Sveinung Rotevatn (V): Kva er grunngjevinga for grensa på 10 MW i forslaget til endring i Lov om elsertifikater, og kva konsekvensar vil det få om denne grensa vert fjerna?
Grunngiving
Olje- og energidepartementet sendte forslag til endring av Lov om elsertifikater på høyring i desember med høyringsfrist 19. januar i år.
Ei av endringane som er foreslått, er å utvide overgangsordninga til å inkludere vasskraftverk med installert effekt under 10 MW(Megawatt). I høyringsrunda vert det peikt på at grensa på 10 MW ikkje er i tråd med dåverande olje- og energiminister Einar Steensnæs sitt løfte frå desember 2003 om ei slik ordning. Løftet vart gjeve samstundes med at han la fram ei energimelding til Stortinget der sikring av forsyninga gjennom vinteren var hovudpoenget.
I høyringsrunda kjem det også fram at utvidinga av overgangsordninga med ei øvre grense på 10 MW fører til at 240 småkraftverk med ein samla årleg energiproduksjon på 2,1 TWh (Terrawattimar) vert teke inn i ordninga, medan tre kraftverk som er nybygd i overgangsperioden med samla energimengde på 0,35 TWh fell utanfor. Alle tre ligg i Sogn og Fjordane og har økonomiske problem som fylgje av at dei ikkje er omfatta av sertifikatordninga i dag. Blant dei tre er også det einaste nybygde kraftverket i perioden som har magasin og som dermed sikrar forsyninga gjennom vinteren.