Til Stortinget
Krigsbarna sin situasjon i Noreg i etterkrigstida er eit dystert
kapittel i vår nære fortid. Mange tusen barn fødde
med tysk far og norsk mor har vore utsette for ein kollektiv urett
som samfunnet må rette opp. Det er no snart 60 år
sidan den andre verdskrigen tok slutt. Det er såleis på høg
tid at denne saka no kjem til sin ende.
Våren 1998 blei det tatt eit initiativ ifrå Sosial-
og helsedepartementet for å utarbeide ein kunnskapsstatus
om krigsbarna. Det var ynskjeleg å kartleggje oppveksttilhøve
og undersøkje påstandar om offentleg underslag
av midlar, trakassering og maktovergrep. Noregs forskningsråd
fekk oppdraget. Året etter vart det utarbeidd ei såkalla «Kvitbok»,
ei samling offentlege dokument om dette temaet. Dessutan kom rapporten «Fiendens
barn».
Denne rapporten konkluderte mellom anna med at det var behov
for eit større forskingsmateriell for å få klårlagd
krigsbarna sine oppvekstvilkår, dei overgrep dei måtte
ha opplevd og dei forsømingar frå samfunnet krigsbarn
kan ha vore utsette for. Regjeringa løyvde difor midlar
til eit omfattande forskingsprosjekt. Resultata av desse granskingane
vil liggje føre om tre år frå no. Forslagsstillaren
meiner at den pågåande forskinga ikkje er til
hinder for at det parallelt blir førebudd erstatnings-
og oppreisningstiltak for dei barna som er ramma. Det må understrekast
at det undervegs i førebuinga av førre forskingsprosjekt kom
klart fram at slett ikkje alle i gruppa krigsbarn er interesserte
i at det blir «rippa opp» att i denne delen av
krigssoga. Det bør likevel ikkje vere til hinder for ein
gjennomgang for dei mange som enno slit med vonde minne og påkjenningar
og som er merkte av det dei har opplevd. Tilbod om to nasjonale
identitetar, inntektsbortfall, svekka pensjonsrettar er døme på tema
som høyrer med i ein slik samanheng.
Hausten 2001 vart det ført ei rekkje rettssaker mot staten
kor krigsbarn gjekk til sak av di dei meinte staten stod ansvarleg
for den fornedrande behandlinga dei hadde vore utsette for. Saksøkjarane
fekk ikkje medhald. I dommen heiter det mellom anna:
«Retten kan etter dette vanskelig se at en fortsatt prøving
av saken vil kunne føre med seg noe godt for saksøkerne.
Partene er enige om at behandlingen av krigsbarna i Norge ikke er
et avsluttet kapittel. Etter rettens mening vil det være
best for alle involverte at spørsmålene overlates
til historikerne og politikerne, ikke til juristene.»
Forslagsstillaren meiner Stortinget må ta sin del av
ansvaret for å sjå til at den uretten som er gjort både
direkte frå det offentlege si side, men òg frå samfunnet
elles mot desse barna, blir retta opp. Dei har fått ei
orsaking gjennom statsminister Kjell Magne Bondevik sin nyårstale
1. januar 2000. Dei har også rett til ei moralsk
oppreising og ei særskild vurdering i høve til
eit økonomisk oppgjer frå samfunnet.
På denne bakgrunn vert det fremja følgjande
forslag:
Stortinget ber Regjeringa oppnemne ein kommisjon som skal vurdere
eit særskilt krigsbarnoppgjer. Kommisjonen skal vurdere
grunnlaget for ei oppreisning mot desse barna og tilrå kva
form eit slikt oppgjer skal ha.
10. april 2002