Arne Haukvik (Sp):
Eg tillèt meg å
stille følgjande spørsmål:
Trondheim har eit sterkt levande
musikkliv, framifrå symfoniorkester, utruleg mange gode kor og stor
interesse også for opera. I tillegg har dei ferdig nye lokale i
Olavshallen.
Vil statsråden ta eit initiativ, slik
at alle desse gode kreftene kan sameinast fram mot byjubileet i 1997,
eventuelt med hjelp frå Operaen i Kristiansund og Den Norske Opera?
Statsråd Grete Faremo:
Departementet
har med glede registrert at kulturarrangement av ulike slag står svært
sentralt i planane for feiringa av 1000-årsjubileet i Trondheim. Det er i
denne samanhengen viktig at staten har eit direkte tilskotsansvar for fem
kulturinstitusjonar i denne byen:
- Nordenfjeldske
Kunstindustrimuseum
- Ringve
musikkhistoriske museum
- Trondheim
Symfoniorkester
- Trøndelag
Kunstgalleri
- Trøndelag
Teater
Desse institusjonane fekk eit samla
statleg driftstilskot i 1995 på 59.067.000 kr.
Ansvaret for eit byjubileum - jamvel
om det er tale om eit 1000-årsjubileum - må liggje til vedkomande kommune og
dei institusjonane som har sin base der. På kulturområdet må vi såleis i
dette tilfellet kunne forvente at dei institusjonane som er nemnde ovanfor,
i 1997 vil tilpasse aktivitetane sine i form av utstillingar, førestillingar
og andre formidlingstiltak på ein måte som kan inngå i heilskapen for
feiringa av Trondheim bys 1000-årsjubileum.
Det kan i tillegg vere naturleg at
sentrale kulturinstitusjonar utanfor Trondheim tek del i markeringa av
byjubileet i form av vandreutstillingar, turnear og gjestespel. Det
naturlege vil i så fall vere at lokale instansar sjølve inviterer til eit
slikt engasjement. Kulturdepartementet ser det ikkje som ei oppgåve å
samordne dette.
Prinsipielt kan det ikkje leggjast til
grunn at staten skal medverke med særskild finansiering av byjubileum.
Eventuelle søknader frå kommunen eller institusjonar i og utanfor Trondheim
til eit departement eller annan statleg instans om tilskot til prosjekt
eller arrangement knytte til byjubileet vil måtte vurderast på vanleg måte.
Elles er det naturleg å minne om at
staten medverkar tungt, totalt med 150 mill. kr, til realiseringa av den nye
teaterbygninga til Trøndelag Teater som no er under oppføring i Trondheim,
og som vil vere ferdigstilt til jubileumsåret.
Arne Haukvik (Sp):
Eg takkar for
svaret, som var interessant og positivt for så vidt.
Eg er samd i at det må eit lokalt
engasjement til dersom ein skal utvide området for kva ein har lyst til å
markere ved 1000-årsjubileet. Som statsråden òg sa, får dei ferdig sitt
nye, fine tetater, som for ein stor del er finansiert av statlege midlar.
Likevel vil eg be statsråden om å vurdere om ikkje ei gåve frå det norske
samfunnet til 1000-årsjubileet kunne gå m.a. til musikklivet. For å slå eit
slag for at operatanken òg skal leve vidare i 1000-årsbyen Trondheim, tillet
eg meg å oppmode statsråden om å ta med desse tankane tilbake til sin
kollega i Regjeringa og sjå kva ein kan finne på fram til neste år.