Det særskilde tilskotet til samiske
barnehagar vart overført til Sametinget 1. januar 2001.
Sametinget har utarbeidd nye retningslinjer som tok til å gjelde
frå 1. januar 2002. Sametinget er òg styrkt med
midlar til informasjons- og rettleiingsarbeid for samiske barnehagar
og barnehagar med samiske barn. Sametinget har ansvaret for satsinga
i dei samiske barnehagane i tilknyting til den treårige
kvalitetssatsinga i barnehagesektoren frå Barne- og familiedepartementet.
Kunnskapane til barnehagepersonalet i samisk
språk og kultur er avgjerande føresetnader for
at barn i samiske barnehagar skal få styrkt og utvikla
språket sitt og identiteten sin. Barne- og familiedepartementet
vil i samarbeid med Sametinget greie ut spørsmålet
om stipend for studentar som tek samisk førskulelærarutdanning.
I tillegg skal ein klarleggje behovet for etter- og vidareutdanningstiltak
for personalet i samiske barnehagar og i norskspråklege
barnehagar med samiske barn.
Det er eit stort behov for forsking på området
oppvekst og sosialisering i samiske samfunn. Derfor er det òg
viktig å hente inn meir kunnskap om barnehagen som oppvekstarena
for samiske barn. Barne- og familiedepartementet ser desse behova
saman med den treårige kvalitetssatsinga.
Barne- og familiedepartementet vil medverke
til at samiske barn og unge får betre vilkår for
eigne kulturelle aktivitetar i lokalsamfunnet sitt.
Barne- og familiedepartementet samarbeider med Sametinget
om eit hefte som skal stimulere kommunane til større påakting
og auka innsats overfor samiske barn og unge.
Departementet har i fire år hatt eit
utviklingsprogram for å styrkje oppvekstmiljøet.
Dei tre første åra var Tana kommune med. Rapporten
frå dei første åra i programmet, med
omtale av arbeidet i Tana - ein av ti kommunar i programmet, blir
gitt ut i 2002.
Barne- og familiedepartementet arbeider for å styrkje det
ungdomspolitiske samarbeidet i Barentsregionen, i tråd
med dei prioriteringane som ligg i handlingsplanen som vart vedteken
på Ungdoms-ministerkonferansen i Tromsø i
mai 2001.
Sosial- og helsedepartementet har i 2001 løyvd
2 mill. kroner til Universitetet i Tromsø til drift av
Senter for samisk helseforsking. Formålet med senteret
er å skaffe dokumentasjon som betrar kunnskapsgrunnlaget for
fagleg utvikling av helse- og sosialtenester til det samiske folket.
I 2001 vart det løyvd 2,8 mill. kroner
til Finnmark fylkeskommune til drift av spesialisthelsetenesta for samefolket.
For 2001 disponerer ein 5,3 mill. kroner til forsøks- og
utviklingsarbeid, og av desse midlane vart 4,6 mill. kroner overførte
til Sametinget for vidare fordeling. Dette inkluderer vidareføring
av rehabiliteringsstipend.
Kultur- og kyrkjedepartementet har gjort framlegg om å endre
organiseringa av arbeidet for samiske språk, jf. Ot.prp.
nr. 114 (2001-2002). Framlegget går ut på at Sametinget
skal arbeide for vern og vidare utvikling av samisk språk
i Noreg. Formålet med endringa er å leggje til
rette for at arbeidet med samiske språk blir organisert
av det organet som har best kunnskap om samiske tilhøve
og kjenner behova best.
Informasjonstiltak om språkreglane
i samelova er ei oppgåve som departementet vil prioritere
etter at delar av regelverket har vorte endra.
Statlege tilskot til kommunar og fylkeskommunar
for opplæring i og på samisk har vore drøfta
sidan tidleg i 1990-åra. I 1999 gjekk ein over frå tilskot
etter ein fast faktor for kvar kommune per elev til ei vurdering
av talet på faktiske gruppetimar i eller på samisk.
Kommunane er ikkje nøgde med denne nye ordninga i dag.
Utdannings- og forskingsdepartementet vil på bakgrunn
av rapportane sjå på utrekningsmåten
for tilskotet på nytt.
Utdannings- og forskingsdepartementet har oppnemnt
eit arbeidsutval på fire personar til å sjå nærare på ein
del spørsmål rundt opplæring for vaksne
samar i den 13-årige skulegangen. Arbeidet blir fullført
hausten 2002.
Som nemnt i St.meld. nr. 55 (2000-2001) fekk
Statens utdanningskontor i Nord-Trøndelag to studieheimlar
frå 1. august 2002. Dei går til lærarar
for vidareutdanning i sørsamisk med bindingstid ved skular
der det blir gitt opplæring i sørsamisk. Dette
er ei utviding av ei ordning som har fungert i ei årrekkje
i dei tre nordlegaste fylka.
Utdannings- og forskingsdepartementet (UFD)
legg òg vekt på at utviklingsarbeidet i Sørsameprosjektet/prosjektet
Sørsamisk opplæring ved heimeskulane skal omfatte
heile det sørsamiske området. Parallelt med innkøyringsfasen
av Sørsameprosjektet i Nordland og Sør-Trøndelag,
har det gått føre seg planlegging av skuleutvikling
i Røros-området. Departementet ser positivt på dette
engasjementet.
St.meld. nr. 34 (2001-2002) Kvalitetsreformen.
Om høyere samisk utdanning og forskning, frå Utdannings- og
forskingsdepartementet er til handsaming i Stortinget. Denne meldinga
har vurdert fleire utfordringar og behov som Sametinget har lagt
vekt på i årsmeldinga. Meldinga inneheld ei rad
tiltak for å styrkje samisk utdanning og forsking.
Hausten 2001 oppnemnde Kyrkje-, utdannings-
og forskingsdepartementet eit arbeidsutval som skulle vurdere kva
for tilknytingsform dei to samiske vidaregåande skulane
skulle ha. Gruppa overleverte rapporten i august 2002.
Arbeidsgruppa tilrår at dei to samiske
vidaregåande skulane i Karasjok og Kautokeino blir knytt
til Sametinget. Saka er no til behandling i Utdannings- og forskingsdepartementet.
Sametinget har frå 17. januar 2001
fått fullmakt etter kulturminnelova og ansvar og oppgåver
på kulturminneområdet som svarar til det som tidlegare
låg under Samisk kulturminneråd. Det geografiske
ansvarsområdet strekkjer seg frå Hedmark i sør
til Finnmark i nord. Ordninga er gjord mellombels og skal evaluerast
i 2002-2003.
Frå og med statsbudsjettet 2002 er
løyvingar til ulike samiske kulturformål gitt
under ein post som ei samla løyving. Forvaltningsansvaret
for mellom anna De Samiske Samlinger og samiske museum på tilskotsordninga
for museum er overført til Sametinget. Ved De Samiske Samlinger
i Karasjok er det planar om å etablere ei ny biletkunstavdeling.
I investeringsplanen til Kultur- og kyrkjedepartementet for kulturbygg
er det lagt opp til å gi tilskot til å realisere
planane etter 2005. Statlege oppgåver knytte til samisk
kunstutdanning er eit ansvarsområde som ligg under Utdannings-
og forskingsdepartementet.
Punkt 2.2.7 i årsmeldinga frå Sametinget
omhandlar prosjektet om filmatisering av Kautokeino-opprøret
i 1852, oppbygging av ein filmby i Kautokeino og eventuelle statlege
løyvingar til dette prosjektet. Denne saka vart fremma
som eit dokument 8-framlegg. Stortinget handsama saka i Innst. S.
nr. 196 (2001-2002), hvor flertallet uttaler:
"Flertallet i komiteen kan, i likhet med Kultur-
og kirkedepartementet, ikke tilrå at dette prosjektet prioriteres
foran samiske kulturbygg som er omtalt i investeringsplanen."
Under omtalen av samiske næringar (kap.
2.2.7.2 i meldinga) framhevar Sametinget behovet for å verne om
beiteområda for reindrifta. Gjennom den kommunale arealplanlegginga
- kommuneplan, reguleringsplan og utbyggingsplan - har kommunane
eit ansvar for å ta omsyn til dei særskilde behova
for nødvendige areal som reindrifta har, alt tidleg i planprosessane.
Når det gjeld samarbeidet mellom reindrifta og kommunane,
viser Regjeringa til St.meld. nr. 33 (2001-2002) Tilleggsmelding
til St.meld. nr. 55 (2000-2001) Om samepolitikken, kap. 14.2.3.
Regjeringa ser det som viktig at det blir sett
i verk tiltak som reduserer rovdyrtapa, og at reindriftsareala blir sikra.
I tillegg til problem med tap av rein på grunn av rovvilt,
kan inngrep i beiteområda og eit høgt reintal føre
til for stor belastning i dei områda som er att.
Regjeringa tek sikte på å dra
nytte av den kompetansen som er i reindriftsnæringa, i
forvaltninga av næringa. Regjeringa meiner at verdiskapingsprogrammet
for reindrift er eit viktig tiltak for å sikre ei positiv økonomisk
utvikling i næringa.
Det skal òg utarbeidast ei ny stortingsmelding
om rovviltforvaltninga i 2003. Rovviltrådet for reindrifta er
i 2002 invitert til å vurdere fleire relevante sider av arbeidet
med meldinga og kome med synspunkt alt før meldingsarbeidet
er i gang. På liknande måte har vi òg eit
samarbeidsforum for sauenæringa for å få innspel
til meldingsarbeidet.
Fiskeridepartementet held for tida på med
eit prosjekt for å kartleggje alle typar konfliktar ved
bruk av areal i kystsona. Denne kartlegginga går inn i
grunnlaget for Fiskeridepartementet sitt vidare arbeid med arealbruk
i kystsona. I denne samanhengen kan det vere naturleg å vurdere
forholdet til samiske rettar.
Når det gjeld fylkesplanlegging og
innvendingsordning etter plan- og bygningslova, er dei nemnde problemstillingane
i ettertid også drøfta i St.meld. nr. 19 (2001-2002)
Nye oppgåver for lokaldemokratiet - regionalt og lokalt
nivå. Planlovutvalet presenterer dei endelege tilrådingane
sine i neste delinnstilling, som skal liggje føre i desember
2002. Regjeringa har merka seg synsmåtane til Sametinget
og vil ta omsyn til dei når desse problemstillingane seinare
blir handsama.
Miljøverndepartementet seier seg lei
for at Sametinget ikkje fann det mogleg å kommentere nasjonalrapporten
for oppfølging av konvensjonen om biologisk mangfald våren
2001, men reknar med at Sametinget har synspunkt til seinare innspel
frå Noreg til konvensjonen. Når det gjeld den
nasjonale oppfølginga gjennom St.meld. nr. 42 (2000-2001)
Om biologisk mangfald, har 14 departement laga fleire kapittel. Sametinget
har eit eige innlegg som er gitt i vedlegg. Det markerer synspunkta
deira, og at dei ikkje er instruerte av Regjeringa.
I årsmeldinga tek Sametinget opp aktivitetane
til Forsvaret i skytefeltet Hálkavarre.
Forsvarets overkommando utarbeidde tidleg i
2002 ein behovs- og funksjonsanalyse som m.a. gjorde greie for framtidig
bruk av eksisterande felt, for bombing frå fly i større
høgd enn tidlegare og for bruk av sjømissil.
Behovs- og funksjonsanalysen er framleis til
vurdering og handsaming i Forsvarsdepartementet.
Så snart forhandlingsgrunnlaget er
endeleg avklart og forankra på militærfagleg hald,
får Forsvarsbygg i oppdrag å vidareføre
forhandlingane med dei partane og rettshavarane det gjeld.
Før Olje- og energidepartementet fastset
programmet for konsekvensanalysen vedrørande utbygginga
av Snøhvit-feltet, har departementet gitt Sametinget høve til å kome
med synspunkt på programmet, både som høyringsinstans
og ved at departementet inviterte Sametinget til møte om
saka. Olje- og energidepartementet legg til grunn at konsekvensanalysen
vil dekkje dei behova for utgreiing som Sametinget har peikt på.
Olje- og energidepartementet peiker på at
staten har eigedomsretten til undersjøiske petroleumsførekomstar
og eksklusiv rett til ressursforvaltninga.
Olje- og energidepartementet har invitert Sametingsrådet
til å utdjupe og konkretisere dei samanhengane dei ser
mellom Snøhvit-utbygginga og ringverknadene for samiske
interesser.
Noreg har vore med frå starten av i
forhandlingane om ei FN-fråsegn om urfolksrettar, med ein
delegasjon der Sametinget er representert. Arbeidet med fråsegna har
hatt liten framgang, og fleire spørsmål står
att før ho kan vedtakast. Regjeringa vil ta aktivt del
i det vidare arbeidet for å få sluttført
forhandlingane innan utgangen av urfolkstiåret (2004),
og vil arbeide for at fråsegna kan vere med på å styrkje
vernet av urfolka i verda. I den samanhengen vil Regjeringa halde
nær kontakt med andre statar med sikte på å få betre
framdrift i arbeidet med fråsegna.
Regjeringa har vore aktivt med i arbeidet for å etablere
FNs permanente forum for urfolkssaker. Regjeringa vil aktivt støtte
arbeidet i Permanent forum, medrekna arbeidet med å etablere
ei sekretariatseining for forumet i tilknyting til sekretariatet
for FNs økonomiske og sosiale råd i New York.
Vidare vil Regjeringa arbeide aktivt for at Permanent forum skal
finansierast over det ordinære FN-budsjettet.
Samefolkets fond vart av Sametinget samstundes med
handsaminga av årsmeldinga. Saka er derfor ikkje teken
med i årsmeldinga. Regjeringa finn det likevel nødvendig å ta
opp saka i stortingsmeldinga.
Utvalet for Rettferdsvederlag har vist til praksis
om at verken tap på grunn av krigen eller fornorskingspolitikken
gir rett til rettferdsvederlag. I Innst. S. nr. 74 (2001-2002) viste
Stortinget i tillegg til at Stortinget gjennom etableringa av Samefolkets
fond har teke eit oppgjer med fornorskingspolitikken, slik at vurderinga i
den enkelte sak har teke utgangspunkt i dette.
Stortinget vedtok 16. juni 2000 å løyve
75 mill. kroner til Samefolkets fond i tilknyting til handsaminga
av revidert nasjonalbudsjett for 2000. Om formålet for fondet
uttalte fleirtalet i finanskomiteen at avkastninga frå fondet
skal gå til ymse tiltak som kan styrkje samisk språk
og kultur. Stortingsvedtaket omtaler etableringa av fondet som eit
kollektivt vederlag for dei skadane og den uretten fornorskingspolitikken
har valda det samiske folket.
Stortingsfleirtalet slutta seg til framlegget
frå Regjeringa om at avkastninga frå fondet ikkje
skal brukast til individuelle vederlag, jf. Innst. S. nr. 5 (2001-2002).
Utkastet til vedtekter for fondet vart handsama
under plenumssamlinga i Sametinget torsdag 30. mai 2002. Sametinget
vedtok å ta imot Samefolkets fond som eit første
ledd i forsoninga og fornyinga av forholdet mellom staten og samane,
mellom anna under føresetnad av at:
– staten
i samarbeid med Sametinget set i verk arbeid for å utvikle
nye samarbeidsformer og tiltak overfor samane.
– Regjeringa set i gang eit arbeid
for å løyse saka for dei utdanningsskadelidne
etter andre verdskrigen.
Fleirtalet i Sametinget ønskte ikkje
at avkastninga frå fondet skulle gå til individuelle
vederlag. Regjeringa vil sjå nærare på saka
og vurdere på kva måte det er mogleg og ønskjeleg å følgje
vedtaket i Sametinget.
Komiteen har merket
seg at Regjeringen arbeider med flere av de sakene som ble satt
fokus på i årsmeldingen fra Sametinget. Komiteen vil
i denne sammenheng vise til tiltak i St.meld. nr. 55 (2000-2001) Om
samepolitikken, St.meld. nr. 33 (2001-2002) Tilleggsmelding til
St.meld. nr. 55 (2000-2001) Om samepolitikken som har vært
til behandling i Stortinget parallelt med denne stortingsmeldingen,
jf. Innst. S. nr. 110 (2002-2003).