeningen,
psykologforeningen og fysioterapeutorganisasjonane om videreføring
av inngåtte avtalar frå 1. juli 2020 til 1. november 2020.
Tingingane med Den
norske legeforening og staten, KS og dei regionale helseføretaka
om basistilskot, driftstilskot og takstar for tidsrommet 1. november
2020–30. juni 2021, tok til 3. september 2020. Tingingane mellom
fysioterapeutorganisasjonane og staten og KS om driftstilskot og
takstar starta 14. september. Tingingane om driftstilskot og takstar
mellom Norsk Psykologforening og staten og dei regionale føretaka
starta 24. september.
I tingingane med
Norsk Psykologforening er partane einige om ei regulering av honorartakstar,
driftstilskot og avsetjing til fond tilsvarande 1,9 pst. frå 1. november.
Dette inneber at kap. 2711 post 71 må aukast med 1,55 mill. kroner
i 2020. Verknaden for 2021 er 9,3 mill. kroner. Budsjettet for 2021
må aukast med dette.
I tingingane med
Den norske legeforening er partane einige om ei nominell vidareføring
av honorartakstane, basis- og driftstilskot og avsetjing til fond.
Avtala inneber at 2,5 mill. kroner vert flytta frå kap. 762 Primærhelsetjeneste,
post 63 Allmennlegetjenester til kap. 2755 Helsetjenester i kommunene
mv., post 70 Allmennlegehjelp.
Forhandlingane med
fysioterapeutorganisasjonane er ikkje avslutta.
Eventuelle endringar
i utgiftene til kommunar og folketrygda frå 1. november på bakgrunn
av forhandlingane med fysioterapeutorganisasjonane kan ikkje leggjast
fram for Stortinget til handsaming i oktober. Regjeringa gjer difor
framlegg om at det vert gitt fullmakt til å gjere endringar i budsjetta
til trygderefusjonane og løyvingane til kommunane som følgje av
forhandlingane, samt endra forskriftar. Desse løyvingssakene vert
lagde fram for Stortinget seinare.