Hallgrim Berg (H):
Eg skal få lov til
å stilla følgjande spørsmål til den vyrde ministeren for kyrkje, utdanning
og forsking:
Det største barokkorgelet i verda nord
for Hamburg finst på Kongsberg, men har etter skade vore ute av bruk sidan
1880. Restaureringa av dette eineståande klenodiet er ei nasjonal sak og
har utløyst eit breitt engasjement frå Kyrkja, private lag, organisasjonar
og offentlege instansar med sikte på ferdigstilling 31. desember 1999.
Kan ein rekne med at også
departementet vil ta sin del av ansvaret for at dette målet blir nådd i
tide?
Statsråd Reidar Sandal:
I forståing
med kulturministeren vil eg som kyrkjeminister svare på spørsmålet frå
representanten Berg.
La meg først få presisere at det etter
gjeldande kyrkjelovgjeving er eit kommunalt ansvar å skaffe, halde ved like
og restaurere inventar og utstyr i kyrkjene. Dette vil òg gjelde orgel.
Til vanleg vil departementet derfor måtte avslå søknader om statleg tilskot
til slike tiltak.
Når det gjeld barokkorgelet i
Kongsberg kyrkje, er eg merksam på at dette orgelet er eineståande i sitt
slag. Eg er dessutan imponert over at den lokale komiteen som arbeider for
å restaurere orgelet, har makta å samle inn ca 7,5 mill. kr til tiltaket.
Restaureringa av orgelet har ein samla kostnad på ca 10 mill. kr. Komiteen
har på denne bakgrunn søkt Kyrkje-, utdannings- og forskingsdepartementet om
eit tilskot på 2,5 mill. kr, som er det som står igjen for å sikre
finansieringa.
Søknaden frå den lokale komiteen er
til vurdering i departementet. Eg meiner det i denne saka er grunn for
departementet til å gje eit visst tilskot til restaurering av barokkorgelet.
Samstundes må eg leggje til at departementet har avgrensa midlar til
disposisjon for slike tiltak, og at eg derfor ikkje kan gje nokon lovnad om
at tilskotet vil nå opp i den storleiken som det er søkt om.
Hallgrim Berg (H):
Eg vil få takka
statsråden hjarteleg for svaret. Det må jo seiast å vera uvanleg positivt
at det her blir vedgått at me har med eit eineståande klenodium å gjera.
Faktisk er det, som eg sa, det største orgelet i sitt slag i Nord-Europa.
Det har 42 stemmer, Wagner-orgelet i Nidarosdomen har til samanlikning 30.
Det vil sikkert bli ei oppleving å kunna skapa og møta klangbilete,
klangfargar, som er utruleg lyse og rike. Så der er me samde.
Men eg ville gjerne at statsråden
svara litt meir forpliktande. Eg trur nok at det som no er samla inn
lokalt, faktisk 8 mill. kr, har nådd sitt tak når det gjeld det som det er
naturleg å rekna med å få inn frå pengerulling. Eg lurar difor på om det
går an å få svar på om løyvinga kan gjerast for året som kjem, for ein må
snart til med kontraktinngåing med orgelbyggjarar og ekspertar.
Statsråd Reidar Sandal:
Eg vil først
få lov til å peike på at spørsmålet som knyter seg til statleg tilskot i
samband med orgelet i Kongsberg kyrkje, òg er reist av andre enn
representanten Berg. Blant andre har stortingspresident Kolle Grøndahl
drøfta denne saka med meg relativt grundig.
Eg har lyst til å vise til at
representanten Berg sa det var eit uvanleg positivt svar som blei gjeve.
Derfor må eg få lov til å seie at eg var noko overraska over at
representanten Berg med eit slikt generelt inntrykk, ville ha endå meir
forpliktande ytringar. Eg meiner han har fått eit løfte frå denne
talarstolen i dag som burde gjere representanten svært nøgd.
Hallgrim Berg (H):
Som eg sa, var eg
både takksam og hjarteleg nøgd med svaret. Grunnen til at eg kanskje masar
lite grann, er at denne storhendinga skal gå av stabelen nyttårseftan 1999,
og det krevst ganske lang tid å få dei internasjonale konsulentane og
orgelekspertane på plass og få til framdrifta i dette store prosjektet. Det
ville vera veldig fint om me kunne få ei klar datering på når det var mogleg
å få stilt ein garanti eller pengesum til rådvelde, men slik som statsråden
har ordlagt seg no to gonger, er eg så nøgd at eg ikkje har tenkt å gjera
meir med saka med det første.